د اروپايي ټولنې د بهرنیو اړیکو مسوولې کایا کالاس د سوریې د پرمختګونو په اړه په غبرګون کې ویلي، د اسد د دیکتاتورۍ پای یو مثبت او د توقع وړ بدلون دی.

نوموړې دغه‌راز ويلي، دا تحول د اسد د ملاتړکوونکو، روسیې او ایران، د کمزورتیا څرګندونه کوي.

کایا کالاس د یک‌‌شنبې په ورځ په ایکس‌پاڼه کې په یوه پوسټ کې همداراز لیکلي: "زموږ لومړیتوب په سیمه کې د امنیت ټینګښت دی. زه به له ټولو رغنده شریکانو سره په سوریه او سیمه کې کار وکړم."

د بشارالاسد حکومت له ۲۴کلونو وروسته نن يک‌شنبه وپرځېد او نوموړی نن له سوريې وتلی او نامعلوم لوري ته تللی.

په پاکستان کې وروسته له دې چې د دې هېواد الوتکو پر افغانستان هوايي برید وکړ، کلک امنیتي تدابیر نیول شوي دي.

د رویټرز خبري آژانس د راپور له مخې د پاکستان د کورنیوچارو وزارت مرستیال طلال چودري نن وویل، پر ننګرهار او پکتیکا ولایتونو د شنبې ورځې له حملو وروسته په پاکستان کې چارواکو امنیتي تدابیر پیاوړي کړي او لسګونه مشکوک کسان یې نیولي دي.

ښاغلی چودري زیاتوي چې کله هم دوی په افغانستان کې، د ده په وینا پر وسله والو ډلو برید کړی نو هغو غبرګون ښودلی. چودري رویټرز ته ویلي چې پاکستاني امنیتي ځواکونه د تیارسۍ په حال کې دي څو د احتمالي بریدونو مخنیوی وکړي.

په پاکستان کې په وروستیو کې څو تروریستي حملې وشوې. په دې ترڅ کې د سه شنبې په ورځ د خیبرپښتونخوا په کوهاټ او د پنجاب په بهکر سیمو کې حملې وشوې چې په یوه کې پنځه پولیس او دوه ملکیان او په دوهمه کې دوه پولیس ووژل شول.

د پاکستان حکومت وايي دا حملې د پاکستاني طالبانو په ګډون هغه ډلې کوي چې مرکزونه یې په افغانستان کې دي، خو د طالبانو حکومت وايي هېڅ یوې ډلې ته اجازه نه ورکوي چې د کوم هېواد امنیت وګواښي او وايي پاکستان دې د خپلو ناکامیو پړه پر افغانستان نه اچوي.

دا په داسې حال کې ده چې طالبانو او پاکستاني چارواکو پرون تایید کړه چې ځواکونو یې تېره شپه د ډیورنډ کرښې په اوږدو کې نښتې کړې دي.

ښاغلي ټرمپ د فبروري په ۲۴مه د امریکا د کانګرس دواړو خونو ته په څه کم دوه ساعته وینا کې چې د امریکا په تاریخ کې د یوه ولسمشر تر ټولو اوږده وینا وه د ایران په اړه ډېر وغږېد او ویې ویل، ایران ته د تېرځل حملې پرمهال خبرداری ورکړل شوی و، چې په راتلونکي کې هېڅکله د وسلو په تېره د اټومي وسلو د جوړولو د پروګرام د بیارغونې هڅه ونه کړي، خو د ده په وینا ایران دا هڅې بیا پیل کړې.

ټرمپ وویل زما لومړیتوب ډیپلوماسي ده خو یوه خبره دې روښانه وي چې زه به هېڅکله د تروریزم لومړۍ درجه پالونکي ته چې اوس مهال د اټومي وسلو جوړول غواړي د دې کار اجازه ورنه کړم.

