افغان ولسمشر محمد اشرف غني وایي، ډېر ژر به د پولیسو په لیکو کې د اصلاحاتو لړۍ پیل شي.
ولسمشر غني د هلمند په شورا بک کې ۲۱۵ میوند قول اردو کې یوې جوړې شوې غونډې ته وویل هغه کسان به محاکمه شي چې د پولیسو په لیکو کې په فساد تورن دي.
ښاغلي غني همدارنګه وویل په نږدې راتلونکي کې د فساد پرضد یوه عالي شورا جوړیږي څو دهغو والیانو، امنیې قوماندانانو او وزیرانو دوسیې وڅېړي چې په فساد کې ښکېل دي.
ولسمشر غني تینګار کړی چې د فساد پرضد دا عالي شورا به د دغو کسانو د دوسیو له څېړل کېدو وروسته یاد کسان عدلي او قضایې ارګانونو ته معرفي کوي.
هلمند ته له ولسمشر سره په دې سفر کې د کابینې یو شمېر غړي او په ملي شورا کې د هلمند استازو ملګرتیا کوله.
ولسمشر په داسې حال کې هلمند ته سفر کوي چې په دې وروستیو کې د هلمند په یو شمېر سیمو کې ناامنۍ زیاتې شوي او حتی تېره اوونۍ د هلمند د ولایتي شورا مشر د لښکرګاه د احتمالي سقوط خبرداری ورکړ.