تازه خبر
چهارشنبه ۲۷ لړم ۱۴۰۵ کابل ۰۴:۳۰

افغانستان

د پاکستان پوځ: د کندهار والي له بهرنیو وسله‌والو سره لیدلي؛ طالبان‌یې ردوي

ارشیف، د کندهار لپاره د طالبانو حکومت والي، ملا شیرین
ارشیف، د کندهار لپاره د طالبانو حکومت والي، ملا شیرین

د طالبانو د کندهار د والي دفتر د پاکستان د پوځ هغه ادعاوې رد کړې چې ګواکې د دې ولایت والي ملا شیرین له بهرنیو وسله‌والو سره غونډه کړې وه.

د دې ولایت مقام د جعمې په ورځ د (تلې/ میزان ۱۰مه) په یوه خبرپاڼه کې وویل چې د پاکستان حکومت په دې ډول ادعاوو سره غواړي چې په افغانستان کې پر ملکي وګړو بریدونو ته توجیه پیدا کړي.

د پاکستان د پوځ ویاند احمد شریف چودري د پنجشنبې په ورځ په یوه خبري ناسته کې ادعا کړې وه چې د کندهار لپاره د طالبانو والي ملا شیرین د تحریک طالبان پاکستان، بلوڅو وسله‌والو او القاعده ډلې له یو شمېرو وسله‌والو سره غونډه کړې وه.

د چودري په ټکو، دا غونډه د روان کال د اګسټ په ۲۶مه جوړه شوې وه.

د پاکستان د پوځ د ویاند دا ادعاوې په داسې حال کې دي چې د پنجشنبې په ورځ پاکستان د افغانستان پر هلمند او کونړ ولایتونو هوايي بریدونه وکړل.

یوناما په دې بریدونو کې د ماشومانو په ګډون د لږترلږه ۱۰ کسانو وژل کېدل تأیید کړي دي.

بل پلو، د تېرې شنبې په ورځ د خیبرپښتونخوا په دېره اسماعیل خان کې د وسله‌والو په یو برید کې ۱۱ کسان وژل شوي او یو شمېر نور ټپیان شوي وو.

پاکستان ادعا کوي چې طالبانو د افغانستان دننه ترهګرو وسله‌والو ډلو ته خوندي پناه‌ځایونه ورکړي، خو طالبانو په ځلونو د پاکستان دا ادعا رد کړې او ویلي دي چې هېچا ته اجازه نه‌ورکوي چې د افغانستان خاوره د بل هېواد پر ضد وکارول شي.

د ورځې تازه خبرونه دلته ولولئ

نړیوال بانک: د افغانستان اقتصاد به روان کال  ۳ سلنه وده ولري خو د هر وګړي اقتصادي تولید به بیاهم کم وي

په واشنګتن کې د نړیوال بانک مرکزي دفتر
په واشنګتن کې د نړیوال بانک مرکزي دفتر

د نړیوال بانک تازه راپور له مخې، تمه کېږي چې د افغانستان اقتصاد به په ۲۰۲۶ کال کې د ښو کرنیزو حاصلاتو له امله ۳ سلنه وده وکړي.

خو راپور دا اټکل هم کوي چې د هر وګړي اقتصادي تولید به د نفوسو د ۶،۶ سلنې احتمالي زیاتوالي له امله ۳،۳ سلنه راکم شي چې دا به په تېرو درېیو پرله‌ پسې کلونو کې د هر وګړي د اقتصادي تولید درېیم کلنی کموالی وي.

راپور زیاتوي چې سره لدې چې سږني حاصلات ښه و خو بیاهم د روان ۲۰۲۶ کال په سپټمبر او اکتوبر میاشتو کې تخمینا ۱۵.۹ میلیونه کسان د خوړو له سختې ناامنۍ سره مخ وو.

راپور وړاندې وايي په داسې حال کې چې پاکستان سره سوداګریزې لارې تړل شوي دي د افغانستان شاوخوا ۹۷ سلنه واردات دمنځنۍ اسیا او ایران له لارو ترسره کیږي او صادرات دروان ۲۰۲۶ کال د اپریل او سپتمبر میاشتو ترمینځ موده کې نسبت تیرکال ته څه دپاسه ۱۵ سلنه راکم شوي دي.

