تازه خبر
سه شنبه ۲۶ لړم ۱۴۰۵ کابل ۰۴:۴۹

خبرونه

د کرکټ نړیوالې شورا د افغان ښځینه لوبغاړو لپاره نوې طرحه جوړه کړې

د کرکټ نړیوالې شورا (ICC) د افغانستان د جلاوطنه ښځینه کرکټ ‌لوبغاړو د ملاتړ لپاره یوه نوې طرحه اعلان کړه، چې دا د هغو لوبغاړو لپاره یو مهم ګام بلل کېږي چې د طالبانو تر واکمنۍ لاندې له خپلې لوبې څخه بې‌برخې شوې دي.

له ۲۰۲۱ کال څخه چې طالبان بیا واک ته رسېدلي، په سپورتي فعالیتونو کې د ښځو پر ګډون بندیز لګول شوی، او دې بندیز د کرکټ د هغو ښځینه لوبغاړو هیلې ناڅاپه مړاوې کړې چې د طالبانو تر واک ته رسیدو یوازې څو میاشتې وړاندې یې د افغانستان له کرکټ بورډ سره قراردادونه لاسلیک کړي وو. ډېری لوبغاړې له هېواده وتښتېدې؛ ځینې یې اوس په اسټرالیا کې مېشتې دي، او نورې بیا په اروپا، منځني ختیځ، او شمالي امریکا کې خپرې شوې دي.

د روان کال په لومړیو کې، یو شمېر جلاوطنه افغان لوبغاړو د استرالیا په ملبرن ښار کې د "Cricket Without Borders" لوبډلې پر وړاندې یوه سمبولیکه لوبه وکړه.

د آی سي سي د راپور له مخې، چې پرون یې پر خپله ویبپاڼه خپور کړی، د جلاوطنه افغان لوبډلې کیپتانې ناهیده څپاند د کرکټ د نړیوالې شورا نوې طرحه له هیجانه ډکه وبلله، او ویې ویل:

«موږ له کلونو وروسته په لومړي ځل دا احساس کوو چې لیدل کېږو. دا یوازې د کرکټ په اړه نه ده، دا زموږ د هویت د بېرته اخیستو په اړه ده.»

یوې بلې لوبغاړې، شبنم احسن، وویل چې له ۲۰۲۱ کال را په دې خوا دا لومړی ځل دی چې بېرته پر کرکټ تمرکز کوي — هغه احساس چې له ډېر وخته ورسره نه و.

د نړیوال کرکټ شورا هڅه کوي چې د یوې پراخې طرحې په وسیله د افغان ښځینه لوبغاړو ملاتړ وکړي.

د ورځې تازه خبرونه دلته ولولئ

پنځه اروپايي هېوادونه په روانډا کې د ډیپورټي کډوالو لپاره یو مرکز جوړوي

د پولنډ او بلاروس سرحد کې کډوال
د پولنډ او بلاروس سرحد کې کډوال

جرمني، ډنمارک، اتریش،هالنډ او یونان قصد لري هغه پناه غوښتونکي چې دوسیې یې رد شوي روانډا کې یوه مرکز ته ولیږي.

د دغو هېوادونو د کورنیو چارو وزیران د دوشنبې په اتریش کې غونډه لري او خپله پریکړه به هم اعلان کړي.

که څه هم د افغان اتباعو نوم نه دی اخیستل شوی خو د پناه غوښتنې په نه منل کېدو سره افغان کډوال هم په دې پالیسي کې شاملیږي.

جرمني کې ګڼ افغان کډوال د ډيپورټ له خطر سره مخ دي او وار دمخه هم دغه هېواد لسګونه افغانان ایستلي دي.

د طالبانو حکومت تایید کړه چې دوی په کندهار کې راډیوګانې د کرکټ له خپرونو منع کړي

د افغانستان د کرکټ ملي لوبغاړي
د افغانستان د کرکټ ملي لوبغاړي

د طالبانو حکومت په کندهار کې په راډیوګانو باندې د کرکټ د خپرونو بندیز تایید کړ.

د طالبانو د حکومت یوې معتبرې سرچینې نن دوشنبه ازادي راډیو ته ومنله چې په کندهار کې په راډیوګانو دا بندیز لګېدلی.

