د افغانستان د ملي امنيت سلاکار وايي، د افغان دولت او حزباسلامي تر منځ د سولې موافقې په عملي کولو کې ښايي ځينې ستونزې وي.
خو د محمد حنيف اتمر په خبره، دغه ستونزې بايد په ګډه همکارۍ، همږغۍ، صداقت او اعتماد سره حل شي.
ښاغلي اتمر دغه خبرې نن په ارګ کې د دې موافقې د تطبيق ګډ اجرائيوي کمېسيون په اوله غونډه کې وکړې.
د جمهوري رياست په اعلاميه کې د ښاغلي اتمر په حواله راغلي، تر اوسه له نړيوالې ټولنې د سولې د دې موافقې لپاره يوازې د سياسي ملاتړ غوښتنه شوې ده.
ده ويلي، که نورو هڅو ته اړتيا وه، د دولت او حزب اسلامي په ګډه مشوره به ترسره شي.