ولسمشر کرزی: نړېوال دې له افغانستان سره خپل ملاتړ ته دوام ورکړي

د توکیو په کنفرانس کې ولسمشر کرزي له ګډونوالو څخه وغوښتل چې د تحول په دوره کې له افغانستان څخه خپل ملاتړ ته دوام ورکړي.

په توکیو کې زموږ همکار ژوندی راپور راکوي

له توکیو نه د ازادۍ راډیو خبریال وویل، چې ولسمشر کرزي ټینګار وکړ چې د اداري فساد پر ضد به ټینګه مبارزه کوي او د نړېوالو د مرستې په هکله حساب ورکونه هم جدي نیول کیږي.

له دانش کړوخیل سره مرکه

له احمد زبیرژمند سره مرکه

ولسمشر کرزي د توکیو په کنفرانس کې ویلي، چې په افغانستان کې نا امني او په سیمه کې د تروریزم موجودیت مهمې ستونزې دي چې د بیارغونې او پرمختګونو مخه یې په دې هېواد کې ډب کړې ده.

په عین حال کې د ملګروملتونو سرمنشي بانکي مون وویل، چې له افغانستان څخه د ناټو ځواکونو له وتلو وروسته که په دې هېواد کې د مدني ټولنو ملاتړ ونشي په تیره یوه لسیزه کې لاس ته راوړنې به ضایع شي.

دغه راز د امریکا د بهرنیو چارو وزیرې هیلرې کلنټن په خپله وینا کې وویل، چې له افغانستان سره به د امریکا مرستې همداسې دوام وکړي او دې د جاپان د بهرنیو چارو د وزیر له قوله وویل، چې تر ۲۰۱۵ میلادي کاله پورې له افغانستان سره د شپاړلس ملیارده ډالرو د مرستې ژمنه شوې.

د افغانستان په اړه د توکیو کنفرانس د کابو اویا هېوادونو او نړېوالو سازمانونو د استازو په ګډون جوړ شوی، افغان حکومت تمه لري چې په دې کنفرانس کې د تحول په دوره کې هر کال له افغانستان سره په اقتصادي برخو کې د څلور میلیاردو ډالرو د مرستې ژمنه وشي.

د جاپان د بهرنیو چارو وزیر کوي چیرو ګیمبا هیله وښوده، چې ګډونوال به له افغانستان سره پخې ژمنې وکړې:

(زه هیله لرم چې په دې کنفرانس کې له هرې موسسې او هېواد څخه پخې ژمنې او د ملاتړ ډاډ ترلاسه کړو.)

ټاکل شوې ده، د توکیو د کنفرانس نتایج د ورځې په پای کې د افغانستان او جاپان د بهرنیو چارو د وزیرانو او د افغانستان د مالیې د وزیر له خوا په یوه خبري کنفرانس کې څرګند شي.