د قزاقستان په لویدیځ کې اقتاو ښار ته نژدې د یوې مسافر وړونکې الوتکې د لوېدو په پېښه کې لسګونه کسان مړه شوي دي.

د قزاقستان چارواکو نن چهارشنبې وویل چې په دغه الوتکه کې چې د آذربایجان له پلازمینې باکو څخه روسیې ته پر لاره وه، ۶۹ تنه سپاره ول.

چارواکو ویلي چې د لومړنیو معلوماتو له مخې په دې پېښه کې لسګونو تنه مړه شوي خو تر دیرشو زیات ژوندي پاته دي.

د قزاقستان د روغتیا وزارت ویلي چې د دوو ماشومانو په ګډون ۲۷ تنه سیمه ییز روغتون ته لیږدول شوي. د یوولسو کسانو روغتیایي وضعیت نازک ښودل شوی او د جدي پاملرنې په څانګه کې تر درملنې لاندي دي.

د اذربایجان هوايي شرکت ویلي چې د امبریر ۱۹۰ الوتکه چې له باکو څخه د چیچنیا پلازمینې ګروزني ته پر لاره وه، اړه شوه چې له اقتاو څخه شاوخوا درې کیلومتره لیرې بیړنۍ ناسته وکړي. د الوتکې د غورځېدو لامل سمدستي نه دی څرګند او د قزاقستان پولیسو په دې اړه پلټنې پیل کړې دي.

د کډوالو په چارو کې د ملګرو ملتونو لویه کمیشنری یا(یواین ایچ سي آر) وايي، په افغانستان کې د ښځو د پیاوړتیا په موخه خپل پروګرامونه پیاوړي کوي.

دغه سازمان نن (چهار شنبه د جدي ۵) په ایکس، یا ( پخواني ټویټر) کې لیکلي، چې د خپلو پروګرامونو د پیاوړتیا لپاره یې د ملګرو ملتونو د پراختیايي سوداګرۍ له څانګې سره یو جدي تړون لاسلیک کړی دی.

د دغه سازمان په وینا، په دغو پروګرامونو کې د ښځو په ځانګړي تمرکز سره د ژوندانه، متشبثینو او سوداګرۍ ته د راستنیدونکو لاسرسی شامل دی.

دا په داسې حال کې ده چې په افغانستان کې اکثرو ښځو د طالبانو د واکمنۍ پر مهال خپلې دندې له لاسه ورکړي او وايي چې په تېرو درېیو کلونو کې د طالبانو سختو بندیزونو دوی له کاري فرصتونو بې برخې کړي دي

تمه ده چې د افغانستان او زیمبابوې د کرکټ ملي لوبډلو لومړۍ ټیسټلوبه سبا (پنجشنبې د مرغومي په شپږمه) په هرارې کې پیل شی.

د زیمبابوې په کوربه توب دا سیالي د افغانستان پر وخت د غرمې په ۱۲:۳۰ بجو پیلیږي.

افغان لوبغاړي به د زیمبابوې له لوبډلې سره دوه ټیسټ لوبې وکړي، چې ټاکل شوې د روانې میاشتې له ۶مې تر ۱۷مې د زیمبابوې په کوینز لوبغالي کې ترسره شي.

تر دې وړاندې د افغانستان د کرکټ ملي لوبډلې په ۲۰ اوریزه او ۵۰ اوریزه سیالیو کې د زیمبابوې د کرکټ ملي لوبډلې ته ماتې ورکړې وه.

د طالبانو حکومت وايي د ډسمبر په ۲۴مه په پکتيکا کې د پاکستاني الوتکو په بمبارۍ کې ۴۶ کسان وژل شوي دي.

د طالبانو د حکومت وياند، ذبیح الله مجاهد د ډسمبر په ۲۶مه د ازادي راډيو مشال څانګې ته وويل:

"د پکتیکا برمل ولسوالۍ په شین سترګۍ اډې، سورزغمي، الماستې او مرغې سیمو کې په څلورو ځایونو بمبار شوی. ټول پکې ۴۶ تنه شهیدان دي چې اکثریت یې ماشومانو او زنانه دي. ۶ نفره ټپيان دي چې یو لوی کس او ۵ ماشومان دي. شهیدان او ټپیان ځينې ځایی خلک دي او ځينې د وزیرستان څخه را مهاجرې شوی کورنۍ دي."