راپور د ژوندانه د کچې د ښه والي لپاره څو لومړیتوبونه په ګوته کوي، چې پکې د سوداګرۍ لپاره د ډاډمنو لارو تامین، هغو ولایتونو کې د کاري فرصتونو پراخول چې ګڼ شمیر ستانه شوي کډوال په کې میشت شوي ، او د ښځو او نجونو په زده کړو او کار محدودیتونه لیرې کول ، شامل دي .

ملګرو ملتونو افغانستان ته ۴۸ میلیونه ډالره بېړنۍ بشري مرسته ځانګړې کړه

ارشیف، افغان کورنیو سره د ملګرو ملتونو له بشري مرستو د یوناما د مشرې، رباب فاطمې څارنه
ارشیف، افغان کورنیو سره د ملګرو ملتونو له بشري مرستو د یوناما د مشرې، رباب فاطمې څارنه

ملګرو ملتونو په افغانستان کې له شاوخوا ۸۲۴ زره اړو کسانو سره د بېړنیو بشري مرستو لپاره ۱۸ میلیونه ډالر ځانګړي کړي دي.

د ریلیف‌وېب د سې شنبې د ورځې د راپور له مخې، دغه بودجه د ملګرو ملتونو د بشري مرستو مشر ټام فلېچر منظور کړې، څو د ژمي له رارسېدو مخکې له هغو کورنیو سره مرسته وشي چې له بې‌وزلۍ، د خوراکي توکو له کمښت او نورو سختو شرایطو سره مخامخ دي.

دغه پیسې به د خوړو، روغتیا، تغذیې، سرپناه، پاکو اوبو او نورو اړینو خدماتو په برخو کې ولګول شي.

د ملګرو ملتونو د بشري مرستو همغږي کوونکي برونو لومارکي ویلي، دا مرستې به تر ټولو زیانګالو ټولنو ته ورسېږي، خو ټینګار یې کړی چې د مرستو په رسولو کې د ښځو په مشرۍ د بنسټونو ونډه هم اړینه ده.

د راپور له مخې، ملګرو ملتونو د افغانستان د بشري مرستو له صندوقه هم ۳۰ میلیونه ډالر ځانګړي کړي چې په دې سره د نویو مرستو ټولټال ۴۸ میلیونه ډالرو ته رسېږي.

دا اقدام داسې مهال کېږي چې د ملګرو ملتونو د اټکل له مخې، په ۲۰۲۶ کال کې په افغانستان کې شاوخوا ۲۱،۹ میلیونه کسان بشري مرستو ته اړتیا لري.

عدالت ته د جنګي جرمونو د افغان قربانیانو د نه‌رسېدو په اړه اندېښنې

ارشیف، تر درملنې لاندې هغه افغان ځوانان چې په ۲۰۱۵ کال کې په کندز کې د بې‌پولې ډاکترانو پر روغتون د امریکايي ځواکونو هوايي برید کې ټپيان شوي دي.
ارشیف، تر درملنې لاندې هغه افغان ځوانان چې په ۲۰۱۵ کال کې په کندز کې د بې‌پولې ډاکترانو پر روغتون د امریکايي ځواکونو هوايي برید کې ټپيان شوي دي.

د بشري حقونو څار سازمان (هیومن رایټس واچ) خبرداری ورکړی چې د جرمونو د نړیوالې محکمې (ای‌سي‌سي) وروستۍ پرېکړه ښايي په افغانستان کې عدالت ته د امریکايي ځواکونو او د پخواني افغان حکومت د ځواکونو د ادعا شویو جنګي جرمونو د قربانیانو لاسرسی محدود کړي.