په کندهار کې د لږ تر لږه دریو راډیوګانو مسوولینو او یوه خبریال ازادي راډیو ته دا بندیز تایید کړ او ویلي یې دي چې په شفاهي ډول دوی ته امر شوی چې د کرکټ د هر ډول خبرونو، تبصرو او راپورونو له خپرولو ډډه وکړي.

د امریکا یوه لویه جنګي بیړۍ «یو اس اس تیودور روزولت» د منځني ختیځ سیمې ته ننوتلې

عرب سمندرګي کې د امریکا لویه جنګي بیړۍ یو اس اس روزولت
عرب سمندرګي کې د امریکا لویه جنګي بیړۍ یو اس اس روزولت

دا په منځني ختیځ کې د امریکا دریمه لویه الوتکې وړونکې جنګي بیړۍ ده او د امریکا د پوځ مرکزي قومندانۍ سنټکام په چوکاټ کې به فعالیت کوي.

امریکا په ټوله کې د ایران د سمندري محاصرې لپاره لږ تر لږه شل لویې او وړې بیړۍ په منځني ختیځ کې ځای پر ځای کړي.

د امریکا دا لویه جنګي بیړۍ تر هغه وروسته منځني ختیځ ته تللې چې د امریکا ولسمشر ډونالډ ټرمپ ویلي د ایران ګاونډیان غوره ګڼي چې د بریدونو پر ځای د دغه هېواد سمندري محاصره دوام پیدا کړي.

د امریکا او ایران خبرې لا هم په یو نامعلوم حالت کې دي او دواړه لوري یو بل ته خبرداری ورکوي.

د امریکا د کانګرس لسګونه غړي د افغانانو د موقتي خوندیتوب د وضعیت د مقررې تصویب غواړي

د امریکا کانګرس ماڼۍ
د امریکا کانګرس ماڼۍ

د امریکا د استازیو جرګې غړی سم لیکاردو وايي د «طالبانو تر کنټرول» لاندې افغانستان ته د یو شمېر افغانانو د بېرته ستنولو د مخنیوي لپاره یې یو غوښتنلیک یا پټیشن وړاندې کړی.

هغه ویلي د دغه غوښتنلیک هدف د موقتي خوندیتوب د وضعیت یا TPS پر مقررې رایګیري ده.

ښاغلي لیکاردو په خپله ایکس پاڼه تېره شپه بیان خپور کړی او ویلي یې دي چې تر دې دمه د دواړو ګوندونو لږ تر لږه ۱۱۴ استازیو دا غوښتلیک لاسلیک کړی او د ۲۱۸ استازیو د موافقې تر جلب پورې به خپلو هڅو ته دوام ورکړي.

هغه ټینګار کړی چې امریکا باید له هغو افغانانو سره چې زموږ د عسکرو تر څنګ یې خپل ژوند په خطر کې اچولی په خپله ژمنه ودریږي.

د راپورونو له مخې د امریکا حکومت پلان درلود چې لږ تر لږه ۱۵۰ افغانان چې د پناه غوښتنې دوسیې یې نه دي منل شوي د پاکستان له لارې افغانستان ته ډيپورټ کړي خو وروسته د دوی د استولو پلان وځنډېد.

عباس عراقچي له ملا ناصر اخوند سره لیدلي؛ د افغانستان او ایران تر منځ د ګمرکي چارو او د همکاریو پر پراختیا بحث شوی

د ایران د بهرنیو چارو وزیر عباس عراقچي تهران کې د طالبانو له مالیې وزیر ملا محمد ناصر اخوند سره په لیدنه کې
د ایران د بهرنیو چارو وزیر عباس عراقچي تهران کې د طالبانو له مالیې وزیر ملا محمد ناصر اخوند سره په لیدنه کې

د طالبانو د حکومت د مالیې وزیر ملا محمد ناصر اخوند د یکشنبې په ورځ د ایران د بهرنیو چارو له سیدعباس عراقچي سره لیدلي او په دوه اړخیزو مسایلو یې بحث کړی.

د طالبانو مالیې وزارت او د ایران د بهرنیو چارو وزارت د دې لیدنې په تړاو اعلامیې خپرې کړي.

په بیان کې راغلي چې ملا محمد ناصر اخوند او عباس عراقچي د اقتصادی کمیسیون د راتلونکې غونډې پر جوړېدو، د ابونصرفراهي ګمرکي سرحدي تاسیساتو په پراختیا، د ګمرکونو په ۲۴ساعته فعالیتونو او د بندرونو د ظرفیتونو په لوړولو خبرې او سلامشورې وکړې.

