سويډني چارواکي وايي دوی ښايي يو بوسنيايي سړى چې په سويډن کې يې د پناه غوښتنه کړې وه، له دې هېواده اخراج کړي.
پر دې سړي شک کېږي چې له اسلامي دولت سخت دريځې ډلې يا داعش سره اړيکې لري.
د سويډن د کډوالو ادارې چارواکو پرون وويل چې دغه شپږ څلوېښت کلن سړي ته چې نوم يې نه دى ياد شوى، د يوه جدي امنيتي خطر په سترګه کتل کېږي او د اروپايي ټولنې د ملي امنيت په ډېټابېس کې دى د فرانسې له خوا تثبيت شوى دى.
په سويډن کې د بوسنيايانو د پناه غوښتنې درخواستونه په سيستماټيک ډول ردېږي.
بوسنيا او هرزګوينا چې د اروپايي ټولنې غړيتوب ته کانديد دى، د اروپايي ټولنې زياتو غړو ته خوندي ځاى ګڼل کېږي.
د سويډن سيدس وينس کان ورځپانه او نور خبري اژانسونه وايي چې دغه سړي له داعش ډلې سره اړيکې لرلې.
دغه سړى له خپلو څلورو ماشومانو سره د دوشنبې په ورځ په الوتکه کې له بوسنيا د سويډن مالمو ته رسېدلى دى.