چارواکي وايي، د کونړپه ناړۍ ولسوالۍ کې د افغان سرتیرو او پاکستانیو ملیشو ترمنځ جګړه پای ته رسیدلې ده.
د کونړامنیه قومندان جنرال عبدالحبیب سیدخیل نن ازادي راډیوته وویل چې په دغې جګړه کې دوه افغان سرتیري وژل شوي درې ملکیان او اوه نور سرتیري ټپیان شوي دي.
ښاغلي سیدخیل د پاکستاني ملیشو د مرګ ژوبلې په اړه ناخبري وښوده خو زیاته کړه چې په دغه نښته کې د پاکستاني ملیشو درې پوستې سوځول شوي او ګڼ مهمات هم د افغان ځواکونو لاسته ورغلي دي.
څه موده وړاندې د پکتیکا په انګوراډې سیمه کې هم د افغان او پاکستاني سرحدي ځواکونو ترمنځ جګړه شوې وه چې یو افغان سرحدي ساتونکی په کې ووژل شو.