د عراق د پلازمېنې بغداد په يوه شيعه مېشته سيمه کې د يوې زورورې موټربم چاودنې له کبله د وژل شويو کسانو شمر ۵۲ ته ورسېد.
په دې چاودنه کې تر ۶۵ زيات نور کسان ټپيان شوي، چې د ځينو صحي وضعيت نازک ښوول شوى دى.
دا په وروستيو کلونو کې په بغداد کې تر ټولو زوروره حمله ګڼل شوې ده.
په دې چاودنه کې د بغداد په ختيځ مدينة الصدر کې يو له ګڼه ګوڼې ډک- پرانيستى مارکېټ په نښه شوى دى.
د اسلامي دولت ډلې يا داعش د دې حملې مسووليت منلى دى.
عراقي پوليس وايي اندېښنه لري چې ښايي د وژل شويو کسانو شمېر تر دې لا زيات شي.