د جرمني پولیس وايي د مونشن ښار د مشکوک برید کوونکي په کور کې يې داسې هېڅ شواهد نهدي موندلي چې له داعش سره د هغه اړیکه وښيي.
خو پولیسو د دغه ایرانيالاصله جرمني وګړي او د ناروې د ډلهییزې وژنې د مسؤل اندیرس بهرینګ بریویک تر منځ اړیکې ته اشاره کړې ده.
جرمني چارواکو ویلي پر یوه پلورنځای د شنبې د شپې په برید کې د مشکوک حمله کوونکي ډیوډ علي سونبولي په ګډون لس کسان وژل شوي دي.
د جرمني صدراعظمې انګلا مېرکل ژمنه کړې چې د مونشن د حملې تر شا اسباب به پیدا کوي.
مېرکل وايي:
"موږ به معلومه کړو چې په مونشن کې د جنایت تر شاه څه دي. موږ به تر هغې ارام ونهکړو تر څو په دقیقه توګه پوه نهشو چې څرنګه د ویرزبورګ برید کوونکی رادیکال شو. دولت او امنیتي ادارې بهيې په جرمني کې د ټولو اوسېدونکو د سلامتۍ او ازادۍ د خوندي ساتلو لپاره هر څه چې کولای شي ترسره کړي."
ایرانیالاصله سونوبولی ۱۸ کلن و او د چارواکو په خبره د رواني ناروغۍ سابقهيې لرله.
د دغه مشکوک برید کوونکي جسد د مونشن ښار له اولمپیک پلورنځای څخه چېرته چې يې لس کسان په ډزو ووژل، یو کیلو متر لیرې وموندل شو.
چارواکي وايي هغه په سر په مرمۍ لګېدلی و چې په ظاهره ښکاري په خپله بهيې ځان ویشتی وي.