د تورخم دروازه د دویمې ورځې لپاره هم د مسافرو پرمخ تړلې ده.
د ننګرهار د والي ویاند عطاوالله خوګیاڼي وايي، تېره ورځ پاکستاني ملیشو غوښتل چې د ډیورنډ کرښې په صفري نقطه کې تاسیسات جوړ خو د افغانستان سرحدي ځواکونو له خوا یې مخالفت وشو.
دی وايي، ولایتي اداره هڅه کوي چې دا ستونزه د خبرو له لارې حل کړي.
له تورخمه افغان مسافر رحمان الله شینواري ازادي راډیو ته وویل چې د دروازې دواړو غاړو ته سلګونه مسافر چې زیاتره یې ښځې او ماشومان دي بند پاتې دي.
د سیمې خلک وايي چې د تورخم دروازه د سې شنبې ورځې راهیسې د مسافرو پرمخ تړل شوې ده.