افغان چارواکي نن په کمپ ډیویډ کې په دې نیت له امریکایي چارواکو سره ګوري چې له واشنګټن سره د دوه اړخیزو اړیکو یو نوی باب پرانیزي.
د ولسمشراشرف غني جګپوړي سلاکار داوود سلطانزوي ازادي راډيو ته د دې روابطو په اړه وویل:
″د افغانستان چارواکي دا هیله لري چې د امریکا او افغانستان ترمنځ د اړیکو نوې صفحه پرانیستل شي، یوه موده وه چې د افغانستان او امریکا رابطه د تیر حکومت په وخت کې سړه شوې وه.″
ټاکل شوې ده چې د امریکا د بهرنیوچارو وزارت نن په کمپ ډیويد کې د افغان ولسمشراشرف غني او اجرایي رییس عبداله عبداله کوربه وي.
د امریکا د بهرنیوچارو د وزارت د خبرپاڼې له مخې، دغه چارواکي به پر بېلابېلو امنیتي مسایلو، اقتصادي پراختیا او د افغانانو په مشرۍ د سولې پر هڅو خبرې وکړي.
د افغانستان ولسمشر او اجرایي رییس به بیا سبا د امریکا له ولسمشربارک اوباما سره وګوري.