عراقي صدراعظم، حيدر العبادي حکم کړی دی چې د دې هيواد په ښار بصره کې د درې سني ملايانو د وژلو او دوو نورو د ټپي کېدلو پلټنې دې وشي.
عبادي پرون د چټکو پلټنو او په دې پېښو کې د لاس درلودونکو د نيولو غوښتنه وکړه.
د پوليسو په وينا، د جنورۍ د لومړۍ نېټې حمله د څلورو وسله والو کسانو له خوا تر سره شوه چې د ملايانو پر موټر يې ډزې پيل کړې.
د دې پېښې مسووليت تر اوسه هيچا نه دی قبول کړی.
د پوليسو يوه چارواکي وويل چې د وژل شویو کسانو څخه يوه د اسلامي دولت سخت دريځې ډلې يا داعش د غړيو له خوا د مرګ ګواښونه هم تر لاسه کړي وو.