ولسمشر ویلادیمیر پوتین د خلیج د پاچایانو په څير مجلل ژوند لري

د روسیې د اپوزیسیون یوې ډلې په خپل تازه رپوټ کې ویلي، چې د دې هېواد ولسمشر ویلادیمیر پوتین د خلیج د پاچایانو په څير مجلل ژوند لري.

دا رپوټ د (ګالي د مریې ژوند ) په نوم خپور شوی دی.

ګالي د هغې کیشتۍ نوم وو، چې وسطايي پيړیو کې به مریې د یوې سیمې څخه بلې ته پکې لیږدول کیدل او ویلادیمیر پوتین یو مهال د روسیې د ولسمشر په توګه خپل ځان د دې بیړۍ له مریې سره سم کړی وو.

د اپوزیسیون غړو چې دا رپوټ یې لیکلی وايي چې د ولسمشر پوتین ژوند په تیرو ۱۲ کلونو کې ډیر بدل شوی او د ډيرو امتیازاتو خاوند دی.

رپوټ وايي، چې ولسمشر لس هاوو الوتکې او تیزرفتار موټر لري او دې مجلل ژوند د قدرت سره د هغه مینه د لیونتوب حد ته رسولې ده.