هند له افغانستان سره د خپلو مالي همکاریو په دوهمه مرحله کې د انکشافي پروژو لپاره د یو میلیارد ډالرو مرسته اعلان کړه.
د هند د دې تازه مالي مرستې اعلان نن په نوې ډېلي کې د افغان ولسمشر او د هند د صدراعظم نرېندرا مودي د کتنې پر مهال شوی دی.
د افغان ولسمشر سر سلاکار نادر نادري په خپله فېسبوک پاڼه نن وویل دا په دې معنا ده چې هر هندي وګړی له افغانستان سره یو ډالر مرسته کوي.
د افغانستان جمهوري ریاست وايې ولسمشر غني او ورسره مل لوړ رتبه پلاوی به له هندي مشرانو سره د ترورېزم پر ضد د ګډې مبارزې او له کابل سره د نوې ډېلي د پوځي او اقتصادي همکاریو په اړه خبرې وکړي.
ټاکل شوې ده چې افغان ولسمشر په دې دوه ورځني سفر کې له هندي سوداګرو او په دې هېواد په زدهکړو بوختو افغان محصلانو سره هم وویني.