د اروپایي ټولنې د عدلیې او کورنیو چارو وزیرانو هوکړه وکړه چې رومانیا او بلغاریا به د جنوري له لومړۍ نیټې څخه د دې ټولنې په شینګن زون کې شامل شي

د شینګین زون د غړیو هېوادونو وګړي او هغه کسان چې د دغه زون د غړیو هیوادونو اوږدمهالې وېزې لري، د زون ټولو هیوادونو ته بې وېزې سفر کولی شي.

اروپایي شورا دا پریکړه نن په اروپايي ټولنه کې د رومانیا او بلغاریا له غړیتوب څخه نژدې اتلس کاله وروسته اعلان کړه. دواړو هېوادونو لپه تېرو ۱۵ کلونو کې په شینګڼ زون کې د شمولیت لپاره ټاکلي تخنیکي معیارونه پوره کړي دي.

د هنګري د کورنیو چارو وزیر ساندور پینټر چې هیواد یې د اروپایي ټولنې دوره يي مشري کوي دا پریکړه تاریخي وبلله چې بلغاریا او رومانیا د شینګین له زون سره یوځای شول.

له بلغاریا او رومانیا سره د اروپایي ټولنې د اووه ویشت غړیو هیوادونو له ډلې پنځه ویشت د شینګین غړي شول چې استوګن یې له ویزو پرته دغو هیوادو ترمنځ سفر کولی شي. اوس یوازې قبرس او ایرلنډ پاتې دي چې د شینګین بشپړ غړيتوب ترلاسه کړي.

د ماشومانو د ژغورنې نړیوال سازمان وايي، د یونان د کډوالو په کمپونو کې د افغانانو په ګډون ماشومان له سخت وضعیت سره مخامخ دي.

د سیف د چیلډرن په یو نوي خپور شوي راپور کې راغلي چې د کډوالو لپاره د یونان شورا د دې هېواد د کډوالو په کمپونو کې هغه ترخه واقعیتونه په ګوته کړي چې ماشومان ورسره لاس و ګرېوان دي.

د ماشومانو د ژغورنې نړیوال سازمان وویل، په ۲۰۲۴ کال کې یونان ته د ماشومانو راتګ دوه چنده زیات شوی دی.

د ماشومانو د ژغورنې نړیوال سازمان وايي، د ۲۰۲۴ کال په لومړیو ۱۱ میاشتو کې یونان ته د کډوالو راتګ ډېر شوی، چې د کال په لومړیو ۱۱ میاشتو کې تر ۵۷۳۰۰ اوښتی دی.

دغه سازمان زیاتوي، سږ کال تر ۱۳۰۰۰ ډېر ماشومان د سمندر له لارې یونان ته رسېدلي، چې د تېر کال په پرتله ۵۰ سلنه ډېر دي. له ترکیې یونان ته په اوښتونکو کډوالو کې ګڼ شمېر افغان کډوال هم شامل دي.

د اوکراین په زاپوریژیا ښارکې پر یوه کلینیک د روسیې په برید کې د وژل شویو کسانو شمیر ۸ تنو ته رسیدلی دی.

د اوکراین د بیړنیو خدمتونو ادارې نن چهارشنبې په یوه بیان کې وویل، په دې برید کې ۲۲ کسان ټپیان شوي هم دي.

د دې ادارې په خبره، ژغورونکي تراوسه د پیښې په ځای کې عملیات مخ ته وړي. روسیې په دې وروستیو کې د اوکراین پر ښارونو او د انرژۍ پرتاسیساتو د بې پیلوټه الوتکو او توغندیو بریدونه زیات کړي دي. په عین حال کې د اوکراین ولسمشرولودمیرزیلینسکي پرون سې شنبې له خپلو متحدینو وغوښتل چې د لسو او دولسو ترمنځ د هوایي مدافعې نور پټرویټ سیسټمونه ورکړي څو وکولای شي چې د روسیې د بریدونو په وړاندې خپل هوایي قلمرو په بشپړه توګه خوندي کړي.

