د افغانستان د کرکټ بورډ چارواکو هيله څرګنده کړې ده چې د افغانستان د کرکټ ملي ټيم به خپله درېيمه لوبه، چې له سکاټلېنډ سره ده، وګټي.
دا لوبه سبا پنجشنبې په نيوزيلېنډ کې کيږي.
د افغانستان د کرکټ ملي ټيم له دې مخکې د بنګله دېش او سريلانکا له ټيمونو سره لوبه کړې ده چې په دواړو لوبو کې يې ماتې خوړلې ده.
د افغانستان د کرکټ بورډ مطبوعاتي مسئول فريد هوتک له ازادۍ راډيو سره په خبرو کې ويلي، له دې سره چې افغان کرکټ ټيم د راتلونکو لوبو لپاره په بشپړه توګه تياری لري، له سکاټلېنډ سره د دې لوبې د ګټلو لپاره د افغان لوبغاړو د روحيې او مورال لوړول ډېر مهم کار دی.
د افغانستان د کرکټ ټيم له سکاټلېنډ سره د سبانۍ لوبې وروسته، د مارچ په څلورمه د استراليا له ټيم سره، د مارچ په اوومه د نیوزيلېنډ له ټیم سره او د مارچ په ديارلسمه د انګلينډ له ټيم سره سيالۍ لري.