د اکوادور لویې څارنوالۍ اعلان کړی چې غواړي د دې هېواد د شپاړسو پوځیانو پرضد د څلورو نویو زلمیانو د لادرکه کېدو په قضیه کې د لاس لرلو په تور جنايي دوسیه پرانیزي.

څلور تنه نوي زلمیان چې عمرونه یې د ۱۱ او ۱۵ ترمنځ وو، د روانې ډسمبر میاشتې په اتمه د آرام سمندر په ساحلي ښار ګوایاکیول کې تري تم شول چې د خلکو پراخه غوسه یې وپاروله.

د اکوادور لوی څارنوال پرون پر خپله ایکس پاڼه ولیکل چې له تحقیقي ادارو غواړي چې په دې قضیه کې د تورنو پوځیانو پرضد د جنایي دوسیې د پرانیستو دقیقه نېټه وټاکي.

د اوکراین په کریوي ریه ښار د روسیې له خوا د بالستیک توغندي په یوه برید کې یوتن وژل شوی دی.

اوکرایني چارواکو د مرغومي په ۴مه وویل، دا حمله د استوګنې پر یوه څلور پوړیزه ودانۍ شوې ده. د دنیپرو پیتروفسک والي سیرهي لیساک ویلي چې په دې برید کې یوولس نور کسان هم ټپیان شوي چې اوه تنه یې روغتون ته رسول شوي دي.

د اوکراین د بشري حقونو ټولنې دې برید ته قهرجن غبرګون ښودلی او یادونه یې کړې چې دا برید د عیسویانو د مذهبي جشن کرسمس په ورځ شوی دی.

دا په داسې حال کې ده چې پرون د اوکراین په ختیځ کې د جګړې په لومړۍ کرښه کې د سیالو خواوو ترمنځ د درنو نښتو راپورونه ورکړل شول.

د سوریې د کورنیو رسنیو د راپورونو له مخې د دې هېواد وسله والو ډلو موافقه کړې چې ځواکونه یې د دفاع وزارت په تشکیل کې مدغم شي.

سانا دولتي خبري آژانس پرون راپور ورکړ چې په دې اړه پرېکړه د وسله والو ډلو له استازو سره د سوریې د نوي مشر، احمدالشرع په کتنه کې شوې ده. په دې غونډه کې کرد ځواکونو چې د سوریې د شمال ختیځ ځینې برخې یې په ولکه کې دي، ګډون نه و، کړی.

له دې مخکې احمدالشرع چې به ابومحمدالجولاني مشهور دی، اعلان کړی و، چې په دې هېواد کې ټولې وسلې باید د دولت په کنټرول کې وي.

د هیات تحریر شام په مشرۍ وسله والو ډلو د ډسمبر په اتمه د بشاراسد رژیم وپرځاوه او پر دې هېواد واکمن شول.

لږترلږه ۱۲ کسان نن په ترکیه کې د یوې چاودنې په نتیجه کې ووژل شول.

د ترکیې د دولتي خبري آژانس انادولو د راپور له مخې دا چاودنه د ترکیې په شمال لویدیځ کې د بالیکسیر ولایت د مهماتو جوړولو په یوه کارخونه کې شوې ده چې پنځه نور کسان هم پکې ټپیان شوي دي.

د بالیکسیر والي اسماعیل اسوستااوغلو ویلي دي چې د چاودنې په نتیجه کې د فابریکې ودانۍ ویجاړه شوې او شاوخوا ودانیو ته هم لږ زیان اوښتی دی.

چارواکو ویلي دي چې د پېښې په اړه تحقیقات پیل شوي دي.

ترکیه وايي چې د سوریې څه باندې دوه نیم لکه وګړي په تېرو دوو اونیو کې خپل هېواد ته ستانه شوي دي.

د ترکیې د کورنیوچارو وزیر علي یرلي کایا نن (د مرغومي ۴مه) په دې اړه انادولو دولتي خبري آژانس ته څرګندونې وکړې. ترکیې د بل هر هېواد پر تله ډېرو سوري کډوالو ته ځای ورکړی و.

د ملګروملتونو د ارقامو له مخې د سوریې شاوخوا درې میلیون وګړي اوس مهال په ترکیه کې دېره دي. د هیات تحریر شام په مشرۍ وسله والې ډلې د ډسمبر په اتمه د سوریې پلازمېنه دمشق ته ننوتې او د بشارالاسد رژیم یې وپرځاوه چې له دې سره په ترکیه، عراق او لبنان کې دېره ګڼ شمېر سوري کډوالو له ځمکنیو سرحدونو څخه خپل هېواد ته ستانه شول.

د روسیې یوې محکمې امریکایی وګړی ایفګیني سپکتور چې مخکې هم بندي و، د جاسوسۍ په تور په ۱۳ کاله بند محکوم کړی دی.

د روسیې دولتي خبري آژانسونو نن (د مرغومي ۴مه) راپور ورکړ چې سپکتور یو کال مخکې هم د بډو د ورکولو په قضیه کې په درې کاله بند محکوم شوی و. د تاس خبري آژانس د راپور له مخې د محکمې قاضي پرېکړه کړې ده چې نوموړی د دواړو جرمونو په خاطر په ۱۵ کاله بند محکوم کړي.

