د هلمند د نوزاد او ګرشک ولسوالیو ترمنځ 45 کیلومتره پوخ سړک جوړیږي.
په هلمند کې د فواید عامه ریس اهل الله عبیدي پرون [چهارشنبه] ازادي راډیو ته وویل، د سړک د جوړولو کارپه دریو برخو ویشل شوی دی.
د ښاغلي عبیدي په وینا، د دې سرک مالي لګښت نړېوال بانک ورکوي. اهل الله عبیدي وړاندې وویل:
((د دې ټول لګښت تقریبا 255 ملیونه افغانۍ دي چې پل چکونه به هم په کې جوړ شي. دا سرک به لس سانتي متر قیر شي.))
د نوزاد او ګرشک ترمنځ د پاخه سرک د جوړولو چارې [خراسان] ساختماني شرکت ته سپارل شوې دي.
د دې شرکت مسئولینو له حکومته غوښتنه وکړه چې په سیمه کې د کار لپاره امنیت ټینګ کړي.