د امریکا د ولسمشرۍ انتخاباتو لپاره د هغه هېواد د جمهوري غوښتونکي کاندید "ډونالډ ټرمپ" هغه څرګندونې چې وایي؛ امریکا ته باید د مسلمانانو ورتګ کاملاً ممنوع شي؛ د بېلابېلو سیاسي ډلو له خوا غندل شوي دي.
د امریکا د استازو جرګې مشر "پاول راین" چې د جمهوري غوښتونکو له ګوند څخه دی؛ د سې شنبې په ورځ د همدې څرګندونو په غبرګون کې وویل:
"زه معمولاً د ولسمشرۍ انتخاباتو پورې اړوندو مسایلو باندې نظر نه څرګندوم؛ خو نن یوه استثنا شته.
دا محافظه کاري نه ده. د ډونالډ ټرمپ پرونی وړاندیز د جمهوري غوښتونکي ګوند او تر هغه لا مهم د امریکا له ارزښتونو سره سمې نه دي.
د سپینې ماڼۍ ویاند جاش ارنسټ ویلي؛ د ټرمپ دغه وړاندیز د امریکا د ولسمشر کېدو لپاره د هغه صلاحیتونه له منځه وړي.
ټرمپ پرون له خپل دریځ څخه د دفاع لپاره ویلي چې په دغو خبرو کې یې هغه مسلمانان هدف نه وو چې په امریکا کې ژوند کوي.