د افغانستان د ازادو مبارزو بهر مېشي لوبغاړي فرید بشارت خپل برازیلي سیال وېکټور هوګو ته ماتې ورکړه.

دغه سیالي نن شنبه د اکټوبر په ۲۶مه نېټه د ابوظبۍ په ښار کې د کابل پر وخت د شپې ناوخته ترسره شوه.

یاده سیالي د ازادو مبارزو د یو‌ایف‌سي په سازمان کې ترسره شوه.

دا په ازادو مبارزو کې د فرید بشارت ۱۳مه بریا وه، هغه لا کومه سیالي نه‌ده بایللې.

پر ایران د اسراییلو د هوايي بریدونو له رسمي اعلان وروسته، د طالبانو حکومت د بهرنیو چارو وزارت دا بریدونه غندلی دی.

دې وزارت نن د (اکټوبر ۲۶مه) په یو بیان کې د اسراییلو دا بریدونو د ایران د حریم ښکاره نقض او په سیمه کې د کړکېچ او تاوتریخولي زیاتېدل یاد کړي دي.

د اسراییلو پوځ نن سهار د ایران د پلازمېنې تهران په ګډون په یوشمېر سیمو کې پوځي اهداف په نښه کړل.

دې بریدونو ته د غبرګونونو په پیل کې د بريتانيه صدراعظم کییرسټارمر ویلي وو، ایران باید د اسراییلو بریدونو ته ځواب ور نه‌کړي.

سټارمر له دواړو خواو د زغم غوښتنه کړې وه.

د سپینې ماڼۍ د ملي امنیت د شورا ویاند شان ساوت ویلي، په پوځي اهدافو بریدونه، د اکتوبر په لومړۍ نېټې پر اسراییل د ایران د بالستیک توغندیو د برید په ځواب کې د ځان دفاع ده.

هغه ویلي، امریکا په‌دې عملیاتو کې ګډون نه درلود، او له ایرانه يې غوښتي چې په سیمه کې د شخړې د پراخېدو د مخنیوي په موخه دې پر اسراییلو ځوابي برید نه‌کوي.

د افغانستان کرکټ بورډ ادارې ویلي دي، د راتلونکې نومبر میاشتې په لومړۍ اوونۍ کې به د بنګله‌دېش ملي لوبډلې پر وړاندې درې یو ورځنۍ سیالۍ ترسره کړي.

د یادې ادارې په خبر کې ویل شوي دي چې، د لوبډلې یو‌شمېر لوبغاړي یې د یادو سیالیو په موخه د عربي متحده اماراتو د شارجې ښار ته رسېدلي دي.

د کرکټ بورډ د غوراوي کمېټې دې لوبلړۍ ته یوه ۱۹ کسیزه لوبډله اعلان کړې ده چې، د ځینو پخوانیو لوبغاړو په ګډون کې په‌کې څو تنو ځوانانو ته هم چانس ورکړل شوی دی.

سیالۍ به د نومبر میاشتې په ۶مه نېټه پیل او ترې ۱۱مې نېټې به روانې وي.

بنګله‌دېش کرکټ بورډ لا یادو سیالیو ته خپله لوبډله نه‌ده اعلان کړې.

د افغانستان د ازادو مبارزو لندن مېشتی لوبغاړی فرید بشارت د برازیل له لوبغاړي ویکټور هوګو سره سیالي کوي.

دغه سیالي به د عربي متحده اماراتو په کوربه‌توب د ابوظبۍ ښار د "یو‌ايف‌‌سي" په سازمان کې ترسره شي، چې نندارې ته به یې شاوخوا ۱۸ زره خلک د لوبو میدان ته ورشي.

فرید بشارت تر دې دمه ۱۲ ازادې مبارزې کړې دي او هيڅ لوبه یې نه‌ده بایللې او ویکټور هوګو بیا په ۲۵ سیالیو کې ۴ لوبې بایللي دي.

د ازادو مبارزو د لوبغاړو د درجه بندۍ په جدول کې ښاغلی بشارت ۳۰ او هوګو بیا ۶۲ مقام لري.

د ویلو ده چې دا د یو‌ايف‌سي په سازمان کې د فرید بشارت څلورمه او د ویکټور هوګو دویمه سیالي ده.

د افغانستان د کرکټ د ابدالیانو لوبډله سبا د عمان په کوربه‌توب له سریلانکا سره لوبه کوي.

د افغانستان او سریلانکا سبانۍ لوبه د اسیا جام د ځوانانو د کرکټ سیالیو په لړ کې وروستۍ سیالۍ ده.

پرون افغانستان له هند سره نیمه پای‌بلوله درلوده، چې افغانستان واتونېده، د شلو منډو په توپیر هند ته ماتې ورکړي.

افغانستان د دې سیالیو په لومړي پړاو کې سریلانکا او بنګله‌دېش ټیمونو هم مات کړې وو.

د افغانستان له ۱۷ کلونو کم‌عمره د فوټبال ملي لوبډله سبا یک‌شنبې د بنګله‌دېش پر وړاندې د لوبې میدان ته ښکته کېږي.

د ۱۷ کلونو د کم‌عمره د اسیا جام د فوټبال د مقدماتي سیالیو په لړ کې دا د افغانستان څلورمه او وروستۍ لوبه ده.

دا سیالۍ به کابل پر وخت د مازیګر څلور نیمې بجې شي.

افغانستان د تېرې جمعې په ورځ درې د یو پر وړاندې کمبودیا ته ماتې ورکړه او د اسیا ملتونو جام ته يې لار ومونده.