د راپورونو له مخې سپکټور په ۲۰۲۱ کال کې، مخکې له دې چې ونیول شي، د سرطان پرضد د روغتیايي تجهیزاتو د جوړولو د یوې فابریکې د مراقبت د کمیټې د مشر په توګه کار کاوه. راپورونه زیاتوي دې امریکایی وګړي د خپلې محاکمې په لومړۍ دوسیه کې د روسیې د صدراعظم د پخواني مرستیال سکرټر ته د بدو د ورکولو تور منلی و.

د اوکراین په ختیځ کې د روسي او اوکرایني ځواکونو ترمنځ د تازه نښتو راپورونه رارسېږي.

د اوکرایني ځواکونو ستردرستیز نن (د ډسمبر ۲۴مه) په یوه بیان کې وویل چې تر نن سهار وختي پورې یې د جګړې له لومړۍ کرښې څخه د شاوخوا ۲۳۵ نښتو خبرونه ترلاسه کړي دي.

په بیان کې د خارکییف، کوپیانسک او دونېڅک په استقامتونو کې د درنو جګړو خبر ورکړل شوی دی. بیان زیاتوي چې روسیې په دې جګړو کې خپل ۱۶۰۰ سرتېري او دېرش زغره والې وسلې له لاسه ورکړې دي.

دا ادعا خپلواکو سرچینو نه ده تایید کړې او مسکو هم ډېر کله په جګړه کې د خپلو سرتېرو د مرګ ژوبلې په اړه څه نه وايي.

د ملګروملتونو هغه اداره چې په سوریه کې د جنګي جرمونو په اړه څېړني کوي، وايي، د سوریې نوي واکمن دې ته ډېر لېوال دي چې د بشارالاسد د رژيم له خوا د شویو جرمونو په اړه په تحقیقاتو کې همکاري وکړي.

د سوریې لپاره د نړیوال، بې پرې او خپلواک میکانیزم د ادارې پلاوي پرون دمشق ته خپل سفر پای ته ورساوه. د دې ادارې مشر رابرت پیتیت د دې سفر پرمهال د شویو جنایتونو د اسنادو او نورو شواهدو د خوندي کولو پر اړتیا ټینګار وکړ.

دا ځانګړې اداره د ملګروملتونو عمومي اسمبلې په ۲۰۱۶ کال کې جوړه کړه او دا لومړی ځل دی چې پلاوی یې سوریې ته ځي. د دې ادارې د جوړېدو هدف د سوریې د کورنۍ جګړې پرمهال چې په ۲۰۱۱ کال کې پیل شوه، د احتمالي جنګي جرمونو، د بشريت ضد جنایتونو او نسل وژنې یا جینوساید په اړه د شواهدو له راټولولو او د دې جنایتونو د عاملانو له تعقیب او محاکمې سره مرسته وه.

د جنوبي کوریا پوځ وايي، داسې ښکاري چې شمالي کوریا د اوکرایین په جګړه کې د روسیې په ګټه د خپلو پوځیانو او وسلو په تیارۍ لیګا ده.

جنوبي کوریا ویلي، شمالي کوریا غواړي ډیر شمیر پوځیان، بې پیلوټه الوتکې او نورې وسلې روسیه ته ورکړي، څو د اوکرایین په جګړه کې ترې ګټه واخلي.

د ازادي راډیو د مرکزي څانګې د راپور پر بنسټ، د جنوبي کوریا لوی درستیز د دوشنبې په ورځ په یو بیان کې وویل، شمالي کوریا تراوسه ۲۴۰ میلي متره توغندي، ۱۷۰ میلي متره خودکاره توغندي، لېرې واټن وشتونکې توغندي، زرهي موټرې او نور پوځي تجهیزات روسیې ته سپارلي دي.

لودیز او جنوبي کوریا په ګډه تایید کړې چې دا مهال په اوکرایین کې د شمالي کوریا ۱۲زره پوځیان د روسیې په ګټه جنګیږي.

د جنوبي کوریا د امنیت ادارې تیره اونۍ ویلي و، په اوکرایین د شمالي کوریه شاوخوا سل تیري وژل شوي او له زرو ډیر نور ټپیان دي.

شمالي کوریا د دوستانه ستراتیژایک هوکره لیک له مخې اوکرایین ته له روسیې پوځیان ګډ خپل پوځیان لیږلي او د اوکرایین پرضد جګړه کوي

کریملین وايي، د ولسمشر ولادیمیر پوتین او د امریکا د منتخب ولسمشر ډونالډټرمپ ترمنځ تردې دمه د خبرو کوم پلان نه شته.

ښاغلي ټرمپ پرون د محافظه کارانو لویې غونډې ته وویل، پوتین ده ته ویلي دي چې غواړي ژرترژره خبرې ورسره وکړي.

د کریملین ویاند دیمیتري پیسکوف نن د روسیې تاس خبري آژانس ته وویل په راروانه جنوري میاشت کې د ټرمپ له لوړې مخکې په دې اړوند کومه خبره نه ده شوې.

پر اوکراین د روسیې د یرغل موضوع په دې وروستیو کې چې روسیې د بې پیلوټه الوتکو او توغندیو حملو ته زور ورکړی، بیا توده شوې ده.

پوتین تېره اونۍ د پوښتنو او ځوابونو په کلنۍ غونډه کې، په دې اړه چې آیا روسیه په احتمالي خبرو کې امتیاز ورکولو ته چمتو ده که نه، څو ځلې ټینګار وکړ چې هېواد یې جوړ جاړي ته تیار دی، خو ورسره یې ګڼ شرطونه هم مطرح کړل.