واشنګټن پُسټ لیکلي د دوی یوه خبریال جیسن رضاییان ته چې له څه باندې ۵۰۰ ورځو راهیسې په ایران کې بندي دی؛ د کرېسمس اختر په ماښام اجازه ورکړل شوه چې له خپلې کورنۍ سره ماښامنۍ وخوري.
د واشنګټن پُست اډېټور مارټین بارون پرون ویلي چې خوښ دی د دوی همکار جیسن ته اجازه ورکړل شوې چې له خپلې مور او مېرمنې سره وخت تېر کړي.
په یوه اعلامیه کې راغلي چې دا د جیسن د ۵۲۲ ورځني بند په موده کې یوه استثنایي ورځ وه.
۳۹ کلن رضاییان چې ایراني الاصله امریکایی دی؛ د روان کال په سر کې د یوې محکمې په ترڅ کې چې د تړلو دروازو تر شا وشوه؛ په جاسوسۍ تورن شو.
د ایران قضایي قوې په نومبر کې ویلي چې رضاییان د یوې نامعلومې مودې لپاره په بند کې دی.
د ده کورنۍ او دفتر په کراتو د هغه پر وړاندې تورونه رد کړي او د خوشې کېدو غوښتنه یې کړې ده.