د ارزګان امنیتي مسؤلین وايي، په ګېزاب ولسوالۍ کې یې ۶۴۰ کېلو ګرامه تاریاک نیولي دي.
د ۲۰۵ اتل قول اردو د څلورمې پلې لوا قوماندان برید جنرال غلام حضرت کاکړ نن دوشنبه ازادي راډیو ته وویل چې تېره اوونۍ د ارزګان ولایت ګېزاب ولسوالۍ ۶۴۰ کېلو ګرامه تاریاک چې په یو ټرک موټر کې له ګېزاب ولسوالۍ څخه ډایکندي ولایت ته لېږدول کېده له دوو کسانو سره یوځای د تالاشۍ پر مهال د ملي اردو د منسوبینو له لوري نیول شوي دي.
د ۲۰۵ اتل قول اردو د څلورمې پلې لوا قوماندان برید جنرال غلام حضرت کاکړ
ښاغلي کاکړ زیاته کړه:
"زموږ امنیتي ځواکونو په تېره اوونۍ کې د ارزګان په ګېزاب ولسوالۍ کې هغه تاریاک ونیول چې ډایکندي ولایت ته لېږدول کېده، خو موږ نن ورځ د الوتکو له لارې مرکز ترینکوټ ته را انتقال کړل."
نوموړي زیاته کړه چې افغان ملي پوځ د نشهيي موادو په وړاندې کلک دریځ لري او د قاچاق مخنیوی يې کوي.
دا په داسې حال کې ده چې د مسؤلینو په خبره په ارزګان ولایت کې د تېر کال په پرتله دوه برابره د کوکنارو کر زیات شوی دی.