په افغانستان کې د طالبانو د دفاع وزارت پر اېکس يا پخواني ټويټر ليکلي ول چې د ډسمبر پر ۲۴مه ماښام مهال پاکستاني جيټ الوتکو پر پکتيکا په بمبارۍ کې "عام ولسي خلک چې اکثره يې وزيرستاني مهاجرين دي" په نحښه کړي دي.

د پاکستان پوځ او حکومت لا په برمل کې د تازه بريدونو په اړه په رسمي توګه څه نه دې ويلي. خو پر اېکس ځينو حسابونو، چې باور کېږي د پاکستان استخباراتي ادارو ته منسوب دي، ادعا کړې ده چې په پکتيکا کې يې د بمباريو پر مهال د تحريک طالبان پاکستان (ټي ټي ‌پي) وسلوالو "څلور مهم مرکزونه" په نخښه کړي او له مينځه وړي دي.

ټي ټي پي ډلې چې په پاکستان کې بندیز ورباندي لګېدلی دی، تر اوسه په دې اړه څه نه دي وي.

دا بريدونه په داسې حال کې شوي دي چې د دیسمبر پر ۲۳مه ناوخته د افغانستان لپاره د پاکستان د ځانګړي استازي محمد صادق په مشرۍ يو پلاوی کابل ته ولاړ او هلته یې د طالبانو د کورنيو او بهرنيو چارو پر سرپرست وزيرانو تر څنګ د افغان سوداګرو له يوه پلاوي سره هم وليدل. هغه په خپلو بیانونو کې وويل چې دواړو خواوو "د دوه اړخیزو همکاریو د لا پیاوړتیا" او په سیمه کې "د سولې او پرمختګ لپاره په ګډه پر کار کولو" موافقه وکړه.

د اکوادور لویې څارنوالۍ اعلان کړی چې غواړي د دې هېواد د شپاړسو پوځیانو پرضد د څلورو نویو زلمیانو د لادرکه کېدو په قضیه کې د لاس لرلو په تور جنايي دوسیه پرانیزي.

څلور تنه نوي زلمیان چې عمرونه یې د ۱۱ او ۱۵ ترمنځ وو، د روانې ډسمبر میاشتې په اتمه د آرام سمندر په ساحلي ښار ګوایاکیول کې تري تم شول چې د خلکو پراخه غوسه یې وپاروله.

د اکوادور لوی څارنوال پرون پر خپله ایکس پاڼه ولیکل چې له تحقیقي ادارو غواړي چې په دې قضیه کې د تورنو پوځیانو پرضد د جنایي دوسیې د پرانیستو دقیقه نېټه وټاکي.

د اوکراین په کریوي ریه ښار د روسیې له خوا د بالستیک توغندي په یوه برید کې یوتن وژل شوی دی.

اوکرایني چارواکو د مرغومي په ۴مه وویل، دا حمله د استوګنې پر یوه څلور پوړیزه ودانۍ شوې ده. د دنیپرو پیتروفسک والي سیرهي لیساک ویلي چې په دې برید کې یوولس نور کسان هم ټپیان شوي چې اوه تنه یې روغتون ته رسول شوي دي.

د اوکراین د بشري حقونو ټولنې دې برید ته قهرجن غبرګون ښودلی او یادونه یې کړې چې دا برید د عیسویانو د مذهبي جشن کرسمس په ورځ شوی دی.

دا په داسې حال کې ده چې پرون د اوکراین په ختیځ کې د جګړې په لومړۍ کرښه کې د سیالو خواوو ترمنځ د درنو نښتو راپورونه ورکړل شول.

د سوریې د کورنیو رسنیو د راپورونو له مخې د دې هېواد وسله والو ډلو موافقه کړې چې ځواکونه یې د دفاع وزارت په تشکیل کې مدغم شي.

