په تهران کې د تیلو څو لویو چاڼځایونو او زیرمو اور اخیستی دی (ژوندی بلاګ)

د امریکا ولسمشر ډونالډټرمپ د ایران اسلامي جمهوریت پاتې شویو چارواکو ته خبرداری ورکړ چې پر امریکا د ځوابي ضربې له وهلو ډډه وکړي.

ښاغلي ټرمپ نن سهار وختي پر خپله ټولنیزه شبکه ټروت سوشل ولیکل، ایران اوس اعلان کړی چې غواړي موږ ته تر پخوانیو هغو سخته ضربه راکړي خو ده خبرداری ورکړ چې دا کار دې نه کوي ځکه که داسې وشي نو داسې سخته ضربه به ورکړل شي چې تراوسه به یې نه وي لیدلې.

د ایران حکومت د شنبې ورځې په ماښام له څو ساعته ځنډ وروسته تایید کړه چې لوی مذهبي مشر آیت الله علي خامنه يي د متحدوایالتونو او اسراییلو د حملو په لومړۍ څپه کې وژل شوی دی.

د آزادۍ راډیو د ایران د څانګې راډیو فردا د راپور له مخې د خامنه يي له وژل کېدو وروسته د ایران د پارلمان مشر محمدباقر قالیباف او د ملي امنیت د عالي شورا منشي علي لاریجاني امریکا ته د خبرداري جلا پیغامونه ورکړل.

لاریجاني له دولتي ټلویزیون سره په خبرو کې په سیمه کې د امریکا پوځي اډو ته ګواښ وکړ او ویې ویل چې امریکا او صهیونیستي رژیم [اسراییل] د ایران د ملت زړه ته اور واچاوه او ایران به هم د هغوی زړه وسوځوي. نوموړي زیاته کړه چې د ایران وسله وال ځواکونه ژمن دي چې دې بهیر ته به دوام ورکوي.

همداراز قالیباف وویل چې ایران ټولو سناریوګانو ته چمتو دی او حتی د امام خامنه یي له مړینې د وروسته دورې لپاره هم پلانونه چمتو شوي دي.

د پاکستان په کراچۍ ښار کې نن یکشنبې (د کب ۱۰مه) د امریکا پر قونسلګرۍ د سلګونه قهرجنو معترضانو د برید پرمهال لږترلږه ۹ کسان وژل شوي دي.

پولیسو د دې کسانو وژل کېدل تایید کړي خو د پېښې د څرنګوالي په اړه یې څه نه دي ویلي. د پېښې د قربانیانو هویت هم نه دی معلوم.

د رویټرز خبري آژانس د راپور له مخې د امریکا قونسلګرۍ تراوسه په رسمي ډول په دې اړه څه نه دي ویلي خو یوه ډيپلومات ویلي چې دوی خوندي دي.

د آزادۍ راډیو د مشال څانګې د راپور له مخې نهه کسان وروسته له هغه ووژل شول چې له امنیتي ځواکونو سره د امامیه مذهبي تعلیمي مرکز د زده کوونکو د نښتې راپورونه ورکړل شول.

د فرانسپرس خبري آژانس د خبر له مخې پولیسو د معترضانو د تیت و پرک کولو لپاره له اوښکې بهوونکي ګاز څخه کار واخیست.

د پاکستان له نورو برخو څخه هم د ورته اعتراضونو راپورونه رارسېدلې دي.

فرانسپرس همداراز خبر ورکوي چې د هند تر ولکې لاندې کشمیر کې هم زرګونه مسلمانانو نن د امریکا د برید او د خامنه يي د وژل کېدو په غبرګون کې اعتراض وکړ. معترضان د کشمیر په مرکز سرینګر کې راټول شول او د امریکا او اسراییل پرضد شعارونه یې ورکړل.

د کراچۍ برعکس د کشمیر اعتراضونه سوله ایز و.