د لاسرسۍ وړ لېنکونه

تازه خبر
شنبه ۲۰ سلواغه ۱۴۰۳ کابل ۰۷:۲۸

خبرونه

ملالې یوسفزۍ له اسلامي هیوادونو وغوښتل چې د طالبانو حکومت ته مشروعیت ورنه کړي

د نوبل د سولې جایزې ګټونکې ملالې یوسفزۍ د اسلامي هیوادونو له مشرانو څخه وغوښتل چې د افغانستان د طالبانو حکومت ته مشروعیت ورنه کړي او د طالبانو له خوا د ښځو او نجونو پر زده کړو د بندیزونو پر وړاندې غږ پورته کړي.

هغې چې نن (بکشنبې، د جدي د ۲۳) د اسلامي همکارۍ سازمان له لوري په اسلام اباد کې جوړې شوې په غونډې ته وینا کوله، د اسلامي هیوادونو له مشرانو وغوښتل چې د دې بندیزونو د ختمولو لپاره له خپلو صلاحیتونو کار واخلي.

ملالې یوسفزۍ، چې تر دې وړاندې یې هم د طالبانو له خوا د ښځو او نجونو پر زده کړو پر محدودیتونو څو ځلې نیوکې کړې، ویلي چې طالبان ښځو ته د انسانانو په سترګه نه ګوري او خپل جنایتونه په دیني او کلتوري پلمو پټوي.

د ورځې تازه خبرونه دلته ولولئ

آیت الله علي خامنه یي په تهران کې د حماس ډلې له مشرانو سره ولیدل

آیت الله علي خامنه یي له خليل الحية سره د لیدنې پرمهال
آیت الله علي خامنه یي له خليل الحية سره د لیدنې پرمهال

د ایران سترمشر ایات الله علي خامنه یي نن (د سلواغې ۲۰مه) په تهران کې د فلسطینۍ حماس ډلې له سرپرست مشر خليل الحية او د دې ډلې له دوو نورو چارواکو سره وکتل.

حماس د امریکا او اروپایي ټولنې له خوا د یوې تروریستي ډلې په توګه پیژندل شوې ده. د ایراني رسنیو د راپورونو له مخې د دغې کتنې په اړه نورجزیېات نه دي خپاره شوي خو یوازې له الحية، د حماس د مشرتابه شورا له مشر محمد درویش او د دې ډلې له بل چارواکي نزار عوض الله سره د خامنه یي تصویرونه خپاره شوي دي.

ایران له اسراییل سره په جګړه کې د حماس ملاتړ کړی او دا فلسطینۍ ډله پر منځني ختیځ د اسراییل او لویدیځ د نفوذ پر وړاندې د خپلې پراخې ستراتیژۍ یوه اصلي متحده بولي.

د حماس ډلې مشران له تهران څخه داسې مهال کتنه ترسره کوي چې د دې ډلې پخوانی سیاسي مشر اسماعیل هنیه د ۲۰۲۴ کال د جولای په ۳۱ مه په تهران کې په یوه برید کې ووژل شو.

د راپورونو له مخې نوموړی د دې لپاره تهران ته تللی و، چې د ایران د ولسمشر مسعود پزشکیان د لوړې په مراسمو کې ګډون وکړي.

د اسراییل دفاع وزیر اسراییل کاتز د تیرکال په ډسمبر میاشت کې په ښکاره دا ومنله چې د اسماعیل هنیه په وژلو کې اسراییل لاس درلود.

د پاکستان له زندانونو ۴۲ تنه نور افغان بندیان خوشې شول

په پاکستان کې افغان کډوال (آرشیف)
په پاکستان کې افغان کډوال (آرشیف)

د طالبانو د حکومت د کډوالو او راستنیدونکو چارو وزارت وايي چې ۴۲ تنه خوشې شوي افغان بندیان پرون (د سلواغې ۱۹مه) د تورخم له لارې بیرته افغانستان ته ستانه شول.

په تورخم کې د طالبانو سرحدي پولیسو ویلي چې دا کسان د پاکستان په پلازمینه اسلام آباد کې نیول شوي او له دوو څخه تر پنځو ورځو پورې په حاجي کمپ کې توقیف شوي وو.

