د افغان حکومت اجرائیه رئیس وايي، د وزیرانو شورا له لوري د انتخاباتو د قانون د تعدیل مسودې تصویبېدل د انتخاباتو ترسره کېدو ته لاره هواره وي.
عبدالله عبدالله دا څرګندونې نن د ستراتیژیکو مطالعاتو د انسټیټوټ له خوا د یوې سروې د اعلان په غونډې کې وکړې.
هغه زیاته کړه:
"د انتخاباتو د قانون په برخه کې پرون یو پرمختګ و شو، یوه پرېکړه و شوه چې د انتخاباتي اصلاحاتو په برخه کې ده او دا د انتخاباتو تر سره کېدو ته لاره هواروي."
ښاغلي عبدالله ټینګار وکړ، کله چې انتخابات وشي، نو د هغې لویې جرګې رابللو ته لاره هوارېږي چې په اساسي قانون کې یې وړاندوینه شوې ده.
د افغانستان د انتخاباتو د قانون مسوده پرون ناوخته د کابینې لخوا تصویب شوه.
په دې وروستیو کې د افغان ولسمشر محمد اشرف غني او اجرائیه رئیس عبدالله عبدالله ترمنځ سیاسي کړکېچ زیات شوی او ښاغلي عبدالله یو ځل بیا د سیاسي موافقنامې په پلې کېدو ټینګار وکړ چې انتخابات او د لویې جرګې جوړېدل هم په کې شامل دي.