د پاکستان د بهرنیو چارو وزارت وايي، پاکستان له ژمنې سره سم د افغانستان د سولې له بهیر سره ډیر څه کړي او مرسته یې باید له پامه ونه غورځول شي.
د پاکستان د بهرنیو چارو وزارت ویاند نفیس ذکریا نن په اسلام اباد کې یوې خبري غونډې ته وویل چې د ستونزو پره باید د پاکستان پر غاړه وانه چول شي:
"پاکستان ډیر څه کړي او د اخلاص په اړه یې باید شک ونه شي. موږ له استثنا پرته د ټولو تروریستي ډلو پرضد اقدام کړی او په وار وار مو ویلي دي چې د پاکستان پر نیت او هڅو شک نه یوازې سم کار نه دی بلکې ګټه یې هغو ته رسیږي چې په افغانستان کې سوله نه غواړي."
د افغانستان د سولې په اړه په اسلام آباد کې له پنځمې څلور اړخیزې غونډې وروسته افغان حکومت نن بیا هم ټینګار وکړ چې پاکستان باید خپلې پخوانۍ ژمنې عملي کړي.
د ولسمشر مرستیال ویاند دوا خان مینه پال آزادي راډیو ته وویل، د اسلام آباد په پرونۍ غونډه کې افغان حکومت تر ډېره د پاکستان له خوا د ژمنو د عملي کولو پر اړتیا ټینګار وکړ.