په نايجريا کې اسلامي سخت دريځې ډلې بوکو حرام له اسلامي دولت ډلې سره خپل رسمي بيعت اعلان کړ.
ادعا کیږي چې د بوکو حرام د مشر ابوبکر شيکاو دا اعلان پرون په عربي ژبه کې له ليکل شوي انګريزي ژباړې سره د غږيز پيغام له لارې پر ټولنيزې رسنۍ (ټويټر) خپور شو.
په دې پيغام کې ويل شوي دي چې بوکو حرام به د اسلامي دولت سخت دريځې ډلې د مشر خبره اوروي او مني به يې. تر هغه وخته به د قدرت پر سر له مشرانو سره لانجه نه کوي چې که څوک ښکاره خيانت وکړي او په اړه يې د خدای له طرفه ثبوت موجود وي.
دا پيغام له هغه وروسته خپور شوی چې پرون د نايجريا په شمال ختيځ ښار مايدوګوري کې د څلور ځانمرګي بريدونو تور پر بوکو حرام پورې شو.