د لاسرسۍ وړ لېنکونه

تازه خبر
یکشنبه ۲۴ وری ۱۴۰۴ کابل ۰۱:۳۶

خبرونه

نن د کرکټ په اتلانو جام کې هندوستان او اسټرالیا نیمه پایلوبه ترسره کوي

نن د کرکټ په اتلانو جام کې هندوستان او اسټرالیا نیمه پایلوبه ترسره کوي.

دا لوبه په دوبۍ کې په ځايي وخت د غرمې په یوه بجه پیلیږي.

د کرکټ په اتلانو جام کې هندوستان له خپل ګروپه ټول شامل ټیمونه نیوزیلند، بنګله دیش او پاکستان مات کړي او نیمه پایلوبې ته وتلی.

اسټرالیا هم چې له افغانستان سره په یوه ګروپ کې وه له انګلستان او جنوبي افریقا لوبې ګټلي او له افغانستان سره یې لوبه د باران په سبب مساوي شوې وه.

د کرکټ په اتلانو جام کې دویمه نیمه پایلوبه سبا د پاکستان په لاهور کې د نیوزیلند او جنوبي افریقا تر منځ کېږي.

د ورځې تازه خبرونه دلته ولولئ

اسراییل غزه کې د عملیاتو د پراخوالي خبرداری ورکړی، له خلکو یې د تخلیې غوښتنه کړې

د اسراییل جګړه کې ویجاړه شوې غزه، ارشیف
د اسراییل جګړه کې ویجاړه شوې غزه، ارشیف

د اسراییل د دفاع وزیر اسراییل کتز په غزه کې د خپلو پوځي عملیاتو د پراختیا خبرداری ورکړی دی.

کتز په یوه خبرپاڼه کې دغه خبرداری پرون شنبه وروسته له هغه ورکړ چې غزه کې يې پر یوه امنیتي دهلیز ولکه ټینګه کړه.

د فرانس پریس په وینا په دغې خبرپاڼه کې د غزې د خان یونس او شاوخوا سیمو له لسګونه زره اوسیدونکو غوښتل شوي چې خپلې مېنې تخلیه کړي.

د اسراییل د دفاع وزیر یوځل بیا د فلسطیني ډلې حماس د له منځه وړلو او د هغوی له منګولو د ټولو اسراییلي برمته شویو د خلاصون غوښتنه کړې ده.

اسراییل دغه خبرداری داسې وخت ورکوي چې حماس وسله والې ډلې، چې امریکا او اوروپایي ټولنه یې ترهګر بولي، ویلي چې دوی د اوربند په هوکړه کې پرمختګ کړی دی.

د ایران د شمالي خرسان او د افغانستان د فرا ولایت ترمنځ سړک جوړیږي

له نیمروزه د ایران پولې ته غځیدلی سړک، ارشیف
له نیمروزه د ایران پولې ته غځیدلی سړک، ارشیف

په کابل کې د ایران سفیر علي رضا بیکدلي وایي، د ایران او افغانستان ترمنځ د ماهیرود په نوم سرحدي سړک د رغولو چارې به سږ کال بشپړې شي.

په کابل کې د ایران سفارت پرون شنبه پر خپله ایکس پاڼه ولیکل چې د ایران یوه اقتصادي پلاوي د دغه سړک کار له نژدې کتلی دی.

یاد سړک د ایران د شمالي خراسان ولایت ماهیرود سیمه د فرا له ولایت سره نښلوي.

د ایران سفیر ویلي، د دغې لارې په جوړېدو به د افغانستان او ایران سوداګریزې اړیکې لا پياوړې شي.

تر دې یوه ورځ مخکې د ایران د بهرنیو چارو وزارت مرستیال رسول مهاجر د یوه پلاوي په مشرۍ فرا ولایت ته تللی و او هلته یې د طالبانو له والي سره د دواړو هېوادونو د اقتصادي او سوداګریزو اړیکو پر پراختیا خبرې کړې وې.
ایران د سیمې د هغو هېوادونو له ډلې دی چې طالبانو سره غیر رسمي تعامل لري او طالبان هم ایران خپل ستراتیژیک ګاونډی بولي.

۱۳ تنه په عام محضر کې په درو ووهل شول

انځور پخوانی دی
انځور پخوانی دی

طالبانو نن دیارلس کسان د پنځو ښځو په ګډون په خوست او جوزجان کې په درو وهلي دي.

د طالبانو سترې محکمې نن خبر ورکړ چې دا کسان د نامشروع اړیکو، له کور څخه د تېښتې او دې ته ورته جرمونو له مخې هر یو له پنځه دیرشو تر نهه دیرش درو وهل شوي او له دوو تر پنځو کلونو په بند محکوم شوي دي.

د تیرو دریو کلونو په ترڅ کې طالبانو اووه سوه اته نوي تنه د یوسل او څلویښت ښځو په شمول په افغانستان کې په درو وهلي دي.

