د پاکستان حکومت يو کس چې په ٢٠١١میلادي کال کې د يوه ګورنر يا والي په وژنې تورن و، اعدام کړى دى.
د پنجاب ګورنر يا والي د مقدساتو په شديد قانون کې د ځينو اصلاحاتو غوښتنه کړې وه.
د والي په وژنې محکوم شوى کس ممتاز قادري نن په راولپنډۍ کې په دار وځړول شو.
قادري ته ګڼ سخت دريځي کسان د يوه اتل په سترګه ګوري چې د پنجاب د والي سلمان تاثير پخوانى باډيګارډ و.
ده سلمان تاثير په رڼا ورځ د اسلام اباد په يوه مارکيټ کې په ٢٨ مرميو وويشت او وواژه، قادري پر خپل جرم اعتراف کړى دى.
هغه قاضي چې دغه محاکمه يې پرمخ بېوله د مرګ د ګواښونو له کبله مجبوره شو له پاکستانه ووځي.