پخواني جهادي مشر عبدالرب رسول سیاف وایي، که حکومت یې غوښتنې او سپارښتنې ونه مني، په بدیلو نسخو به فکر وکړي.
ښاغلي سیاف د پنجشنبې په ورځ د مجاهدینو د بریا د څلورویشتمې کلیزې په مناسبت جوړه شوې غونډه کې انتقاد وکړ چې حکومت د وضعیت د ښه کېدو لپاره نه خپله څه کوي او نه د نورو مشورو ته غوږ نیسي.
د ثورد اتمې په نمانځغونډه کې یو شمېر نورو پخوانیو جهادي او حکومتي څيرو له حکومته وغوښتل چې د پاکستان مداخلو د مخنیوي لپاره نوي ستراتیژي عملي کړي.
د حراست او ثبات شورا د رهبرۍ غړی عبدالرب رسول سیاف وايي چې د موجوده نظام د ټولو ستونزو سره سره یې د خلکو عمومي ګټې په نظر کې نیولي او غلي دي.
هغه د پنجشنبې په ورځ د مجاهدینو د بریا ورځې په مناسب جوړه شوې غونډه کې وویل، د وضعیت د ښه کېدو لپاره یې د ملي یووالي حکومت ته څو نسخې ورکړي خو پرې عمل نه دی شوی.
ښاغلي سیاف زیاته کړه:
"موږ نسخه ورکړې ده په هغې نسخې عمل ونه شو او هغو مشورو ته هم چا غوږ ونه نیوه چې د نظام د پیاوړتیا او د وضعیت د ښه کېدو لپاره وې، بالاخره زموږ دیني وجیبه، زموږ اسلامي او ایماني دنده دا ایجابوي چې که وضعیت همداسې دوام پیدا کوي نو د دې پرځای چې هېواد مو تبا شي موږ به په بدیلو نسخو کار وکړو."
هغه وايي چې دوی لاهم د نظام سقوط نه غواړي خو د وضعیت د لا خرابیدو په صورت کې به د ملت له مشورو سره په داسې بدیلو لارو کار وکړي چې د ملت له شان سره برابرې وي.
ښاغلي سیاف د تل په څېر یو ځل بیا طالبان، داعش او القاعده ډلې د دین څخه په انحراف تورنې کړې او ویې ویل چې روانې جګړې ته د جهاد نوم ورکول بل لوی جنایت دی.
هغه وايي چې په ملي یووالي حکومت کې ستونزې او ناهمغږي دومره ډيرې دي چې په ډیرو وړو مسالو بحثونه میاشتې وخت نیسي.
د حراست او ثبات شورا پنځه میاشتې وړاندې د جوړېدو په وخت کې هم حکومت ته د وضعیت د ښه کېدو لپاره سپارښتنې کړي وې او غوښتنه یې کړې وه چې د ملي یووالي حکومت د جوړېدو پریکړه لیک عملي کړي.
د دې شورا بل غړی او د پخواني جمهور ریس مرستیال محمد یونس قانوني بیا وايي چې د افغانستان په ستونزو کې پاکستاني استخبارات خلاص لاس لري او باید دا مداخلې بندې شي.
د افغانانو د جهاد د بریا دغې نمانځغونډې ته ښاغلی قانوني وویل.
"یوه ښه ستراتیژي په افغانستان کې د ټولو ستونزو د حل لار ده، د ISI ستراتیژي که منصرفه نه کړو ان د افغانستان نږدې دوست هېوادونو سره به هم د تکرار تېروتنو قرباني وو."
محمد یونس قانوني بیا وايي چې د افغانستان په ستونزو کې پاکستاني استخبارات خلاص لاس لري
دا په داسې حال کې ده چې افغان حکومت هم په دې وروستیو کې د پاکستان په وړاندې توندې څرګندونې کړي دي.
له دې سره د ښاغلي سیاف د څرګندو په ځواب کې جمهوري ریاست وايي چې د حکومت په هر موقف د خلکو وړاندیزونه اوري.
د جمهور ریس د ویاند مرستیال دواخان مینه پال په دې اړه ازادي راډيو ته وویل.
"د افغانستان حکومت د جهادي رهبرانو مشورو ته ارزښت ورکوي او د دوی د مشورو درناوی کوي، تاسې د جمهور ریس وروستی وینا چې په ملي شورا کې یې درلوده خبر یې دا هغه څه وو چې ملت او جهادي مشرانو غوښته."
د حراست او ثبات شورا چې اکثره غړي یې جهادي څيري، د پخواني حکومت وزیران، والیان او ځيني نور چارواکې دي په داسې حال کې د ملي یووالي په حکومت انتقادونه کوي چې حکومتي چارواکې هم د روان وضعیت څخه خوشحاله نه ښکاري.
راپور: یوسف خان ځدراڼ