د عراقچي په حواله راغلي چې هېواد یې په افغانستان کې د مخدره توکو په وړاندې مبارزه ستايي او له خپل لور یې په اقتصادي او سیاسي برخه کې د پوره همکاریو ډاډ ورکړ.

د طالبانو مالیې وزیر ایران ته په سفر کې د دغه هېواد د کرنې له وزیر غلامرضا نوري قزلجه سره هم لیدلي او کرنې، مالدارۍ او اوبو لګولو پر سیستمونو یې خبرې کړي.

د ایران سپاه ځواکونو ادعا کړې چې یوه لویه تېل وړونکې بیړۍ له ماین سره لګېدلې او ډوبه شوې

د یوې تېل وړونکې بیړۍ عکس چې سپاه خپور کړی
د یوې تېل وړونکې بیړۍ عکس چې سپاه خپور کړی

د ایران سپاه پاسداران ادعا کړې چې یوه لویه تېل وړونکې بېړۍ د یکشنبې په ورځ په فارس خلیج کې د سمندري مین په چاودنه کې ډوبه شوې ده.

په دې بیړۍ کې ۲ میلیونه بېرله/بوشکې تېل بار وو.

سپاه پاسداران په خپله اعلامیه کې ویلي دا بیړۍ له هرمز تنګي د تېرېدو پر مهال په سمندري ماین لګېدلې او تر چاودنې وروسته یې اور اخیستی دی.

هېڅ خپلواکې سرچینې د سپاه دا ادعا لا نه ده تایید کړې.

تر اوسه پورې دا هم نه ده روښانه چې دا لویه کښتۍ کومې خواته روانه وه.
د امریکا پوځ بیا په کراتو ویلي چې د کښتیو د عبور له ټولو اصلي لارو څخه یې سمندري ماینونه پاک کړي.

د امریکا د پوځ مرکزي قومنداني سنټکام چې په سیمه کې د امریکا پر پوځي عملیاتو څارنه لري، له هرمز تنګي د تېرېدونکو کښتیو امنیت نیسي.

د شنبې په ورځ سنټکام ویلي و چې د دوی په ملاتړ سره له هرمز تنګي نه یو میلیارد او ۷۰۰ میلیونه بېرله اومه تېل انتقال شول.

د ترکیې پولیسو ۳۵ افغانان چې غوښتل یې د اوبو له لارې یونان ته ولاړ شي نیولي دي

د کډوالو یوه ربړي بېړۍ اژه سمندرګي کې
د کډوالو یوه ربړي بېړۍ اژه سمندرګي کې

د ترکیې امنیتي ځواکونو ۳۵ افغانان چې غوښتل یې د اوبو له لارې یونان ته ولاړ شي نیولي دي.

ترکي رسنیو پرون خبر ورکړی چې دا کسان د شمال لویدیځ ښار بالي قصر د پولیسو له خوا نیول شوي او د ناقانونه کډوالو د ساتنې مرکز ته انتقال شوي.

د دوی د قاچاق په تور هم لږ تر لږه ۴ کسان د محکمې د حکم له خوا زندان ته وړل شوي.

تېره اوونۍ لږ تر لږه ۶۳ افغان کډوال چې له ایران ترکیې ته اوښتي و په حکاري ولایت کې نیول شوي وو.

د ترکیې چارواکو ویلي چې په اوبو او وچه کې یې د ناقانونه کډوالو د مخنیوي لپاره عملیات جاري ساتلي.

افغان کډوال اکثر له ایران څخه ترکیې ته په ناقانونه توګه اوړي او بیا له هغه ځایه د اوبو یا وچې له لارې اروپا ته ځي.

د ترکیې د کورنیو چارو وزارت ویلي چې د داسې ناقانونه کډوالیو په شمېر کې له کمښت سره سره لا هم خطرناکې لارې د خلکو ژوند اخلي او په ۲۰۲۶ کال کې تر اګست پورې لږ تر لږه ۴۶ کډوال په اوبو کې مړه شوي.

طالبانو په کندهار کې راډیوګانې د کرکټ اړوند خپرونو څخه منع کړي

راشدخان د هند په وړاندې په یوه لوبه کې
راشدخان د هند په وړاندې په یوه لوبه کې

د طالبانو حکومت په کندهار کې سیمه ییزې راډیوګانې د کرکټ اړوند خپرونو څخه منع کړي دي.

