په داسې حال کې چې چارواکي وايي، د سپین بولدک- چمن لارې د پرانیستلو لپاره هڅې روانې دي دا لار تر اوسه هم بنده ده.
د سپین بولدک- چمن لاره څو ورځې وړاندې وروسته له هغه بنده شوه چې د اعتراض کوونکو یوې ډلې په سپین بولدک کې د مظاهرې په ترڅ کې د پاکستان بیرغ ته اور واچاوه او پاکستاني چارواکو د دې لارې د بندولو پرېکړه وکړه.
د کندهار سیمه ییزو چارواکو پرون وویل چې د لارې د پرانیستو په مقصد هڅې روانې دي.
د کندهار د والي ویاند صمیم خپلواک ازادي راډیو ته وویل، د دې ستونزې د حل هڅه له ډيپلوماتیکو لارو کېږي:
"د بهرنیو چارو وزارت او په اسلام اباد کې د افغانستان د سفارت له لوري هم دا موضوع شریکه شوې ده، کوښښ کېږي چې دا ستونزه له ډيپلوماټیکو لارو هواره شي."
د کندهار چارواکي او سوداګر وايي چې د دې لارې بندېدو د افغانستان د میوو محصولات سخت زیانمن کړي.
د کډوالو لپاره د ملګرو ملتونو لویه کمېشنري بیا وايي چې دوی هم د کډوالو د ستنېدو لپاره د چمن- سپین بولدک د لارې خلاصېدو ته سترګې په لاره دي.