د فلسطین روغتیايي چارواکي وايي په غزې تړانګه کې د اسراییل په تازه هوايي حملو کې د ۷ ماشومانو په ګډون لږ تر لږه ۲۸ کسان وژل شوي دي.

د ملګرو ملتونو عمومي اسمبلۍ د چهارشنبې په ورځ په لوی اکثریت هغه پرېکړه لیک تصویب کړ، چې په غزه کې د فوري اوربند غوښتنه په کې شوې ده.

د رویټرز اژانس د خبر له مخې، له وړمې شپې تر پرون پنجشنبې پورې یوه حمله پرون په النصیرات کې د کډوالو په کمپ کې پر یوه کور شوې ده.

دا خبره دیرالبلح ښار ته نږدې چې دا مرګ ژوبله په کې پېښه شوې د الاقصی د شهیدانو په نوم روغتون کړې ده.

په دوو نورو حملو کې ۱۵ هغه سړي وژل شوي، چې د محلي کمېټو غړي وو او دا کمېټې د مرستو د کاروانونو د خوندیتوب لپاره ګمارل شوې وې.

د ملګرو ملتونو په تازه تصویب شوي پرېکړه لیک کې د فلسطیني کډوالو لپاره د ملګرو ملتونو د ادارې ملاتړ هم شوی، چې اسرائیل یې پر فعالیت بندیز لګولی دی.

د بښنې نړیوال سازمان د طالبانو له حکومت د دریو افغان خبریالانو د سملاسي خوشي کیدو غوښتنه کوي.

دیاد سازمان د جنوبي اسیا څانګه ددغو خبریالانو د نیول کیدو په اړه اندیښنه څرګندوي او وايي چې د طالبانو حکومت باید د منصور نیازي ، عمران دانش او جاوید نیازي د ساتنې ځای او برخلیک څرګند او هغوی خوشې کړي.

اعلامیه وايي دغه کسان د خبریالانو د ویرولو او غچ اخیستنې دلړۍ په دوام کې نیول شوي او زیاتوي چې اجباري لادرکه کول ددوی د امنیت او د شکنجې د خطر په هکله جدي اندیښنې را مینځ ته کوي.

د طلوع نیوز خصوصي شبکې دیکشنبې په ورځ تایید کړه خبریالان یې ،منصور نیازی او عمران دانش د طالبانو د حکومت لخوا کابل کې نیول شوي دي.

ښاغلی جاوید نیازی د پیګرد په نامه دیو محلي خبري اژانس مسئول مدیر دی.

د طالبانو حکومت تراوسه په دې هکله څه نه دي ویلي خو مخکې یې ویلي چې "د اسلامي شریعت او ملي ګټو په چوکاټ" کې د بیان ازادي ته ژمن دي.

د افغانستان د پاور لیفټنګ فدراسیون بلاروس کې د ۲۰۲۶ کال نړیوالو سیالیو کې شپږ مډالونه ګټلي دي.

په دغو سیالیو کې د لسو هیوادونو ورزشکارانو برخه واخیسته او د افغانستان د ملي ټیم غړو وکولای شول چې ۴ د سرو زرو ۱ د سپینو زو او۱ د برونزو مډال وګټي.

نوراحمد سخی زاده ، میرویس رفیع زاده ، فواد شیرین سخن او جابر شیرین سخن هریو د سرو زرو مډال وګاټه.

دو نورو لوبغاړو، روح الله خیراندیش د سپینو زرو او حمید الله کریمي د برونزو مډالونه وګټل.

دغه سیالي چې د مې میاشتې په ۶ مه پيل شوې وې د افغانستان لخوا ۶ لوبغاړو او یو روزونکي په کې برخه واخیستله.

پاور لیفټنګ د زور ازمیلو یوه سیالي ده چې ورزشکار هڅه کوي ترټولو دروند ممکن وزن په دریو حرکتونو کې له ناستې تر ولاړیدو او په سینه ایښودو اوچت او ځای پرځای کړي.

اروپايي اتحادیې د روسیې د ولسمشر ویلادیمیر پوتین وروستی وړاندېز چې د جرمني پخوانی صدراعظم ګیرهارد شرویدر یې دروسیې او اوکراین په لانجه کې غوره منځګړی وباله، رد کړ.

د اروپايي اتحادیې د بهرنیو چارو مشرې کایا کالاس د دوشنبې په ورځ بروکسل د بهرنیو چارو د وزیرانو غونډې ته وویل:
"که موږ روسیې ته دا حق ورکړو چې زموږ له خوا مذاکره کوونکی وټاکي، نو دا به هېڅ عاقلانه کار نه وي."

هغې زیاته کړه:
"ګېرهارډ شروېدر د روسیې د دولتي شرکتونو لوړپوړی لابي کوونکی پاتې شوی دی. نو څرګنده ده چې ولې پوتین غواړي هغه د مذاکره کوونکي په توګه وټاکل شي، ځکه په حقیقت کې به هغه د مېز په دواړو خواوو کې ناست وي."

