ټاکل شوې چې د افغانستان د ولسي جرګې يو هيئت نن روسيې ته سفر وکړي.
دغه هيئت به په افغانستان کې د داعش او نورو دولت ضد وسلوالو ډلو په وړاندې د مبارزې لپاره د روسيې د پوځي مرستې غوښتنه وکړي.
داسې اندېښنې شته چې روسيه ښايي د سوريې په څېر په افغانستان کې هم د داعش ډلې په وړاندې هوايي عمليات پيل کړي.
خو د ولسي جرګې دويم مرستيال محمد نذير احمدزي چې د ولسي جرګې د درې کسيز هيئت مشري کوي ازادۍ راډيو ته وويل دوى به هلته په څرګنده ووايي چې افغانستان پر خپله خاوره د بل چا عملياتو ته اجازه نه ورکوي.
د روسيې د بهرنيو چارو وزير سرګي لاوروف پرون په مسکو کې يوه کنفرانس ته وويل:
((موږ تيار يو چې د افغان ځواکونو د وړتياوو له لوړېدو سره خپلو مرستو ته ادامه ورکړو.))
د جمهوري رياست لومړي مرستيال جنرال عبدالرشيد دوستم هم په وروستيو کې روسيې ته سفر درلود.