د ملي وحدت حکومت رهبرانو او د حزب اسلامي مشر له وسلهوالو طالبانو وغوښتل چې د سولې پروسې سره یوځای شي.
ولسمشر محمد اشرف غني نن له ګلبدین حکمتیار سره د سولې هوکړه لیک له لاسلیک وروسته وویل چې وسلهوال طالبان اوس مهال ښه فرصت لري چې له جګړې او سولې یو انتخاب کړي.
ښاغلي غني زیاته کړه:
"اوس مهال وسلهوالو طالبانو او نور مخالفو ډلو ته ښه فرصت دی چې له موجوده دوو لارو څخه یو وټاکي چې د هغوې انتخاب څه دی."
په همدې حال کې اجرائیه رئیس عبدالله عبدالله هم له وسلهوالو طالبانو وغوښتل څو له جګړې لاس واخلي.
دې سره هممهاله د اسلامي حزب مشر ګلبدین حکمتیار چې یادې غونډې ته د ویډو کنفرانس له لارې خبرې کولې له ټولو وسلهوالو مخالفینو وغوښتل څو خپل اهداف له سوله ییزې لارې ترلاسه کړي.
له دې وړاندې هم د افغانستان حکومت له وسلهوالو مخالفینو عوښتي چې له جګړې لاس واخلي او سولې پروسې سره یوځای شي.
د یادونې وړ ده چې له حزب اسلامي سره دغه تړون له څو میاشتو اوږدو خبرو اترو وروسته لاسلیک شو.