تراوسه د هغه امریکایي او اسټرالیایي برخلیک نه دي معلوم چې تېره ورځ په کابل کې یرغمل شول.
دغه دوه تنه چې د چارواکو په وینا په کابل کې د امریکایي پوهنتون استادان وو، د دارالامان له سیمې لادرکه شوي دي.
په کابل کې د استرالیا سفارت د خپل یوه تبعه یرغمل کېدل تایید کړي خو د امنیتي دلایلو له امله یې په دې اړه زیات جزیات نه دي ورکړي.
په واشنګټن کې د امریکا د بهرنیو چارو وزارت هم د یوه امریکایي تبعه یرغمل کېدل تایید کړي خو له نورو جزیاتو ورکولو یې ډډه کړې ده.
تراوسه پورې چا یا کومې ډلې د دغې پېښې مسؤلیت په غاړه نه دی اخېستی.
د افغانستان د کورنیو چارو وزارت وایي، د یرغملو د موندلو او خلاصون لپاره هڅې تېزې شوي دي.