د کرملین ویاند دیمیتري پیسکوف وویل، د مسکو او واشنګټن ترمنځ د سوریې د شخړو د هواري لپاره خبرې ګټه نه کوي.
پیسکوف دا خبره نن هغه وخت وکړه چې له ده څخه د روسیې د ولسمشر ولادیمیرپوتین او د امریکا د ولسمشربارک اوباما ترمنځ د سوریې په اړه د احتمالي خبرو پوښتنه وشوه.
د روسیې د حکومت ویاند دا خبرې په داسې حال کې کړې دي چې راپورونه وایي چې په سوریې کې د روسیې پوځي حضورپه پراخیدو دی.
امریکایي پوځیانو تیره ورځ وویل چې په وروستیو کې روسانو د سوریې په لاذقیة ښارکې هڅې پیل کړي دي او په دې ډول مسکو غواړي چې هلته د هوایي علمیاتو یو مرکز جوړ کړي.
د امریکا د متحدایالتونو د دفاع وزارت ویاند جیف داویس وویل چې د سوریې په دغې ساحلي سیمې کې ورو ورو خلک او وسایط زیات شوې دي.