د ملګروملتونو د کډوالو لویې کمیشنرۍ UNHCR د جمعې په ورځ په یوه راپورکې وویل چې پاکستان د ښځو او ماشومانو په ګډون د مختلفو اسنادو لرونکو افغانانو د نیونو بهیرچټک کړی دی او په تیره جنوري میاشت کې یې افغانستان ته په جبري ډول د استول شویو زرو افغانانو له ډلې یوازې شاوخوا اته سوه له اسلام آباد او راولپنډۍ څخه ډیپورټ کړي دي.

د ترکیې یو چارواکی وايي، په انقره کې د افغانستان سفارت فعال دی

په انقره کې د افغانستان د سفارت ودانۍ
په انقره کې د افغانستان د سفارت ودانۍ

د ترکیې یوه چارواکي تایید کړه چې په پلازمینه انقره کې د افغانستان سفارت، د پرځېدلي جمهوري نظام د ډیپلوماتانو د دندو له پای ته رسیدو سره سره پرانیستی دی او خپلې چارې مخ ته وړي.

د اسوشیتید پرس خبري آژانس د راپورله مخې دغه ترک چارواکي چې نه یې غوښتل نوم یې یاد شي، همداراز وویل چې د افغانانو د ستونزو د کمولو لپاره دوی د افغانستان په وړاندې، د دې هیواد له سرپرست حکومت سره د تعامل او ډیالوګ پالیسي مخ ته وړي.

په انقره کې د افغانستان سفارت چې چارې یې د جمهوریت د مهال چارواکو سمبالولې، د پنجشنبې په ورځ په یوه خبرپاڼه کې وویل چې د سفیر په ګډون د څو ډیپلوماتانو دندې پای ته رسیدلي او د سفارت چارې یې د ترکیې د بهرنیو چارو سفارت وسپارلې خو د ترکیې د بهرنیو چارو وزارت تراوسه په دې اړه رسمي څرګندونې نه دي کړي.

په کابل کې د طالبانو د بهرنیو چارو وزارت د دریم سیاسي دفتر مشر ذاکر جلالي په یوه بیان کې وویل چې په انقره کې د افغانستان سفارت خپل عادي فعالیت مخ ته وړي.

د طالبانو حکومت چې تراوسه د نړۍ هیڅ هیواد په رسمیت نه دی پیژندلی، له ګاونډیانو او د سیمې او نړۍ له ډير شمیر هیوادونو سره ډیپلوماټیک اړیکي ټینګ کړي دي.

په بنو کې د وسله والو تازه حملو مرګ ژوبله اړولې ده

بنو- د ۲۰۲۴ کال سپټمبر میاشت، د ناامنیو پرضد د خلکو اعتراض (آرشیف)
بنو- د ۲۰۲۴ کال سپټمبر میاشت، د ناامنیو پرضد د خلکو اعتراض (آرشیف)

د خيبر پښتونخوا په بنو کې پرون (د سلواغې ۱۹مه) په دوو بېلا بېلو بريدونو کې د دوو پوليسانو په ګډون پينځه تنه وژل شوي او پينځه نور ژوبل شوي دي.

د بنو د پوليسو وياند حنظله نن مشال راډيو ته وویل چې وسله والو تېره شپه ناوخته د بنو د فتح خېل سیمې د پولیسو پر تاڼې بريد وکړ چې په نتيجه کې يې دوه پوليس سرتيري وژل شوي او دري نور ژوبل شوي دي.

ځايي اوسیدونکو او پوليس چارواکو همداراز وویل چې د وسله والو په یوه بل برید کې چې د بنو ګربز په سيمه کې یې د امن کميټۍ دفتر په نښه کړی و، دري کسان وژل شوي او دري نور ژوبل شوي دي.

د دې کميټۍ يوه غړی د نوم نه خپرولو په شرط د آزادۍ راډیو مشال څانګې ته وويل چې له ۳۰ تر ۴۰ پورې وسله والو د دوی پر دفتر بريد کړی و.