د اسیا د ملتونو جام سیالۍ په ۲۰۲۵ کال کې پیليږي.

د ایټالیا د بهرنیو چارو وزارت پرون ناوخته پر خپلې ایکس‌پاڼې (پخواني تویټر) ویلي: "سبرینا اوګولیني يې د افغانستان لپاره د نوې سفیرې په توګه ګومارلې چې د قطر له پلازمېنې دوحې به خپلې چارې مخته وړي."

اوګولیني ویلي، دغه مسوولیت په ویاړ مني او د خپل کار په برخه کې به د بشري حقونو په ځانګړې توګه د ښځو حقونو ته لومړیتوب ورکړي.

له ایټالیا سربېره، د امریکا د متحده‌ایالاتو په ګډون د افغانستان لپاره د یوشمېر نورو هېوادونو سفیران او استازي خپلې چارې له دوحې پر مخ وړي.

۵۶ کلنه اوګولیني د ایټالیا په پلازمېنه روم کې نړۍ ته سترګې غړولي او د سیاسي علومو په برخه کې لوړې زده‌کړې کړي دي.

په ملګروملتونو کې د افغانستان دایمي استازی وايي، په افغانستان کې د عدالت پلي کېدو لپاره دې نړیواله ټولنه جنسيتي اپارتاید په رسیمت وپېژني.

نصیراحمد فایق پرون جمعه د (اکټوبر ۲۵مه) پر خپلې ایکس‌پاڼې (پخواني ټویټر) د ملګروملتونو په امنیت شورا کې د خپلې وینا د متن په خپرولو سره له ملګروملتونو غوښتي چې پر طالبانو فشار راوړي، څو د بشري حقونو په برخه کې نړیوالو ژمنو ته غاړه کېږدي او نړیوال دې د طالبانو له‌خوا پر ښځو لګول شوي بندیزونه د جنیستي اپارتاید په توګه په رسمیت وپېژني.

د فایق په خبره، نړیوالې سرچینې دې په افغانستان کې له ښځو ملاتړ وکړي.

فایق وړاندې وايي، په افغانستان کې د ښځو ځپل یوازې د دې هېواد لپاره یو بحران او غمیزه نه، بلکې د نړۍ سوله او امن هم ګواښي.

خو د طالبانو حکومت له‌دې وړاندې په ځلونو ویلي، د افغاني کلتور او د اسلام په چوکاټ کې يې ښځو ته حقونه ورکړي دي.

وړمه ورځ په ملګروملتونو کې د سرمنشي مرستیالې امينې محمد د ښځو په اړه د ملګروملتونو د امنیت شورا یوې غونډې ته په وینا کې ویلي وو، په افغانستان کې له ټولنې او حکومتولۍ د ښځو شدید محرومیت د ښځو د حقونو په برخه کې ښکاره شاتګ په ګوته کوي.

طالبانو په افغانستان کې نجونې له زده‌کړو راګرځولي او په ډېر شمېر دولتي او غیر دولتي ادارو کې يې د دوی پر کار بندیز لګولی دی.

د کاپیسا سیمه‌يیز چارواکي وايي، پېښه پرون د کاپیسا په شوخي نومې سیمه کې وشوه.

د کاپیسا د امنیه قوماندانۍ ویاند عبدالفتاح فایض په یوه بیان کې وویل، پېښه هغه مهال وشوه چې د طالبانو د حکومت د دفاع وزارت یو اړوند رینجر موټر له یوه مازادا ډوله موټر سره ولګېد.

د سرچینې په وینا د پېښې پنځه تنه ټپیان د رینجر او یو تن د مازدا سپرلۍ وو.

د پېښې علت د ډریورانو بې‌احتیاطي بلل شوې ده.

د اسیا ایمرجینګ جام په دویمې نیمه پایلوبې کې د افغانستان الف لوبډلې د هندوستان الف لوبډلې ته د ۲۰ منډو په توپیر ماتې ورکړه او پایلوبې ته ورسېدل.

دغه سیالي چې نن جمعه د عمان په کوربتوب ترسره شوه، د کابل پر وخت ماښام ۶:۰۰ بجې پیل شوې وه او افغان ابدالیانو د پچې په ګټلو سره توپوهنه غوره کړه.

افغانستان د ۴ لوبغاړو تر سوځېدو وروسته په شلو اورونو کې ۲۰۶ منډې وکړې.

په افغان توپوهونکو کې یو وار بیا پیلیز توپوهونکي صدیق‌الله اتل تر ټولو مخکښ توپوهونکو و چې په ۸۳ منډو وسوځېد.

دغه راز ذبیداکبري۶۴ او کریم جنت بیا په ۴۱ منډو وسوځېد.

د هندۍ لوبډلې یوازېنی بریالی توپ اچونکی راسخ سلام و چې ۳ افغان لوبغاړي یې وسوځول.

د هندوستان الف لوبډلې د هدف په تعقیب ۱۸۶ منډې وکوې او ۷ لوبغاړي یې له لاسه ورکړل.

د یادې لوبډلې په ګټه رمنديپ سېنګ تر نورو زیاتې ۶۴ منډې وکړې.

د افغان ابدالیانو په توپ اچونکو کې الله محمدغضنفر او عبدالرحمن دوه-دوه او شرف‌الدین یو لوبغاړی اوټ کړ.

دا لومړی ځل دی چې افغان ابدالیان د اسیا ایمرجېنګ جام پایلوبې ته وځي.

پایلوبه به د اکټوبر په ۲۷مه نېټه د سریلانکا الف او افغان ابدالیانو ترمنځ ترسره کېږي.