د امریکا ولسمشر دا څرګندونې داسې مهال کوي چې د تهران او واشنګټن ترمنځ د روانې فبروري میاشتې په ۲۶مه د خبرو د بل پړاو له پیل مخکې د امریکا پوځ په منځني ختیځ کې خپلې جنګي کشتۍ او تجهیزات ځای پرځای کړي دي.

د ایران د بهرنیوچارو وزارت ویاند اسماعیل بقايي پر ټولنیزو شبکو په یوه بیان کې چې ظاهرا د ټرمپ د وینا په ځواب کې یې خپور کړی، ویلي هغه ادعاوې چې د ولسمشر ټرمپ اداره یې د ایران د اټومي پروګرام، بالستیک توغندیو او په دې هېواد کې د تېرې جنوري میاشتې د اعتراضونو د قربانیانو د شمېر په اړه کړې دي، یوازې د لویو درواغو تکرار دي.

ښاغلي ټرمپ همداراز د خپلې وینا په بله برخه کې ژمنه وکړه چې د اوکراین د جګړې د ختمولو لپاره به خبرو ته دوام ورکړي.

نن چهارشنبې د کرکټ په شل اووریز نړیوال جام کې سریلانکا له نیوزیلنډ سره لوبه لري.

په دغه جام کې پرون سه شنبې د انګلستان لوبډلې پاکستان ته په دوو ویکټو ماتې ورکړه.

پاکستانۍ لوبډلې په ټاکلو شویو شل اورونو کې ۱۶۴منډې د انګلستان لپاره هدف ټاکلي و.

انګلستان په ۱۹ اوور کې د ۸ لوبغاړو په سوځیدو سره ورکړل شوي هدف پوره کړ.

افغانستان د ګروپي لوبو په پړاو کې وروسته له هغه له نړیوال جام څخه ووت چې جنوبي افریقا او نیوزیلنډ ته یې خپلې لوبې وبایللې خو افغان لوبډلې له کاناډا او متحده عربي اماراتو څخه لوبې وګټلې.

پاکستاني چارواکي وايي چې د خیبرپښتونخوا په کوهاټ ولسوالۍ کې د ناپېژاندو وسله والو په برید کې لږترلږه اوه کسان وژل شوي او درې نور ټپیان دي.

د کوهاټ د پولیسو ویاند نعمان زېب نن سه شنبې (د کب ۵مه) د آزادۍ راډیو مشال څانګې ته وویل چې وسله والو د کوهاټ د لاچي سیمې د شکردرې پر سړک د پولیسو پر یوه موټر برید وکړ چې په نتیجه کې یې د اسد په نوم د پولیسو یو چارواکی او څلور نور پولیس ووژل شول.

نوموړي زیاته کړه چې په دې پېښه کې دوه ولسي وګړې هم وژل شوي دي.

په خیبرپښتوخوا کې پر امنیتي ځواکونو وسله وال بریدونه په دې وروستیو کې زیات شوي چې د ډېرو پړه د پاکستاني طالبانو تحریک یا ټي ټي پي منلې ده.

د نننۍ حملې پړه تراوسه کومې ډلې نه ده منلې.

د کرکټ د شل اووریز نړیوال جام د لوبو په لړۍ کې نن (د کب ۵مه) د پاکستان او انګلستان لوبډلې سره مخامخ کېږي.

دا لوبه د کابل په وخت د ماښام په شپږو بجو د سریلانکا د بولوګولا په لوبغالي کې په پام کې ده.

د هند او سریلانکا په کوربه توب د شل اووریز کرکټ د نړیوال جام د لوبو په دوام ټاکل شوې چې سبا چارشنبې د سریلانکا او نیوزیلنډ لوبډلې لوبه وکړي.

افغانستان د ګروپي لوبو په پړاو کې وروسته له هغه له نړیوال جام څخه ووت چې جنوبي افریقا او نیوزیلنډ ته یې خپلې لوبې وبایللې خو افغان لوبډلې له کاناډا او متحده عربي اماراتو څخه لوبې وګټلې.

