د ترکیې صدراعظم بن علي ییلدرم وايي، ترکي ځواکونو او د سوریې حکومت وسلهوالو مخالفینو اسلامي دولت ډله یا داعش د ترکیې او سوریې په ګډ سرحد کې له پرتو سیمو څخه ایستلې ده.
ییلدرم کرد مېشتې دیارباقر ښار ته د سفر پر مهال په یوه ټلوېزیوني وینا کې وویل، له ازاز «Azaz» څخه تر جرابلس «Jarabulus» پورې د دواړو هېوادونو تر منځ په ۹۱ کېلو متره سرحد کې امنیت ټینګ شوی او ټولې ترورېستي ډلې په شا تمبول شوي دي.
ییلدرم همداراز د ترکیې په شمال کې د کرد وسلهوالو پرمختګ په اړه خبرداری ورکړ او ویېویل چې ترکیه به د سوریې په شمال کې د کُرد جنګیالیو پرمختګ ته اجازه ورنهکړي.
ښاغلي ییلدرم زیاته کړه:
"موږ به هېڅکله د سوریې په شمال کې د یوه تصنعي حکومت جوړېدو ته اجازه ورنهکړو."
د ییلدرم اشاره د سوریې په شمال کې د «YPG» په نوم کُرد وسلهوالو پرمختګ ته وه.
ترکیه «YPG» ترورېستي سازمان او د کُردستان کارګرانو ګوند «PKK» سره تړلې ډله بولي.
په همدې حال کې د سوریې بشري حقونو څار ټولنه وايي، وروسته له دې چې د ترکیې او سوریې په ګډ سرحد کې پرتې سیمې د داعش ډلې له ولکې ووتې، له ټولې نړۍ سرهیې اړیکې پرې شوې دي.
د سوریې بشري حقونو څار ډله چې مرکز یې په لندن کې دی وايي، د بشارالاسد د رژیم وسلهوالو مخالفینو له ترکیې سره په سرحد کې پراته ګڼ شمېر کلي وروسته له هغه د ترکي پوځ د ټانکونو او الوتکو په مرسته ونیول چې د داعش وسلهوالو سیمه پرېښوده.