ملګروملتونو، د بشري حقونو ډلو او د نړۍ بېلابېلو هیوادونو په پرله پسې ډول له طالبانو غوښتي چې دا بهیر ودروي.

د امریکا او ایران خبرې پیل شوې

د ایران د بهرنیو چارو وزیر عباس عراقچي - د امریکا ځانګړی استازی سټیف ویټکوف
د ایران د بهرنیو چارو وزیر عباس عراقچي - د امریکا ځانګړی استازی سټیف ویټکوف

د ایران او د امریکا د متحد ایالتونو استازیو نن په عمان کې په لوړه کچه خبرې پيل کړې دي.

د دې خبرو هدف د تهران اټومي پروګرام دی چې د چټک پرمختګ په حال کې دی.

د امریکا د متحد ایالتونو ولسمشر ډونالډ ټرمپ وار له مخه خبرداری ورکړی دی، که چیرته کومه موافقه ونه شي، نو پوځي اقدام به وکړي.

د ایران د بهرنیو چارو وزیر عباس عراقچي د ایراني پلاوي مشري کوي او د امریکا د متحد ایالتونو له لورې د خبرو مشري د ولسممر ټرمپ د منځني ختیځ استازی سټیف ویټکوف کوي.

ټرمپ څو ساعته کلني طبي معاینات وکړل

د امریکا ولسمشر ډونالډ ټرمپ
د امریکا ولسمشر ډونالډ ټرمپ

د امریکا ولسمشر ډونالډ ټرمپ وویل سپینې ماڼۍ ته یې له ستنیدو وروسته لومړي روغتیایي معاینات وکړل او ډير ښه احساس کوي.

د اته اویا کلن ټرمپ طبي معاینات د جمعې په ورځ( د اپریل ۱۱ مه) د واشنګتن په والټر ریډ طبي مرکز کې وشول، چې تمرکز یې پر زړه او ادراکي ازموینو وو.

تر معایناتو وروسته ولسمشر ټرمپ خبریالانو ته وویل چې ده د ادارکي معاینې په وخت هر ځواب مثبت ترلاسه کړ او د ده یوازې زړه روغ نه دی، روح یې هم ارامه ده.

ولسمشر ټرمپ بیا وویل چې د دې معایناتو بشپړ راپور به تمه ده چې سبا یکشنبه خپور شي.

د امریکا ولسمشران په دودیز ډول د خپلې روغتیا او سلامتیا په اړه ولس ته توضیحات ورکوي، که څه هم دوی مجبوره نه دي چې دا کار وکړي.

ریچارډ بینټ؛ مجرمینو ته علني سزا ورکول له نړیوالو قوانیو سرغړونه ده

د افغانستان لپاره د ملګرو ملتونو ځانګړی راپورورکونکی ریچارډ بنیټ وايي، د طالبانو له خوا مجرمینو ته په علني ډول سزا ورکول له نړیوالو قوانیو ښکاره سرغړونه ده.

بینټ پرون جمعه د (اپریل۱۱مه) پر خپلې ایکس پاڼې په بادغیس، نیمروز او فراه ولایتونو کې په علني توګه د څلور کسانو اعدام غندلی او له طالبانو يې غوښتي چې د دغه ډول سزاګانو پلي کیدل ژر تر ژره ودروي.

د طالبانو حکومت پرون په بادغیس، نیمروز او فراه کې څلور کسان اعدام کړل.

د اعدام شویو کسانو د هویت او جرمونو په اړه جزیات خپاره شوي نه دي.

دا څلور اعدامونه د طالبانو له خوا د کابل تر نیولو وروسته په تیرو نژدې څلورو کلونو کې د یوې ورځې په ترڅ کې د اعدامونو تر ټولو لوړه شمیر دی.

د فرانسې خبري اژانس په وینا، له دې اعدامونو سره د طالبانو د واکمنۍ له راستنېدو راهیسې په عام محضر کې د اعدام شویو نارینه وو شمېر ۱۰ ته ورسېد.

ملګرو ملتونو د میانمار زلزله ځپلو لپراه د ۲۷۵میلیونو ډالرو د مرستې غوښتنه کړې

ملګرو ملتونو په میانمار کې د وروستیو زلزلو له کبله زیانمنو شویو کسانو ته د ۲۷۵ میلیونو ډالرو د مرستې غوښتنه کړې ده.

دوه اونۍ مخکې د میانمار ډیر سیمې یوې زورولې زلزلې ولړزولې.

د ملګرو ملتونو په تازه راپور کې خبرداری ورکړل شوی چې د پنځه نیم میلیونو اړمنو کسانو سره د پلان شوې ۱،۱ میلیارد ډالرو بودیجې یوازې پنځه سلنه يې ترلاسه کړې ده.

په راپور کې وړاندې راغلي، "د اړمنو کسانو نویو او مخ په زیاتیدونکو اړتیاو ته په پام، اضافي سرچینې او عاجلې مرستې په کار دي".

