د پاکستان امنیتي ځواکونو هغه ایالتي وکیل د برمته نیونکو له منګولو خلاص کړ چې له یوې قبایلي سیمې یې تښتولی او شپږ میاشتې یې له ځان سره ساتلی و.
د پنجاب د واکمنې ایالتي اسامبلې د غړي راناجمیل حسن خان د ژغورنې لپاره عملیات پرون ( دوشنبې) ترسره شول.
نوموړی د مۍ په میاشت کې له خپلې میرمنې سره اسلام اباد ته په لاره سرګوده ښارګوټي ته نژدې وسله والو تښتولی و.
د خیبرپښتونخوا ایالت یوه لوړ پوړي چارواکي وویل، د ژغورنې عملیات په خیبر پښتونخوا کې ترسره شول خو په دې اړه یې نور جزیات ورنه کړل.
دغه چارواکي دغه رازپه دې اړه چې ایا د دغه وکیل د خلاصون لپاره برمته نیونکو ته پیسې ورکړل شوي او کنه؟ له خبرو کولو ډډه وکړه.