دغه سازمان د سې شنبې په ورځ «د لړم په ۲۶مه» په خپله وېب‌پاڼه کې په یوه اعلامیه کې ویلي چې محکمې د نومبر په ۱۲مه، د څېړنو د نه‌پرمختګ له امله، د ۲۰۲۱ کال په اګسټ کې د طالبانو له بیا واکمنېدو مخکې د ترسره شویو جرمونو اړوند قضیه عملاً تړلې ده.

خو د محکمې د قاضیانو د پرېکړې له مخې، د طالبانو د ادعا شویو جرمونو په اړه جلا روانې څېړنې دوام لري.

د بشري حقونو څار سازمان د نړیوال عدالت مشرې لېز ایونسن ویلي، دا پرېکړه ښايي د امریکايي او پخوانیو افغان حکومتي ځواکونو د ادعا شویو جرمونو د حساب ورکولو پر وړاندې نور خنډونه رامنځته کړي.

د جرمونو د نړیوالې محکمې څارنوالۍ د نومبر په ۱۳مه د دې پرېکړې د استېناف او د پلي کېدو د ځنډولو غوښتنه کړې ده.

د بشري حقونو څار سازمان وايي، د افغانستان د اوږدې جګړې پر مهال د امریکايي ځواکونو، «سي‌ای‌اې»، پخوانیو افغان حکومتي ځواکونو، طالبانو او د اسلامي دولت ډلې یا داعش د خراسان څانګې له‌خوا د جنګي جرمونو او د بشریت ضد جرمونو ادعاوې مستندې شوې دي.

د زېمبابوې کرکټ لوبډلې د افغانستان پر وړاندې دوهمه ټېسټ لوبه وګټله

د افغانستان او زېمبابوې د کرکټ لوبډلو ترمنځ ټېسټ لوبه
د افغانستان او زېمبابوې د کرکټ لوبډلو ترمنځ ټېسټ لوبه

د زېمبابوې د کرکټ ملي لوبډلې د افغانستان پر وړاندې دوهمه او وروستۍ ټېسټ لوبه د ۵۷ منډو په توپیر وګټله.

دغه لوبه د سې ‌شنبې په ورځ «د لړم په ۲۶مه» د متحده عربي اماراتو په شارجه کې پای ته ورسېده.

زېمبابوې په لومړۍ پاڼۍ کې ۳۳۹ او په دوهمه کې ۲۹۵ منډې وکړې او افغانستان ته‌یې د ۴۱۸ منډو هدف وټاکه.

افغانستان په لومړۍ پاڼۍ کې ۲۱۷ او په دوهمه کې ۳۶۰ منډې وکړې او لوبه‌یې وبایلله.

د افغانستان په دوهمه پاڼۍ کې نصیر خان معروف‌خېل ۱۰۱ ناسوځېدلې منډې وکړې او افسر ځاځي ۸۷ منډې جوړې کړې.

نصیر خان معروف‌خېل د زېمبابوې په لومړۍ پاڼۍ کې د اوو لوبغاړو په سوځولو هم ځلېدلی و.

د افغانستان او زېمبابوې ترمنځ لومړۍ ټېسټ لوبه بې‌پایلې یا مساوي پای ته رسېدلې وه.

د سویس او ناروې سفیرانو د افغانستان لپاره د بریټانیا له ځانګړي استازي سره د افغانستان په اړه خبرې کړي

د روانې نوامبر میاشتې په ۱۶مه په اسلام اباد کې د ریچارډ لیندسي او د ناورې او سویس د سفیرانو د ناستې یوه څنډه
د روانې نوامبر میاشتې په ۱۶مه په اسلام اباد کې د ریچارډ لیندسي او د ناورې او سویس د سفیرانو د ناستې یوه څنډه

د سویس او ناروې سفیرانو د افغانستان لپاره د بریټانیا له ځانګړي استازي ریچارډ لیندسي سره په افغانستان او سیمه کې د روان وضعیت په اړه خبرې کړي دي.

د پاکستان په پلازمینه اسلام اباد کې د سویس سفارت پرون دوشنبې پر خپلې ایکس پاڼې لیکلي چې "په افغانستان کې ثبات د سیمې په ګټه دی".