د فرانسې خبري اژانس د دوو راډیوګانو د مسوولینو او د یوې ولایتي منبع په اساس د یکشنبې په ورځ دا خبر ورکړی.

یوې ولایتي سرچینې چې نوم یې د موضوع د حساسیت په خاطر نه دی اخیستی د کرکټ خبري پوښښ د بندیز تایید کړی او ویلي یې دي چې : «دواړه تبصرې او خبري پوښښ او ان د بریا د خبرونو خپرول هم بند دي»

د لږ تر لږه دوو راډیوګانو مسوولینو هم چې د امنیتي دلایلو په خاطر نوم نه اخلي تایید کړې چې د اطلاعاتو ریاست ورته امر کړی چې نور د کرکټ اړوند خبرونه او راپورونه نه شي خپرولی.

د طالبانو حکومت لا رسماً د کرکټ یا نورو ورزشونو په خبري پوښښ بندیز نه دی لګولی او په کندهار کې یې د دې وروستي تحول په اړه هم تبصره نه ده کړې.

خو پخوا تر دې په ځینو راپورونو کې راغلي چې لږ تر لږه په کندهار کې د طالبانو ځواکونو ته ویل شوي چې د کرکټ له کتلو ډډه وکړي.

امریکايي رسنۍ: ټرمپ اوس‌مهال نه غواړي پر ایران بیا برید وکړي

رویټرز خبري اژانس د دریو خبرو سرچینو په قول راپور ورکړی چې د امریکا ولسمشر ډونالډ ټرمپ په دې وروستیو ورځو کې خپلو جګپوړو سلاکارانو ته ویلي، که د ایران حکومت یا په یمن کې د ایران په ملاتړ حوثي وسله‌وال کوم نوی پاروونکی اقدام ونه کړي، ښايي امریکا پر ایران له بیا برید کولو ډډه وکړي.

د دغه راپور له مخې چې د شنبې په ورځ، د لړم په ۲۳مه خپور شوی، ټرمپ د ملي امنیت له سلاکارانو سره په غونډو کې او د استخباراتي راپورونو له ترلاسه کولو وروسته د نویو بریدونو نه کولو موضوع مطرح کړې ده.

خو د امریکا د اوسنیو او پخوانیو چارواکو په وینا، ټرمپ لا هم له ایران سره د جګړې د پای ته رسولو په اړه وروستۍ پرېکړه نه ده کړې.

واشنګټن پوسټ ورځپاڼې هم د جمعې په ورځ په یوه جلا راپور کې د یوه امریکايي چارواکي په قول لیکلي چې ټرمپ اوس‌مهال د پراخې جګړې بیا پیلولو ته لېوالتیا نه لري.

د ورځپاڼې د راپور له مخې، د امریکا حکومت په پام کې لري چې اوسنی وضعیت وساتي؛ یعنې د ایران سمندري کلابندي او اقتصادي بندیزونه روان وي، خو جګړه بیا پیل نه شي او د وروستۍ هوکړې لپاره هم بیړه ونه کړي.

دا په داسې حال کې ده چې د ایران د اسلامي جمهوریت چارواکو په وروستیو اوونیو کې څو ځله ټینګار کړی چې هېواد یې باید د «نه جګړې او نه سولې» له اوسني حالت څخه ووځي.

په بدخشان کې د واورې ښویېدنې له امله د سرو زرو کان دوه کارګر مړه شوي دي

ځايي رسنۍ راپور ورکوي چې د افغانستان په شمال ختیځ ولایت بدخشان کې د واورې د ښویېدو له امله د سرو زرو کان دوه کارګر مړه شوي او شپږ نور ټپیان دي.

د راپور له مخې، دا پېښه د شنبې په ورځ د ارغنج‌خواه ولسوالۍ په اندراب سیمه کې هغه مهال شوې چې یو شمېر کارګرانو د سرو زرو په یوه کان کې کار کاوه.

د کارګرانو مړي او ټپیان د پوځي هیلي کوپتر په وسیله د بدخشان مرکز فیض‌اباد ښار ته لېږدول شوي دي.

په افغانستان کې دا ډول پېښې عموماً د کانونو د خوندیتوب د کمزورو معیارونو او د اړوندو مقرراتو د نه رعایتولو له کبله کېږي.

نور راوښيه

XS
SM
MD
LG