پاکستاني چارواکي به سبا چهارشنبه شربتګله د افغانستان حکومت ته وسپاري.
ټاکل شوې وه چې هغه د دوشنبې په ورځ لا په پاکستان کې د افغانستان د سیاسي ماموریت مسؤلینو ته وسپارل شي خو د ورپېښې ناروغۍ له امله د پيښور په یوه روغتون کې بستر شوه.
پېښور کې د افغانستان قونسلګري وايي چې د پاکستان له حکومته یې غوښتنه کړې وه چې د چهارشنبې تر ورځې هغې ته په روغتون کې د پاتې کېدو اجازه ورکړي.
شربتګله په پاکستان کې د جعلي اسنادو جوړولو په تور څو ورځې زنداني وه.
افغانستان ته د شربتګلې د ستنېدو لپاره به ځانګړي مراسم جوړ شي چې ولسمشر محمد اشرف غني به هم ګډون پهکې وکړي.
د ارګ مطبوعاتي دفتر وايي چې په کابل کې د شربتګلې او د هغې د کورنۍ د استوګنې تدابیر هم نیول شوي دي.