د دواړو بريدونو مسولیت تراوسه پورې کوم کس یا وسله والې ډلې نه دی منلی خو په سیمه کې د تحریک طالبان پاکستان په ګډون یوشمیرسخت دریځې ډلې فعالې دي چې په دې وروستیو کې یې د پاکستان د حکومت اړوند هدفونو باندې بریدونه زیات کړي دي.

ټاکل شوې چې حماس ډله او اسراییل نن نور اسیران تبادله کړي

غزه، د ۲۰۲۵ کال د جنوري ۳۰مه، د حماس وسله وال یوه اسراییلۍ برمته بدرګه کوي (آرشیف)
غزه، د ۲۰۲۵ کال د جنوري ۳۰مه، د حماس وسله وال یوه اسراییلۍ برمته بدرګه کوي (آرشیف)

ټاکل شوې چې فلسطینۍ حماس ډله نن (د سلواغې ۲۰مه) درې نور یرغمل آزاد کړي چې اسراییل به یې هم په بدل کې لسګونه فلسطیني بندیان خوشې کړي.

حماس چې امریکا او اروپايي ټولنه یې تروریستي ډله بولي پرون د دې یرغملو نومونه اعلان کړل او د اسراییل د صدراعظم دفتر تایید کړه چې د یرغملو نومونه ورسپارل شوي او د هغوی کورنیو ته هم خبر ورکړل شوی دی.

د اسوشیتید پرس خبري آژانس د راپورله مخې خوشې کیدونکي یرغمل ټول نارینه او عمرونه یې د ۳۴ او ۵۶ کلونو ترمنځ دي.

د اسیرانو نننۍ تبادله به د حماس او اسراییل ترمنځ د یرغملو او بندیانو د خوشې کولو پنځم پړاو وي چې په غزه کې د جنوری په نولسمه د نافذ شوي اوربند د موافقې له مخې ترسره کیږي.

اسراییل به هم په بدل کې نن له خپلو زندانونو ۱۸۳ فلسطیني بندیان خوشې کړي. د فرانسپرس خبري آژانس د راپورله مخې د فلسطیني بندیانو یوې مدافع ټولنې ویلي چې د اسراییل له خوا په خوشې کیدونکو فلسطیني بندیانو کې ۱۸ تنه هغه بندیان هم دي چې په عمري بند محکوم شوي وو، ۵۴ تنه یې د اوږده قید بندیان ښودل شوي او ۱۱۱ تنه نور یې د غزې هغه اوسیدونکي دي چې پراسراییل د ۲۰۲۳ کال د اوکتوبر د اومې له برید وروسته د اسراییل د پوځي عملیاتو په ترڅ کې نیول شوي وو.

د دواړو لورو ترمنځ د یرغملو او بندیانو د تبادلې د تیرو څلورو پړاوونو په ترڅ کې حماس ۱۳ تنه اسراییلي او ۵ تنه ټایلنډي یرغمل او اسراییلو شاوخوا ۵۸۳ تنه فلسطیني بندیان آزاد کړي دي.

WHO په افغانستان او پاکستان کې د پولیو د مخنیوي لپاره د بېړنیو اقداماتو غوښتنه کوي

افغانستان- د پولیو پرضد د واکسین کمپاین (آرشیف)
افغانستان- د پولیو پرضد د واکسین کمپاین (آرشیف)

د روغتیا نړیوال سازمان، WHO په افغانستان او پاکستان کې د تېرکال په اوږدو کې د ماشومانو د ګوزڼ د ناروغۍ یا پولیو د چټکې خپریدا په اړه اندیښنه څرګنده کړې او په وړاندې یې د بیړنیو اقداماتو غوښتنه کړې ده.

"په نړۍ کې د پولیو د له مینځه وړلو نوښت" په نوم بنسټ پرون (د سلواغې ۱۹مه) پر خپله ویب پاڼه په یوه راپور کې وویل چې د روغتیا د نړیوال سازمان د اجراییوي بورډ په غونډه کې چې روانه اونۍ د سویس په جینوا ښار کې جوړه شوې وه، د نړۍ د هیوادونو د روغتیا وزیرانو په افغانستان او پاکستان کې د پولیو د وایروس د چټکې خپریدا په اړه اندیښنه څرګنده کړه او ټینګار یې وکړ چې د مخنیوي لپاره یې باید د پام وړاقدامات وشي.