د راپور په ټکو، دغه نوي غوښتل شوې مرستې چې پر یو نیم میلیون اړمنو کسانو تمرکز لري، هغوو ښځو او ماشومانو ته په کې ځانګړی پام شوی چې له تاوتریخوالي سره مخ دي او یا د زیږون پرمهال روغتیايي خدمتونه ته لاسرسی نه لري.

د ملګرو ملتونو د شمیرو له مخې، څه باندې شپږ میلیونه کسان په زلزله ځپلو سیمو کې عاجلو بشري مرستو ته اړتیا لري.

د مارچ په ۲۸مه د ریښتر په کچه ۷،۷ درجې زلزلې د میانمار ډیرې سیمې ولړزولې چې نژدې څلور زره کسان په کې ووژل شوی او په زرهاوو نور په کې ټپیان او بې سرپناه شول.

یوناما په افغانستان کې د اعدامونو د سمدستي دریدو غوښتنه وکړه

UNAMA logo
UNAMA logo

د جمعې په ورځ په افغانستان کې د څلورو کسانو له اعدام وروسته، په افغانستان کې د ملګرو ملتونو مرستندویه پلاوي (یوناما) وویل چې د مرګ سزا د ژوند له اساسي حق څخه سرغړونه ده.

د دې اعدامونو د خبر له خپریدو څو ساعته وروسته، یوناما د دې سزا د سمدستي پای ته رسولو غوښتنه وکړه.

طالبانو د جمعې په ورځ په بادغیس، نیمروز او فراه ولایتونو کې څلور کسان په عام محضر کې اعدام کړل.

دا د طالبانو له خوا د کابل تر نیولو وروسته په تیرو نژدې څلورو کلونو کې د یوې ورځې په ترڅ کې د اعدامونو تر ټولو لوړه شمیره ده.

د فرانسې خبري اژانس په وینا، له دې اعدامونو سره د طالبانو د واکمنۍ له راستنېدو راهیسې په عام محضر کې د اعدام شویو نارینه وو شمېر ۱۰ ته ورسېد.

د جرمني نوی حکومت بې اسناده افغانان له خپلې خاورې باسي

افغانستان -- له جرمني څخه شړل شوي افغان کډوال د کابل په نړیوال هوايي ډګر کې ، د سپتمبر ۱۳مه، ۲۰۱۷-ارشیف
افغانستان -- له جرمني څخه شړل شوي افغان کډوال د کابل په نړیوال هوايي ډګر کې ، د سپتمبر ۱۳مه، ۲۰۱۷-ارشیف

د جرمني نوی حکومت پلان لري چې افغانستان ته د هغو افغانانو د ایستلو لړۍ پراخه کړي چې قانوني اسناد نه لري.

د مسیحي ډیموکرات او مسیحي سوسیال ګوندونو د پارلماني ډلې مشر تورستن فرای د جرمني « بیلد» ورځپاڼې ته ویلي دي چې افغانستان او سوریې ته به د کډوالو د بیرته ستنولو لړۍ چټکه شي. ښاغلي فرای زیاته کړه چې پروسږکال په اوړي کې د یوشمیر کډوالو د ایستلو تجربې وښودله چې دا کار ممکن دی.

جرمني رسنیو د پنجشنبې په ورځ راپور ورکړ چې په دغه هیواد کې دوه لکه څلویښت زره داسې کډوال شته چې اسناد نه لري.

د ښاغلي فرای په وینا غیرقانوني کډوال باید په هر ډول چې کیږي له جرمني ووځي او غوره به دا وي چې لومړی په خپله خوښه ولاړ شي.

په دغو غیرقانوني کډوالو کې لویه برخه د افغانستان دي.

د امریکا د ولسمشر ځانګړی استازی نن په ناببره سفر روسیې ته ولاړ

ویتکوف
ویتکوف

د امریکا د ولسمشر ډونالډ ټرمپ یو لوړ پوړی سلاکار سټیف ویتکوف روسیې ته تللی دی.

د ازادې اروپا /ازادي راډیو د خبر د مرکز په وینا، ښاغلی ویتکوف په داسې وخت کې دا سفر کوي چې د امریکا اواکراین ترمنځ په واشنګتن کې خبرې روانې دي او بریتانیا او جرمني په بروکسل کې د اوکراین په اړه غونډې لري.

د کرملین ویاند دیمیتري پیسکوف د روسیې دولتي رسنیو ته وویل چې د امریکا ځانګړی استازی سټیف ویټکوف نن (د اپریل په ۱۱مه) روسیې ته ورسید.

ښاغلی ویتکوف به د شنبې په ورځ په عمان کې له ایراني چارواکو سره خبرې وکړي او د دې سفر په درشل کې دی په روسیې کې تم شوی دی.

نور راوښيه

XS
SM
MD
LG