وړاندې راغلي چې دې موخې ته رسیدل د سیمو هېوادونو او نړیوالې ټولنې ترمنځ همغږۍ او خبرو اترو ته اړتیا لري.

لیندسي پاکستان ته له سفر څه موده مخکې افغانستان ته تللی و.

د طالبانو حکومت پرون په یو بیان کې وویل چې لیندسي هڅه کوي د طالبانو او پاکستان ترمنځ شته اختلافات حل او خبرو اترو ته زمینه برابره کړي.

څه باندې یو کال کیږي چې د افغانستان او پاکستان ترمنځ ټولې سوداګریزې لارې تړل شوي او پاکستان وخت ناوخت د ختیځو ولایتونو سربیره پر جنوبي او مرکزي ولایتونو هوايي بریدونه کوي.

قطر او ترکیې څو ځلې هڅه وکړه چې د طالبانو د حکومت او پاکستان ترمنځ د سولې د خبرو منځګړیتوب وکړي.

اوچا: په افغانستان کې د بشري مرستو په رسونه کې لاسوهنو او نورو محدودیتونو پر دغه بهیر منفي اغیز کړی

د ملګروملتونو د بشري مرستو د همغږۍ دفتر اوچا وايي چې په افغانستان کې د بشري مرستو په رسونه کې لاسوهنو او نورو محدودیتونو پر دغه بهیر منفي اغیز کړی دی.

اوچا نن سه شنبې پر خپلې ایکس پاڼې لیکلي چې اړونده بنسټونو یې په تیره اکټوبر میاشت کې د بشري مرستو د رسونې پر بهیر د محدودیتونو ۲۹ قضیې ثبت کړي دي.

د اوچا په ټکو دا پېښې په سپټمبر میاشت کې ۳۰ قضیې وې.

اوچا په سپټمبر میاشت کې د افغانستان په لویدیځ کې د نژدې ۹۰ سلنه مرستندویه بنسټونو وضعیت ارزول وو چې دغو بنسټونو ښځو او نجونو ته د بشري مرستو د رسونې په برخه کې له ستونزو شکایتونه درلودل.

د طالبانو حکومت په څه باندې تیرو پنځو کلونو کې د یوناما په ګډون په ډیر شمیر دولتي او غیردولتي ادارو کې د ښځو پر کار بندیز لګولی دی.

دا بندیزونه په داسې حال کې دي چې د ملګروملتونو ادارو په افغانستان کې د خوړو د شدیدې ناامني خبرداری ورکړی دی.

د طالبانو مشر د کابل پوهنتون په هغه سیمینار کې ګډون وکړ چې د ده د فرمانونو اغیزو ته ځانګړی شوی و

د طالبانو مشر هبت الله اخندزاده
د طالبانو مشر هبت الله اخندزاده

د طالبانو مشر ملا هبت الله اخوندزاده د کابل پوهنتون په هغه سیمینار کې ګډون او وینا وکړه چې د ده د فرمانونو د اغیزو څیړلو ته ځانګړی شوی دی.

نوموړي په خپله وینا کې چې ځینې برخې یې د طالبانو ترواک لاندې ملی ټلویزیون خپرې کړي، د امیر په اطاعت او د تفرقې او اختلافاتو په لیرې والې ټینګار کړی دی.

دا په داسې حال کې ده چې ملګرو ملتونو او نړیوالو بشري ادارو ویلي چې د هبت الله اخوندزاده شاوخوا سلو فرمانونو د نجونو او ښځو حقونه نقض یا محدود کړي دي.

د جرمونو نړیوالې محکمې د همدغو فرمانونو له امله د طالبانو د مشر ملا هبت الله اخوندزاده او د کابینې د درېو غړو د نیولو حکم صادر کړی دی.

د طالبانو د حکومت ویاند ذبیح الله مجاهد وایي چې دوی په دې نوم کومه محکمه په رسمیت نه پیژني او پریکړو ته یې هم ارزښت نه ورکوي.

