د ترکیې صدراعظم احمد داود اوغلو وایي، په سوریه او د عراق په شمال کې د اسلامي دولت ډلې او د کردستان د کارګرانو د ګوند د وسله والو پرضد د ترکیې هوایي بمباري به د ده په وینا په سیمه کې لوبه بدله کړې.
داود اوغلو دا څرګندونې نن د ترکیي ورځپاڼو محررینو ته کړي دي.
هغه ویلي چې د ترکیې حضوربه چې له خپلو ځواکونو په اغیزمن ډول کار اخیستلی شي، داسې یو وضعیت رامنځ ته کړي چی په سوریه او عراق او په ټوله سیمه کې به لوبه بدله کړي.
د حریت ورځپاڼې د راپور له مخې داود اوغلو ویلي چې اوس نورو هېوادونو ته پکار ده چې وضعیت وارزوي او ورسره سم پر خپلو دریځونو یو وار بیا غور وکړي.
د ترکیې صدراعظم دغه راز وویل چې ترکیه په پام کې نه لري چې سوریې ته مځکني ځواکونه واستوي.
هغه وویل، ترکیې د امریکا له متحده ایالاتو سره موافقه کړې چې د هغو معتدلو یا منځ لارو وسله والو هوایي ملاتړ به کوي چې په سوریه کې د اسلامي دولت ډلې پر ضد جنګیږي.
د ترکیې جټ الوتکو د یکشنبې په ورځ پرله پسې دریمه ورځ د عراق په شمال کې د کوردستان د کارګرانو د ګوند PKK پر کمپونو بمباري وکړه.