په یونان کې یو شمېر نورو مرستندویه ټولنو هم ویلي دي چې دوی به خپل کارونه ودروي. دا هغه موسسې دي چې له کډوالو سره مرسته کوي.
د بشري حقونو موسسو د اروپایي ټولنې او ترکېې ترمنځ پر شوې موافقې انتقاد کړی دی چې له مخې یې باید د کډوالو دوسیې ژر تر ژره وکتل شي او کوم کډوال چې اسناد یې د منلو نه وي، هغه به بیرته ترکېې ته استول کېږي.
مرستندویه ټولنو ویلي دي چې په یونان کې د کډوالو د توقیف په مرکز کې غیرعادلانه او غیرانساني چلند به د دوی کارونه سخته کړي.
د سې شنبې په ورځ د ملګروملتونو د کډوالو د چارو ادارې او د بې پولې ډاکټرانو مرستندویه ټولنې اعلان وکړ چې دوی نوره مرسته نه کوي.
یوه ورځ وروسته "ای.ار.سي" او د ناروې د کډوالو شورا هم ورته پریکړه وکړه.
د اوس لپاره په یونان کې د کډوالو په مرکز کې نژدې ۵۰زره کسان شته چې اکثریت یې مخکې تر دې دلته راغلي دي چې اروپایي ټولنه له ترکېې سره د پناه غوښتونکو په برخه کې تړون وکړي.