د واشنګټن او تهران په اړیکو کې د ترینګلتیا او د دواړو خواوو ترمنځ د احتمالي جګړې د پیل په اړه د اټکلونو له زیاتېدو وروسته یوه جګپوړي امریکايي چارواکي په بیروت کې د متحدوایالتونو د سفارت د غیرضروري پرسونل او د سفارت د کارکوونکو د کورنیو د وتلو خبر ورکړی دی.

د رویټرز خبري آژانس د راپور له مخې دې مقام د دوشنبې په ورځ (د کب ۴مه) د خپل نوم د نه ښودلو په شرط په دې اړه څرګندونې کړې دي.

یاد چارواکي ویلي دي چې د سفارت د کارکوونکو د شمېر د کمولو پرېکړه د سیمې د امنیتي وضعیت د وروستیو ارزونو په اساس شوې ده. هغه یادونه کړې چې دا اقدام د لنډ وخت لپاره دی او د لبنان په پلازمېنه کې د امریکا د سفارت چارې به دوام وکړي.

له بلې خوا په بیروت کې د امریکا د سفارت یوې سرچینې رویټرز ته ویلي دي چې د امریکا د سفارت اړوند پنځوس کسان له لبنان څخه ایستل شوي دي.

د بیروت د هوايي ډګر یوه چارواکي ویلي دي چې د دوشنبې په ورځ د سفارت ۳۲ کارکوونکي له خپلو کورنیو سره له لبنان څخه ووتل.

د امریکا د بهرنیوچارو وزارت د دوشنبې په ورځ لبنان ته د امریکايي وګړو د سفر په اړه خپله سپارښتنه یوځل بیا نوې کړه او له امریکايانو څخه یې وغوښتل چې لبنان ته له سفر کولو ډډه وکړي.

اوکراین نن د روسیې د یرغل پر وړاندې د جګړې پنځم کال پیل کړ. د اوکراین جګړه له دوهمې نړیوالې جګړې وروسته د اروپا تر ټولو لویه جګړه ده.

د ۲۰۲۲ کال د فبروري په ۲۴مه روسیې، د اوکراین پرضد پراخ پوځي یرغل پیل کړ چې تراوسه پورې روان دی.

د دې جګړې د مرګ ژوبلې په اړه ورکړل شوي ارقام ضد ونقیض دي خو په یوه وروستي راپور کې د وژل شویو، ټپیانو او لادرکه روسانو شمېر شاوخوا ۱۲ لکه او د همدې ډلې اوکراینیانو شمېر د پنځو او شپږ لکو ترمنځ ښودل شوی دی.

همداراز د اوکراین د جګړې په نتیجه کې میلیونونه اوکراینیان له خپلو کورونو بېځایه شوي دي.

نړیوال بانک د اوکراین د جګړې د پنځم کال د پیل په مناسبت ویلي دي چې د اوکراین د ځپل شوي اقتصاد رغونه ۵۸۸ میلیارد ډالرو ته اړتیا لري خو نړیوال بانک زیاتوي چې د بیارغونې د پیل لپاره جګړه باید پای ته ورسېږي.

په داسې حال کې چې رپوټونه وايی ټرمپ په ایران باندې یو برید ته لیوالتیا ښودلې ،هند له خپلو اتباعو غوښتي چې سمدلاسه له ایران څخه ووځي.

د هند حکومت یو ځل بیا په ایران کې خپلو اتباعو ته سپارښتنه وکړه چې ژر تر ژره له دغه هیواده ووځي.

په تهران کې د هند سفارت د دوشنبې په ورځ په یوه نوې اعلامیه کې له خپلو اتباعو څخه غوښتنه وکړه چې خپل هیواد ته د ستنیدو لپاره د سوداګریزو الوتنو په ګډون د ترانسپورت له ټولو شته لارو څخه کار واخلي.

دا سپارښتنه په منځني ختیځ کې د جګړې د احتمال او د تهران او واشنګټن ترمنځ د کړکیچ د زیاتیدو د اندیښنو په ترځ کې راځي.

