خان محمد "سیند"
د کونړ ولایت د قومي یووالي شورا د هېواد پر ټولو میشتو قومونوغږ وکړ؛ چې ملي یووالي ته دې هڅې زیاتې کړي.
دا شورا چې د چهارشنبې په ورځ په کابل کې جوړه شوې وه، د هېواد د مختلفو قومونو مشرانو او مخورو په کې ګډون کړی و.
په غوڼده کې د هزاره قوم ځینو مشرانو وویل، وروسته له دې باید هغو کسانو ته موقع ورنه کړاې شي؛ چې د خپلو شخصي ګټو په خاطر د هېواد وروڼه قومونه بیلوي او دښمنیو ته یې هڅوي.
د کونړ ولایت د قومي یووالي شورا په دې نظر ده؛ چې په هېواد کې د سولې او ترقۍ یوازینی لار د میشتو قومونو ترمنځ یووالی او ورورګلوي ده او په اوسنیو شرايطو کې یي ضرورت له بل هر وخت څخه زیات احساسیږي.
د دې شورا غونډه؛ چې د چهارشنبې په ورځ په کابل کې جوړه شوې وه؛ د مختلفو قومونو مشرانو او مخورو په کې ګډون کړې و.
په جوړې شوې غونډه کې د هزاره قوم یوه مشر او مخور«جنرال غلام حسین هزاره» وویل، په هېواد کې میشت قومونه سره وروڼه دي؛ خو ځیني ډلې او کسان هڅې کوي؛ چې دغه قومونه د خپلو شخصي ګټو په خاطر یو تربله په دښمنیو واړوي:
"د افغانستان خلک په غم او خوښی او هر ډول ستونزو کې سره شریک وو او دي، خو ځینو منفعت پرستو د دې قومونو له احساساتو ناوړه ګټه پورته کړې ده، نور باید دغه لوبه پای ته ورسیږي او قومونه سره یو شي."
د کونړ ولایت د قومي یووالي په غونډه کې یوه بل مخور پروفیسور اکبر اوریا وویل، قوم پالنې موږ د نړۍ له پرمختګونو پاتې کړي یو او وروسته له دې باید د ده په وینا له دې لیونتوبه ځانونه وژغورو:
"د خلکو زنځیرونه زموږ په غاړو کې پراته دي او موږ قومي جنګونو ته راکاږي یعنې څه؟
خدای ج وایي؛ تاسې مو له یو پلار او موره پیدا کړي یاست، قوم څه مانا لري.
قوم د پیژندګلوی لپاره دی، خو موږ د لیونیانو په څیر دې مسالې پورې نښتي یو او ټول دیني اصول مو تر پښو لاندې کړي دي."
د کونړ د قومي یووالي د شورا مشر ډاکتر فیاض صافي پر دولت غږ وکړ؛ چې په خپلو رغنده پالسیو او جدي پروګرامونو دې د قومي تعصبونو د خپریدو مخه ونیسي.
غونډې په پاې کې یو پریکړه لیک هم ترتیب کړی و؛ چې ښاغلي فیاض ولوست، د پریکړه لیک یوه برخه داسې وه:
"په هېواد کې د کړکېچونو او ناخوالو د راپورته کېدو په هر زماني مطقع کې د قانوني مجرا غوښتونکي یو.
هره ورځ په هېواد کې ځینو مسالې راپورته کېږي. د ولسونو او مدني ټولنو غوښتنه ده؛ چې دولت دې ورته د حل قانوني لارې ولټوي او د غیر قانوني کړنو مخه دې ونیسي.غیر قانوني کارونه موږ ته د منلو وړ نه دي."
د افغانستان عام خلک وایي، د دې هېواد قومونو د تاریخ په اوږدو کې د وروڼو په څیر یو د بل ترڅنګ اوسیدلی؛ خو په وروستیو لسیزو کې ځینو سیاستوالو هڅې کړي؛ چې په مختلفو بهانو د دې قومونو یووالی زیانمن او خپلې ګټې په کې ومومي.
کارپوهان وایي؛ افغان ولس ته پکار ده؛ چې هغه ارزښت قوي کړي؛ چې د ټول ملت ګټې په کې خوندي وي، نه د یو شخص یا یوې ډلې.