دغې محکمې بیا د روانې لړم میاشتې په ۲۱مه وویل چې د افغانستان په اړه د خپلو څیړنو یوه برخه چې ممکنه وه د امریکایي پوځیانو اړوند وي درولې او د طالبانو د جرمونو پر څیړنه یې محدوده کړې ده.

اوچا: افغانستان کې نږدې ۱۰ میلیونه کسانو ته بشري مرستې رسول شوي

ارشیف، افغان کورنیو سره بشري مرستې
ارشیف، افغان کورنیو سره بشري مرستې

د ملګرو ملتونو د بشري مرستو د همغږۍ اداره ( اوچا) وايي د روان میلادي کال په لومړیو نهو میاشتو کې افغانستان کې شاوخوا نهه میلونه او نهه سوه زرو کسانو بشري مرستې ترلاسه کړي دي.

اوچا د دوشنبې په ورځ د لړم په ۲۵ مه په خپله ایکسپاڼه د رپوټ په خپرولو سره وویل چې څه دپاسه ۵ ملیونو کسانو د خوړو او کرنې، څلورنیم ملیونو کسانو د روغتیایې خدماتو، درې نیم ملیونو کسانو د ملاتړ او ساتنې،او درې ملیونو کسانو د تغذیې په برخه کې مرستې ترلاسه کړي دي.

د ملګرو ملتونو دغه اداره په داسې حال کې چې د مرستو د دوام خبره کوي د اړمنو خلکو د زیاتیدونکو اړتیاو د پوره کولو لپاره د منابعو د کموالي خبرداری هم ورکوي.

اوچا وايي په روان ۲۰۲۶ کال کې په افغانستان کې ۲۱ ملیونه او نهه سوه زره کسان بشري مرستو ته اړتیا لري.

افغان کرکټ ټیم له زېمبابوې سره ټېسټ لوبه کې د ماتې له خطر سره مخامخ دی

د افغانستان او زېمبابوې ترمنځ ټېسټ لوبه
د افغانستان او زېمبابوې ترمنځ ټېسټ لوبه

د افغانستان د کرکټ ملي ټیم د زېمبابوې په وړاندې دوهمه ټېسټ لوبه کې د ماتې له خطر سره مخامخ دی.

د افغانستان ټیم د دوشنبې په ورځ په شارجه کې د دغې سیالۍ په څلورمه ورځ، په داسې حال کې چې ۵ لوبغاړي یې له لاسه ورکړل، ۱۴۳ منډې وکړې.

د زېمبابوي ټیم افغانستان ته ۴۱۸ منډې هدف ټاکلی دی.

په داسې حال کې چې د افغانستان ټیم سې شنبه، د سیالۍ په پنځمه ورځ ۲۷۵ منډو ته اړتیا لري، خو زېمبابوې د بري لپاره باید د افغانستان د ټیم پاتې ۵ لوبغاړي له لوبې خارج کړي.

په روانه سیالۍ کې د افغانستان او زېمبابوې ترمنځ لومړۍ ټېسټ لوبه په مساوي توګه پای ته رسېدلې ده.

پنځه اروپايي هېوادونه په روانډا کې د ډیپورټي کډوالو لپاره یو مرکز جوړوي

د پولنډ او بلاروس سرحد کې کډوال
د پولنډ او بلاروس سرحد کې کډوال

جرمني، ډنمارک، اتریش،هالنډ او یونان قصد لري هغه پناه غوښتونکي چې دوسیې یې رد شوي روانډا کې یوه مرکز ته ولیږي.

د دغو هېوادونو د کورنیو چارو وزیران د دوشنبې په اتریش کې غونډه لري او خپله پریکړه به هم اعلان کړي.

که څه هم د افغان اتباعو نوم نه دی اخیستل شوی خو د پناه غوښتنې په نه منل کېدو سره افغان کډوال هم په دې پالیسي کې شاملیږي.

جرمني کې ګڼ افغان کډوال د ډيپورټ له خطر سره مخ دي او وار دمخه هم دغه هېواد لسګونه افغانان ایستلي دي.

نور راوښيه

XS
SM
MD
LG