د دې غونډې په خپره شوې اعلامیه کې د پولیو د وایروس له خپریدو سره د مبارزې لپاره نه یوازې د لوړ خطر په لرونکو سیمو بلکې د ډیورنډ کرښې په اوږدو کې په نورو پرتو سیمو کې د څارنې د هڅو د پیاوړتیا پر اړتیا هم ټینګار شوی دی.

د روغتیا د نړیوال سازمان د شمیرو له مخې په ۲۰۲۴ کال کې په افغانستان کې د پولیو ۲۵ مثبتې پیښې ثبت شوي او په پاکستان کې یې تیرکال شمیر له اویا اوښتی دی. د ماشومانو د ګوزڼ ناروغي یا پولیو یوه ساري او ویروسي ناروغي ده چې درملنه نه لري او یوازې د واکسین تطبیق کولای شي ماشومان له دې ناروغۍ وژغوري.

ډونالډټرمپ وايي، ښايي راتلونکې اونۍ د اوکراین له ولسمشر ولودیمیر زیلینسکي سره وویني

ډونالډټرمپ او ولودیمیر زیلینسکي
ډونالډټرمپ او ولودیمیر زیلینسکي

د امریکا ولسمشر ډونالډ ټرمپ وايي، ښايي راتلونکې اونۍ د اوکرایین له ولسمشر ولودیمیر زیلینسکي سره وویني.

دا په داسې حال کې ده چې په اوکرایین کې د جګړې د پای ته رسولو لپاره د امریکا هڅې ګړندۍ شوې دي، او زیلینسکي ویلي، دا مهمه ده چې د ټرمپ او د روسیې د ولسمشر ولادیمیر پوتین له لیدنې مخکې، دی له ښاغلي ټرمپ سره په مستقیم ډول د نظر تبادله وکړي.

ښاغلي ټرمپ پرون (د سلواغې ۱۹مه) وویل چې احتمال لري راتلونکې اونۍ له زیلینسکي سره وویني.

د فبروري په ۲۴مه د هغې جګړې څلور کاله پوره کیږي چې د روسیې ولسمشر په اوکرایین کې پیل کړې ده او د امریکا ولسمشر ډونالډ ټرمپ ژمنه کړې چې پای ته به یې ورسوي.

په پام کې ده چې د اوکراین لپاره د ښاغلي ټرمپ ځانګړی استازی کیت کیلوګ راتلونکې اونۍ د مونیخ په امنیتي کنفرانس کې چې د فبروري له ۱۴مې څخه تر ۱۶مې پورې جوړېږي، ګډون وکړي. په دې کنفرانس کې به د اوکرایین د جګړې په اړه، چې له ۱۹۴۵ راهیسې په اروپا کې تر ټولو لویه جګړه ده، بحث وشي.

ډونالډټرمپ وايي په افغانستان کې د امریکا د میلیاردونه ډالره پوځي تجهیزاتو د پریښودلو لپاره هېڅ دلیل نه شته

۲۰۱۵ کال، کندهار- امریکا او د ناټو نورو غړو خپل پوځي تجهیزات افغانستان ته ورکړل
۲۰۱۵ کال، کندهار- امریکا او د ناټو نورو غړو خپل پوځي تجهیزات افغانستان ته ورکړل

د امریکا ولسمشر ډونالډ ټرمپ وايي، دا د ولسمشر جو بایډن د ادارې ساده ګي وه چې په افغانستان کې یې د میلیاردونو ډالرو پوځي تجهیزات پریښودل.

ښاغلي ټرمپ پرون(د سلواغې ۱۹مه) په سپینه ماڼۍ کې د جاپان له لومړي وزیر سره په ګډه خبري غونډه کې وویل چې په افغانستان کې د دومره ډېرو پوځي تجهیزاتو د پریښودو لپاره هیڅ دلیل نشته.