خامنه یې نن چهارشنبه ( د لیندۍ ۲۱مه) د ایران دولتي تلویزیون سره په خبرو کې، بې له دې چې د کوم بل هېواد نوم واخلي، وویل چې یوه ګاونډي هم په دې تحول کې لاس درلود.

د ډي.پي.اې خبري اژانس د راپور له مخې په ظاهره د خامنه یي اشاره ترکیې ته وه چې د سوریې د پخواني حکومت د مخالفانو ملاتړ یې کاوه.

ایران او روسیه بیا هغه هېوادونه وو چې د بشارالاسد په مشرۍ د سوریې د پرزیدلي حکومت ملاتړ یې کاوه.

خامنه یي ټینګار وکړ چې د بشار الاسد د حکومت سقوط د ایران د کمزورۍ په معنا نه ده، د هغه په خبره، ایران پياوړی او ځواکمن دی او نور به هم پياوړی شي.

تر دې وړاندې د امریکا منتخب ولسمشر ډونالډ ټرمپ ویلي و چې ایران او روسیه کمزوري موقف کې دي او له همدې کبله یې د اسد د حکومت ملاتړ هم ونه شو کړای.

د سوریې نوي صدراعظم چې د بشاراسد د رژیم له پرځېدو وروسته به د انتقالي دورې مشري کوي ویلي دي چې د دې هېواد د ثبات او آرامۍ وخت رارسېدلی دی.

پر دمشق واکمنو وسله والو ډلو محمدالبشیر د انتقالي حکومت د صدراعظم په توګه ټاکلی دی څو د ۲۰۲۵ کال د فبروري میاشتې ترپایه سوریه اداره کړي.

ښاغلي بشیر د صدراعظم په توګه له ټاکل کېدو وروسته په خپله لومړنۍ مرکه کې الجزیرې ټلویزیون ته وویل، هغه وخت رارسېدلی دی چې د سوریې خلک په ثبات او امنیت کې ژوند وکړي.

تېره یکشنبې دمشق ته د هیات تحریر شام په مشرۍ د وسله والو ډلو له رسېدو او مسکو ته د بشارالاسد له تېښتې وروسته په سوریه کې د اسد د کورنۍ له نېمې پېړۍ ډېره واکمني پای ته ورسېده.

بېګا دیارلسمه پرله پسې شپه وه چې په اروپايي ټولنه کې د ګرجستان د غړیتوب پلوي معترضانو د پلازمېنې تبلیسي په واټونو کې تېره کړه.

شاوخوا ۴ زره کسان چې ډېرو یې د اروپايي ټولنې او ګرجستان بیرغونه رپول د حکومت د هغې پرېکړې پر وړاندې د غبرګون لپاره د پارلمان د وانۍ مخې ته راټول شول چې غواړي لږترلږه تر ۲۰۲۸ کال پورې په اروپايي ټولنه کې د ګرجستان د غړیتوب د غوښتنې اړوند خبرې وځنډوي.

په همدې حال کې اروپايي ټولنې، د ګرجستان د هیلو د ګوند په مشرۍ حکومت ته له ډیموکراسۍ د په شا کېدو او د مخالفانو پرضد د ځپونکو تاکتیکونو د کارولو د عواقبو خبرداری ورکړی.

اروپايي ټولنې پرون په یوه بیان کې وویل، د حکومت دا اقدامات د دوه اړخیزو اړیکو لپاره ناوړه عواقب لرلای شي. د اروپايي ټولنې د بهرنیوچارو وزیرانو ویلي چې د ډسمبر په ۱۶مه به په خپله غونډه کې د ګرجستاني چارواکو پروړاندې د اقداماتو په اړه بحث وکړي.

د جنوبي کوریا د دفاع پخوانی وزیر د دې هیواد له ولسمشراونورو چارواکو سره د پوځي حالت په اعلانولو کې د همکارۍ په تور ونیول شو.

د اسوشیتید پرس خبري آژانس د راپورله مخې د سیول د مرکزي برخې محکمې د بغاوت او له قدرت څخه د ناوړه استفادې په تور د کیم یونګ هیون د نیولو حکم صادرکړ.