پوتین د شنبې په ورځ، کله چې ترې وپوښتل شول چې له اروپا سره د خبرو د بیا پیل لپاره څوک مناسب بولي، وویل چې دی "په شخصي ډول" شروېدر غوره ګڼي.

دفرانسې د خبري اژانس درپوټ په اساس، ۸۲ کلن ګیرهارد شرویدر له کرملین سره نږدې اړیکې ساتلي دي، او د اوکراین پر ضد د روسیې د یرغل راهیسې یې د ډېرو لوېدیځو مشرانو خلاف دریځ غوره کړی، او هېڅکله یې دغه یرغل په څرګندو ټکو نه دی غندلی.

د ایران د بهرنیو چارو وزارت وایي، د امریکا وړاندیز ته په ځواب کې یې په سیمه کې د جګړې د پای ته رسولو او په بهرکې د دې هیواد د کنګل شوې شتمنۍ د ازاديدوغوښتنه کړې ده.

د دې وزارت ویاند اسماعیل بقایي د دوشنبې په ورځ په تهران کې په خبري کنفرانس کې وویل: "موږ هېڅ ډول امتیازات نه دي غوښتي. یوازینی شی چې موږ یې غوښتنه کړې د ایران قانوني حقوق وو."

هغه زیاته کړه، "د ایران په غوښتنو کې په سیمه کې د جګړې پای ته رسول، د امریکا د سمندري محاصرې ختمول او د ایرانیانود شتمنیو ازادیدل چې کلونه کلونه په ناحقه په بهرنیو بانکونو کې بند پاتې دي، شامل وو."

د امریکا ولسمشرډونالډ ټرمپ د یکشنبې په ورځ وویل چې د جګړې د پای ته رسولولپاره د امریکا وړاندیز ته د ایران ځواب یې ردکړ او هغه ورته هیڅ د منلو ندی.

په کابل کې د جاپان سفارت د ۲۰۲۷ میلادي کال د تحصیلي بورسونو اعلان کړی دی.

د سفارت په اعلامیه کې چې دوشنبې د می په یولسمه پرخپله ایکسپاڼه کې یې خپره کړې ویل شوي چې د پوهنې، فرهنګ، ورزش او د تکنالوژۍ علومو وزارتونو له لوري په رسمي او غیررسمي توګه هغو افغان محصلانو ته بورسونه برابریږي چې غواړي د جاپان په پوهنتونونو کې د لوړو زده‌ کړو په پروګرامونو کې څیړنیزو زده کړو ته دوام ورکړي.

په اعلامیه کې راغلي چې د جاپان سفارت او د جاپان حکومت په خپلواکه توګه د غوښتنلیکونو د ارزونې او د نوماندانو د غوره کولو د ټولو پړاوونو مسؤلیت لري.

همداراز ویل شوي چې د افغانستان د آغا خان بنسټ به د غوښتنلیکونو په راټولولو او د لیکلي ازموینو د بهیر په اسانتیا کې له سفارت سره مرسته وکړي، خو د نوماندانو د غوره کولو په برخه کې به هېڅ مسؤلیت ونه لري.

اعلامیه زیاتوي چې دغه بورسونه وړیا دي او ټول لګښتونه یې د جاپان له خوا تمویلېږي.

جاپان افغان ښځینه او نارینه محصلینوته د بورسونو دا لړۍ داسې مهال اعلانوي چې پرافغانستان د طالبانو له واکمنیدو راهیسې په دې هیواد کې نجونې له شپږم ټولګي پورته ښوونځیو او پوهنتونونو ته له تلو راګرځول شوې دي.

په جلاوطنۍ کې د افغانستان د کرکټ ښځینه ټیم غړې د کرکټ له نړیوالې شورا ICC غواړي چې ورته اجازه ورکړي چې د افغانستان په استازیتوب نړیوالو لوبو کې ګډون وکړي.

د دې ټیم غړې شفیقه خان چې اوس د اسټرالیا په کانبیرا کې اوسي اې بي سي نیوز ته ویلي چې ICC دې د فوټبال د نړیوال فدراسیون، فیفا په څیرچې له هیواده بهر د افغانستان د فوټبال ښځینه ټیم ته یې اجازه ورکړې، د دوی د کرکټ ټیم ته هم اجازه ورکړي چې په نړیوالو لوبو کې د افغانستان په استازیتوب ولوبیږي. هغې ویلي، د فیفا پریکړې ډیرو افغان ښځو ته له دې پرته چې دوی چیرې ژوند کوي، ډیرې هیلې ورکړي چې کولای شي د خپل هیواد استازیتوب وکړي او هغه څه تعقیب کړي چې ورسره علاقه لري.

تېر کال د کرکټ نړیوالې شورا اعلان وکړ چې له افغانستانه بهرد افغان ښځینه کرکټ لوبډلې د ملاتړ لپاره به یو مالي صندوق او ځانګړې کاري ډله جوړه کړي. د راپور له مخې پرافغانستان د طالبانو له واکمنیدو راهیسې چې ښځې یې په ټولنه کې د ځینو نورو برخو ترڅنګ له ورزش څخه هم منع کړي، په نړیوالو لوبو کې د دې هیواد د کرکټ د ملي لوبډلې د دوامداره لوبیدا سره دا بحث راپورته شوی چې د دې شورا مقررات ایجابوی چې هرغړی هیواد باید د ښځو ملي لوبډله هم ولري.

