د هرات سیمه ییز چارواکي وايي چې په دغه ولایت کې ۴۱ کلن سړي پر یوې څلور کلنې نجلۍ جنسي تېری کړی دی.
د هرات د امنیې قوماندانۍ ویاند عبدالروف احمدي نن ازادي راډیو ته وویل تېری کوونکی قربان نومېږي چې د غور ولایت اصلي اوسېدونکی دی چې د لسمې ناحیې په باغ کې یې په دې معصومې نجلۍ تېری کړی.
ښاغلي احمدی وايي چې دامهال قربان د پولیسو له لوري نیول شوی او په خپل جرم یې اعتراف هم کړی دی.
د هرات د امنیې قوماندانۍ ویاند وايي چې دغه معصومه نجلۍ د هرات په حوزوي روغتون کې تر درملنې وروسته کور ته رخصت شوې ده.