یونان نن د کډوالو یوه بله ډله ترکيې ته بېرته واستوله.
دا کډوال د هغې لانجمنې موافقې له مخې ترکيې ته استول کېږي چې اروپا د مهاجرت د څپې د کموالي په هدف کړې ده.
تر دې مخکې د یونان له لیزبوس ټاپو څخه ۲۰۲ کسان چې اکثره يې پاکستانیان وو، ترکیه ته بېر ته ولېږدول شول.
بل لورته بیا د سوريي د کډوالو یوه نوې ډله له ترکيې څخه جرمني او فنلنډ ته رسېدلې ده.
د اروپايي ټولنې او ترکيې ترمنځ د شوې موافقې له مخې انقره به ټول هغه کډوال بېرته مني چې په غیر قانوني توګه له دې هېواد څخه یونان ته اوښتي دي.
اروپايي ټولنه به د دې په بدل کې له ترکيي سره مالي مرسته زیاته کړي، د ویزې په برخه کې به اسانتیا ورکړي او په اروپايي ټولنه کې د دې هېواد د غړیتوب چارې به ګړندۍ کړي.
خو د بشري حقونو ډلې پر دې موافقه انتقادونه کوي او وايي چې ترکیه ددې لپاره لازم چمتوالی نه لري.