د مهاجرت نړیوال سازمان IOM وایي وروستیو ناڅاپي سېلابونو چې د سختو بارانونو له امله رامنځته شوي، په ننګرهار کې شاوخوا ۲۰۰۰ کورنۍ اغېزمنې کړې دي. دغو سیلونو کورونو، د ژوند د عاید سرچینو او شخصي توکو ته زیان رسولی دی.

IOM نن دوشنبې پر خپله ایکسپاڼه په یوه بیان کې یوازې دومره ویلي چې دې سازمان اغېزمنو کورنیو ته مرستې برابرې کړي خو د اړتیاوو ارزونې او د نورو مرستو رسولو چارو ته به دوام ورکړي.

د هغې خبرتیا له مخې چې د طالبانو ترکنټرول لاندې د اوبو او انرژۍ وزارت له خوا خپره شوې د ننګرهار په ګډون نن په یوشمیرولایتونو کې د ورښتونو له کبله د سیلابونو د راوتلو اټکل کړی دی.

د بیان له مخې ننګرهار، بلخ، سمنګان، لوګر، میدان وردګ، کابل، پنجشیر، کاپیسا، پروان، لغمان، کونړ، نورستان، بدخشان، تخار، کندز او بغلان ولایتونو کې د ورښتونو اټکل شوی او ویل شوي چې په ځینو ولایتونو کې به د بارانونو کچه لسوملي مترو او په ځینو نورو کې تر دیرش ملي مترو پورې وي.

وروسته له هغې چې د امریکا ولسمشر ډونالډ ټرمپ د ایران په وړاندې د جګړې د پای ته رسولو لپاره د تهران شرطونه "په بشپړه توګه د نه منلو وړ" وبلل، د دوشنبې په ورځ د اسیا په بازارونو کې د تېلو بیې په چټکۍ سره لوړې شوې.

د برېنټ اومه تیلوبیه سهاروختي د اسیا په بازارونو کې ۴،۶۵ سلنه لوړه شوه او د یوه بیرل بیه یې څه کم سل ډالرو ته ورسېده.

د امریکا د ویسټ ټکزاس انټرمیډیټ (WTI) د تیلو بیه هم څه باندې ۴ سلنه لوړه شوه او د هر بیرل بیه یې څه کم ۱۰۶ ډالرو ته ورسېده. د نړۍ په بازارونو کې د تیلو بیې ځکه لوړې شوي چې پانګه ‌وال اندیښنه لري چې ښایي د هرمز تنګي له لارې د تېلو د عرضې په وړاندې خنډونه ډیرژر لیرې نشي، هغه تنګی چې تهران پرې جزوي محاصره لګولې ده.

په داسې حال کې چې د امریکا ولسمشر ډونالډ ټرمپ د امریکا د سولې وړاندیز ته د تهران ځواب رد کړ او هغه یې "په بشپړه توګه د نه منلو وړ" وباله، د ایران دولتي رسنیو هغه څه خپاره کړل چې ښیي د اسلامي جمهوریت په غوښتنو کې هېڅ نرمښت نه دی راغلی. په دغو غوښتنو کې د جګړې د زیانونو تاوان او د هرمز تنګي کنټرول هم شامل دي.

ټرمپ د مې په ۱۰مه پرخپله ټولنیزه شبکه ټروت سوشیل کې په یوه لنډ بیان کې ولیکل: "ما همدا اوس په اصطلاح د ایران د "استازو" ځواب ولوست. خوښ مې رانغی، په بشپړه توګه د منلو وړ نه دی!"
خو نوموړي دا ونه ویل چې ایا دا به پر ایران د هوايي بریدونو د بېرته پیل لامل شي که نه.
د ټرمپ دغه بیان لږ وروسته له هغې خپور شو چې د ایران نیمه رسمي خبري اژانس تسنیم د ځینو هغو مواردو یادونه وکړه چې د تهران د ځواب شرطونه یې بللي او ویلي و چې د ایران په غوښتنو کې د دې هیواد پر ضد د اوږدمهالو بندیزونو لرې کول، د امریکا د سمندري محاصرې پای ته رسول او د نورو بریدونو د نه کولو تضمینونه شامل دي.

د افغانستان د فوټبال له ۲۰ کلنو کم‌عمره ملي لوبډله سبا سه شنبه له ترکمنستان سره د لوبې ډګر ته ښکته کیږي.

دا لوبه ۲۰۲۶کال د مرکزي اسیا (کافا) سیالیو په لړ کې د افغانستان لومړی لوبه ده.

دغه سیالۍ د تاجیکستان په کوربتوب ‌ د مې له ۱۲مې تر ۱۷مې ترسره کېږي چې د افغانستان، ترکمنستان، تاجیکستان، اوزبېکستان او قرغزستان لوبډلې پکې ګډون کوي.