د جنوبي کوریا د عدلیې وزارت د جنوبي کوریا ولسمشریون سوک یول او د هغه همکارانو ته د جنایي تحقیقاتو او استیضاح دوسیې پرانیستي دي او هغوی یې له هیواد څخه له وتلو منع کړي دي.

د جنوبي کوریا د ولسمشرله خوا تیره اونۍ په هیواد کې د پوځي حالت اعلان چې په څه باندې څلورو لسیزو کې لومړی ځل و، یوازې شپږساعته دوام وکړ.

دغه حالت په هیواد کې دننه سخت اعتراضونه پارولي و چې پارلمان هغه لغوه کړ.

د امریکا متحدو ایالتونو پرون سې شنبې اعلان وکړچې اوکراین ته شل ملیارډ ډالر پور ورکوي او دا روسیې د هغې شتمنۍ د ګټې پیسې دي چې په متحدو ایالتونو کې کنګل شوې ده.

د ولسمشرجوبایډن ادارې ژمنه کړې چې دغه پور به د روان کال ترپای ته رسیدو مخکې کییف ته ورکړي. داسې اندیښنې شته چې د امریکا منتخب ولسمشرډونالډ ټرمپ به چې د راتلونکې کال د جنوري په شلمه د چارو واګې له بایډن څخه ترلاسه کوي، له اوکراین څخه د امریکا پرملاتړ لاس ونیسي.

له کییف سره د واشنګټن دغه نوې مرسته د هغو پنځوس ملیاډ ډالرو مرستې یوه برخه ده چې د روان کال په دوبي کې د پرمختللو اوو هیوادونو ډلې، G7 له اوکراین سره ژمنه کړې وه.

نتنیاهو د تل ابیب یوې محکمې ته وویل چې پر ده د بډو، درغلۍ او له اعتماد څخه د ناوړه ګټې اخیستنې لګېدلي تورونه بې معنا دي.

هغه ژمنه وکړه چې په روان قضايي بهیر کې به د ده څرګندونې ترټولو باوري وي.

نتنیاهو د اسراییلو لومړنی برحاله ولسمشر دی چې د جنایي تورنو په خاطر په محکمه کې خپله دفاع کوي او دا په داسې حال کې ده چې د جرمونو نړیوالې محکمې هم د هغه د نیولو حکم ورکړی دی.

په عین حال کې اسراییلي جنګي الوتکو د بشار اسد د حکومت له نسکورېدو او د سوریې او اسراییل ترمنځ حایل سیمې ته د اسراییلي سرتېرو له ننوتو وروسته په سوریه کې هوايي حملې کړې دي. اسراییلو په عین حال کې هغه راپورونه رد کړي چې وايي، اسراییلي ځواکونو د دمشق پر لور د پرمختګ په حال کې دي.

د اروپا د فضايي تحقیقاتو یوه شرکت مایا سپېس Maiaspace هڅې ګړندۍ کړي څو هغه ډول راکټ جوړ کړي چې بیا بیا کار ترې اخیستل کېدی شي.

د مایا سپېس څېړونکو د فرانسې د نورماندي سیمې د ویرنون Vernon ښار په غرنيو ځنګلونو کې یو فولادي سلندر د هغه لوی راکټ له ځانګړو برخو سره ونښلاوه چې د بیا کارولو وړتیا به ولري.

اروپا هیله لري چې د دوی دا پروژه به د امریکايي میلیاردر ایلان ماسک د ناڅاپي پرمختګ مخه ونیسي. مایا سپېس د اروپا د راکټ جوړولو د لوی شرکت اریان ګروپ یوه څانګه ده چې یوازې دوه کاله عمر لري او اوس هغه پړاو ته رسېدلې ده چې د اروپا د لومړني بیا کارېدونکي فضايي راکټ د جوړولو پلان لري.

دا راکټ چې په ۲۰۲۶ کال کې به وتوغول شي تر ډېره فضا ته د وړو سپوږمکیو د استولو لپاره پلان شوی دی.