سانا دولتي خبري آژانس پرون راپور ورکړ چې په دې اړه پرېکړه د وسله والو ډلو له استازو سره د سوریې د نوي مشر، احمدالشرع په کتنه کې شوې ده. په دې غونډه کې کرد ځواکونو چې د سوریې د شمال ختیځ ځینې برخې یې په ولکه کې دي، ګډون نه و، کړی.

له دې مخکې احمدالشرع چې به ابومحمدالجولاني مشهور دی، اعلان کړی و، چې په دې هېواد کې ټولې وسلې باید د دولت په کنټرول کې وي.

د هیات تحریر شام په مشرۍ وسله والو ډلو د ډسمبر په اتمه د بشاراسد رژیم وپرځاوه او پر دې هېواد واکمن شول.

د کرکټ نړیوالې شورا پرون سې شنبې د اتلانو جام یا چمپینز ټرافي مهالوېش اعلان کړ.

افغانستان په لومړي ځل په دې سیالیو کې ګډون کوي او په B ګروپ کې به له جنوبي افریقا، انګلستان او اسټرالیا سره سیالۍ وکړي. د مهالوېش له مخې به د افغانستان لومړۍ سیالي د فبرورۍ میاشتې په ۲۱مه نېټه په کراچۍ ښار کې له جنوبي افریقا سره وي. په پام کې وه چې دا ځل د اتلانو جام ټولې سیالۍ په پاکستان کې ترسره شي، خو دې ته په پام چې هندي لوبډله دې هیواد ته نشي ورتلی، متحده امارات به د هند د ټولو سیالیو کوربتوب کوي.

د کرکټ د نړیوالې شورا د مهالویش له مخې دغه جام به د ۲۰۲۵ کال د فبرورۍ میاشتې په ۱۹مه نېټه د پاکستان په کراچۍ ښار کې د پاکستان او نیوزیلنډ د لوبډلو ترمنځ په سیالۍ سره پیل شي او پایلوبه به یې د مارچ په ۹مه نېټه د لاهور په ښار کې وي. د افغانستان دوهمه لوبه له انګلستان سره ده چې د فبرورۍ په ۲۶ نیټه به په همدې لاښورښارکې ترسره شي.

د افغانستان د فوټبال د غوره لیګ سیالیو په ترڅ کې چې هرات یې کوربه دی، نن چهارشنبې دوه لوبې کیږي.

لومړۍ لوبه د فاریاب د سرسبزیاشلر او د کابل استقلال ټیمونو ترمنځ ده او په دوهمه لوبه کې به د فراه د ابومسلم او عدالت لوبډلې د سیالۍ ډګرته ووځي. پرون سې شنبې دوه لوبې وشوې. د ساحل څپو دوه د صفر په وړاندې د خراسان ټیم ته ماتې ورکړه او په دوهمه لوبه کې اټک انرژي له جوانان پیروزي څخه څلور د صفر په وړاندې لوبه وګټله.

د افغانستان د فوټبال د غوره لیګ د اتلولۍ سیالي د دولسو لوبډلو په ګډون د لیندۍ له دولسمې څخه په هرات کې پیل شوي او یوه میاشت به دوام کوي.

د پاکستان له زندانونو ۵۳ آزاد شوي افغان بندیان بیرته افغانستان ته ستانه شول.

د طالبانو د حکومت د کډوالو او بیرته راستنیدونکو چارو وزارت پرون سې شنبې په خپله ایکس پاڼه یا پخواني ټویټرکې ولیکل چې دغه ۵۳ بندیان چې پکې د یوې کورنۍ اته غړي هم شامل او په دې وروستیو کې د پاکستان له زندانونو خوشې شوي و، د سپن بولدک له لارې بیرته افغانستان ته ستانه شول.

د تیرکال د نومبرله میاشتې راهیسې چې پاکستان له خپلې خاورې د بې اسناده افغان کډوالو د په زوره ایستلو بهیر پیل کړی، په دې هیواد کې په زرګونو کسان د پولیسو له خوا نیول شوي دي. د ملګروملتونو د کډوالو لویې کمیشنیرۍ او د مهاجرت نړیوال سازمان په دې وروستیو کې په یوه ګډ راپورکې وویل چې په دې وروستیو کې په پاکستان کې د افغان کډوالو د نیولو بهیربیا ګړندۍ شوی دی.