د ملي عدالت او ازادي غورځنګ سلګونه غړیو نن په بلخ کې مظاهره وکړه. دوی په زابل کې د اوو کسانو د وژنې په اعتراض دا مظاهره رابللې وه.
له سیمې د ازادي راډیو خبریال وایې، مظاهره کوونکو له حکومته دا غوښتنه لرله چې باید د خلکو د امنیت خوندیتوب ته جدي پام وکړي او د خلکو وژونکي مجازات کړي.
مظاهره کوونکو همداراز د اجراییه ریاست د دویم مرستیال حاجي محمد محقق څرګندونې وغندلې.
ښاغلي محقق پرون د ارګ په ماڼۍ کې د مظاهره کوونکو استازیو ته د وینا پرمهال وویل، چې حکومت په زابل کې د تښتول شویو کسانو د خوشې کیدو لپاره ډیرې هڅې وکړې.
نوموړي همداراز وویل، چې یو شمېر کسانو او کړیو هڅې وکړې څو په کابل کې د چهارشنبې ورځې له مظاهرې څخه سیاسي ګټه پورته کړي.