میلیونونه بریتانویانو پرون پنجشنبې په اروپايي اتحادیه کې د خپل هېواد د پاتې کېدو یا له اتحادیې د وتلو د پریکړې لپاره په مشورتي ټولپوښتنه کې ګډون وکړ.
بریتانویانو په ۱۹۷۵میلادي کال کې د اروپايي اتحادیې په اقتصادي بلاک کې د خپل هېواد د برخلیک په اړه په ټولپوښتنه کې برخه اخېستې وه.
له هغه راهیسې، دا د اروپايي ټولنې او بریتانیې د اړیکو په اړه د خلکو د عمومي نظر غوښتنې لومړۍ بیلګه ده.
په بریتانیې کې پرون د راییو د مرکزونو په وړاندې د خلکو اوږدې لیکې ولاړې وې.
مرکزونه د شپې په لس بجو وتړل شو.
د دې هېواد صدراعظم ډیویډ کامېرون او د هغه میرمن سمنټا د ویسټ مینیستر سیمې د رایې ورکولو مرکز ته ولاړ وو او خپلې رایې یې ثبت کړې.
د بریتانوۍ ورځپاڼې ګارډین په حواله، صدراعظم کامېرون ان د هوا پر څرنګوالي خبرې ونه کړې او د خبریالانو پوښتنو ته له پام پرته، له هغه ځایه ووت.
ډیویډ کامېرون او د هغه میرمن سمنټا د ویسټ مینیستر سیمې د رایې ورکولو مرکز ته ولاړ وو او خپلې رایې یې ثبت کړې.
په بریتانیه کې لږ تر لږه شپږ څلویښت نیم میلیونه وګړي د رایې ورکولو په شرایطو برابر وو.
د بریتانیې له خلکو غوښتل شوي وو چې په احتیاط، په اروپايي ټولنې کې د پاتې کېدو یا له ټولنې د خپل هېواد د وتلو پریکړه وکړي، ځکه په اروپايي اتحادیه کې د بریتانیې موقعیت یوازې د دې هېواد نه، بلکه د ټولې اروپا پر سیاسي او اقتصادي نقشه اغېز کولای شي.
خو په اروپايي اتحادیه کې د بریتانیې د برخلیک په اړه د دې نظر پوښتنې پایلې باید، له قانوني اړخه د عملي کېدو لپاره د بریتانیې پارلمان تایید کړي.
له دې امله د ټولپوښتنې د پریکړي عملي کېدل، د پارلمان له تایید، د قانون له نظره جبري نه دي.
پر دې اساس، دا مسئله مهمه ده چې په ابتدا کې هم په اروپايي اتحادیه کې د دې هېواد د غړیتوب پریکړه پارلمان کړې وه.
د رایېو شمېرلو لپاره۳۲۸ مرکزونه پرانېستل شوي وو.
له اروپايي اتحادیې د وتلود پلان [بریکزیت] زیات ملاتړ کوونکې د انګلستان په ختیځ کې وو چې د بیلګې په ډول، د لینکېنشایر او کېنت سیمې د یادولو وړ دي.
فاراج: له اروپايي اتحادیي وتل به بریتانیا له زیاتو ستونزو وژغوري.
د بریتانیې د استقلال ګوند مشر نایجل فاراج په کنت کې د خپل کور شاوخوا راغونډو خلکوته وویل چې له ټولنې وتل، یا د [بریکزت] په ملاتړ رایه ورکول به دا هېواد له زیاتو ستونزو وژغوري:
نایجل فاراجزیاته کړه:
"زما په باور، د بریتانیې لپاره غوره انتخاب وتل دي او زه بلاخره دې نتیجې ورسېدم چې باید ووځو."
خو په کامبرج، لندن او اکسفورډ کې زیات خلک په اروپايي اتحادیه کې د پاتې کېدو د نظر ملاتړ کوونکې وو.
په دودیز ډول، په بریتانیه کې د دې ټولپوښتنې اخري پایلې په مانسچټر ښار کې اعلانیږي.