د افغانستان د بهرنیو چارو وزارت وايي، ترهغې چې په افغانستان کې سراسري امنیت نه وي ټینګ شوی د ډیورنډ کرښه د بحث وړ نه ده.
د دغه وزارت ویاند شکیب مستغني نن ازادي راډیو ته وویل چې د ډیورنډ د فرضي کرښې په اړه تصمیم حکومتونه نه بلکې د کرښې دواړو غاړو ته میشت ولسونه نیسي.
ښاغلي مستغني زیاته کړه:
"د ډیورنډ د کرښې په اړه د تصمیم نیول د حکومتونو کار نه دی او ترهغې چې سراسري امنیت په افغانستان کې تامین نه شي د ډیورنډ کرښه د بحث وړ نه ده."
دا په داسې حال کې ده چې نن د ولسي جرګې په عمومي غونډه ځینو وکیلانو ادعا وکړه چې ګواکې پاکستاني ځواکونو د ډیورنډ د فرضي کرښې په اوږدو کې د تاسیساتو جوړلو لړۍ جاري ساتلې.
د دغه جرګې مشر او یو شمېر غړو پر ولسمشر غږ وکړ چې د افغانستان د ځمکنۍ بشپړتیا په برخه کې باید بې غوري ونه کړي.