هغه زیاته کړه چې ده غوښتل د امریکا پوځ پیاوړی وي او پر وسلو لګښت کولو ته لیواله دی ځکه چې د پوځ ټول تجهیزات په امریکا کې جوړ شوي دي. هغه زیاته کړه چې د خپلې لومړۍ دورې په جریان کې یې د امریکا پوځ پیاوړی کړ او په دې برخه کې یې ښه کار وکړ. خو د هغه په وینا د دې تجهیزاتو یوه برخه په افغانستان کې پاتې شوه.

ښاغلي ټرمپ په وار وار په افغانستان کې د امریکا د پوځي تجهیزاتو پر پاتې کېدو نیوکه کړې ده.

هغه تېره میاشت له لوړې مخکې وویل چې له افغانستان سره د امریکا راتلونکې مرستې به په هیواد کې د پاتې امریکایي وسلو په بیرته ستنیدو پورې تړلې وي.

خو په افغانستان کې د طالبانو حکومت وايي، چې دا تجهیزات اوس د دوی د پوځ ملکیت دي او بیرته امریکایانو ته نه ورکول کیږي.

هیګسیت؛ امریکا د افغانستان، اوکراین او منځني ختیځ په مسایلو کې باید مسوولیت واخلي

د امریکا د دفاع وزیر پیټ هیګسیت
د امریکا د دفاع وزیر پیټ هیګسیت

د امریکا د دفاع وزیر پیټ هیګسیت وايي چې د افغانستان پیښو په امریکا کې د کمزورۍ احساس رامینځته کړی دی.

ښاغلي هیګیسټ پرون (د سلواغې ۱۹مه) د بهرنیو چارو او دفاع وزارتونو کارکوونکو ته د وینا پرمهال وویل چې متحده ایالات باید د افغانستان د پیښو، پر اسراییلو د اکتوبر د ۷مې نیټې د برید او په اوکراین کې د پیل شوې جګړې په برخو کې یو څه مسؤلیت واخلي.

د هغه په وینا، دا مفکوره چې د امریکا ځواک کامل نه دی، ګډوډي رامینځته کوي.

هغه په دې وضعیت کې د بدلون لپاره د دریو محورونو په اړه خبرې وکړې؛ د پوځ د مورال بیرته راژوندي کول، په پوځ باور بیا رغول او د ګواښونو پر وړاندې د مقابلې لپاره د پوځي ځواکونو بیا رغونه.

په جرمني کې یو وار بیا د پناه اخیستو غوښتنې ډېرې شوي

په جرمني کې د کډوالو یو کمپ
په جرمني کې د کډوالو یو کمپ

جرمني وایي چې په جنوري کې د مخکینۍ میاشتې پرتله د هغو کسانو شمیر چې له دې هیواد څخه یې د پناه غوښتنه کړې، زیات شوی دی.

د جرمني خبري آژانس د راپورله مخې د کډوالو لپاره د جرمني د فدرالي ادارې د نویو شمیرو له مخې له سوریانو وروسته افغانان د پناه غوښتونکو دوهمه لویه ډله ده.

د دې ادارې په وینا په جنوري میاشت کې ۱۴۹۲۰ کسانو په لومړي ځل په جرمني کې د پناه غوښتنې کړي چې دا د ډسمبرمیاشتې پرتله ۲۲،۵ سلنه زیاتوالی ښیي.

له سوریه والو وروسته افغانان د ټولو پناه غوښتونکو ۱۳ سلنه جوړوي.

جرمني تر اوسه د هغو افغانانو چې د مختلفو دلایلو له امله افغانستان پریږدي او غواړي له قاچاقي لارو ځان اروپایي هیوادونو ته ورسوي، تر ټولو مهم منزل یا مقصد دی.

دا په داسي حال کې ده چې د جرمني د پناه ورکولو له سیاست سره د خلکو او سیاستوالو مخالفت ډېر شوی او مخالفتونو په انتخاباتو کې د مهاجرو د مخالفو ډلو د رایو له ډېرېدو سره مرسته کړې ده.

نور راوښيه

XS
SM
MD
LG