په اعلامیه کې په ایران کې له ټولو هندي اتباعو څخه داهم غوښتل شوي چې په غونډو یا لاریونونو کې له ګډون څخه ډډه وکړي، په ایران کې د هند سفارت سره په تماس کې پاتې شي، او د ممکنه پرمختګونو لپاره سیمه ایزې رسنۍ تعقیب کړي.

بلخوا ، نیویارک ټایمز د امریکا د حکومت د سرچینو په حواله راپور ورکړی چې د امریکا ولسمشر ډونالډ ټرمپ په راتلونکو ورځو کې پر ایران یوهدفمند برید ته لیوالتیا څرګنده کړې ترڅو د ایران حکومت ته وښيي چې باید د اټومي وسلو د جوړولو له وړتیا په بشپړه توګه لاس واخلي.

اروپايي اتحادیې په روسیه باندې د نویو بندیزونو په اړه موافقه ونکړه.

پلان شوې وه چې دغه بندیزونه د روسیې لخوا په اوکراین باندې د بشپړ برید د څلورمې کلیزې په مناسبت پلي شي .

د دوشنبې په ورځ په بروکسل کې داروپايي اتحادیې د بهرنیو چارو وزیرانو غونډه، د هنګري او سلواکیا د مخالفت له امله موافقې ته ونه رسیده.

د اروپايي اتحادیې د بهرنۍ پالیسۍ د ادارې مشرې کایا کالاس وویل: " دیته په کتو چې سبا د جګړې د پیل غمجنه کالیزه ده ، زه واقعا خواشینې یم چې موږ نن موافقې ته ونه رسیدو ، ځکه چې موږ باید اوکراین ته د ملاتړ یو پیاوړی پیغام واستوو - او همدارنګه په روسیه باندې قوي فشار راوړو."

میرمن کالاس زیاته کړه چې په روسیه باندې د اروپايي اتحادیې د بندیزونو په دغې بستې باندې کار به دوام ولري.

روسیه باندې د نویو بندیزونو په وړاندې د هنګري او سلواکیا مخالفت خپله بندیزونو سره تړاو نلري بلکه د اوکراین له لارې د مرکزي اروپا دغو دواړو هیوادونو ته د " دروژبا" پایپ لاین څخه د د روسي تیلو د وارداتو د دریدو سره تړاو لري چې دتیرې جنوري میاشتې راهیسې د پایپ لاین د ویجاړې له امله دریدلې دي.

بوداپست وايي ترڅو چې اوکراین د غه پایپ لاین نه وي پرانیستی په روسیې نوي بندیزونه به ونه مني.

د ملګرو ملتونو د عمومي اسمبلې مشرې انالینا بربوک په افغانستان کې له کار او زده کړو د ښځو او نجونو محرومیت د بشري حقونو تر ټولو کلکه سرغړونه وبلله.

هغې نن دوشنبه په جنوا کې د ملګرو ملتونو د بشري حقونو شورا ۶۱ ناستې ته خپله وینا د افغان ښځو او نجونو د حقونو په موضوع پیل کړه.
بربوک تر دې مخکې د جرمني د بهرنیو چارو وزیره وه. هغې د وزارت پر مهال هم د افغان ښځو او نجونو د حقونو د نقض په تړاو خپل غږ پورته کړی وو.

اغلې بربوک دغو بشري حقونو سرغړونو ته په پام چې د دې په خبره ځینې یې جنسیتي اپارتاید بولي نړیوالې ټولنې ته د طالبانو په وړاندې د نرم چلند خبرداری ورکړ.

اغلې بربوک وویل هغه تصور چې د کندهار د طالبانو په پرتله د کابل ډله معتدله دي ناسم ختلی دی.

د ملګرو ملتونو دې جګپوړې چارواکې همداراز وویل دوی په دې بحثونه کوي چې څنګه افغانستان کې اړمنو ته بشري مرستې ورسوي دې ته په پام چې د ملګرو ملتونو د دفاترو په ګډون افغان ښځې له کار کولو منع شوي دي.