پاکستاني چارواکو د بلوڅانو یوه مخکښه فعاله ماهرنګ بلوڅ بهر ته له سفره راګرځولې ده.

ماهرنګ بلوڅ پرون ناوخته پر خپلې ایکس‌پاڼې یا پخواني ټویټر په یوه ویډیو پیغام کې ویلي، د امریکا نیویارک ښار ته په یوه نړیواله غونډه کې د ګډون په موخه روانه وه چې د کراچۍ له هوايي ډګره راوګرځول شوه.

اغلې بلوڅ ویلي، چارواکو ترې پاسپورټ اخیستې او غواړي چې په دې اقداماتو سره د "بلوڅانو غږ خاموشه" کړي.

د کراچۍ په هوايي ډګر کې پاکستاني چارواکو د نوم نه ښودلو په شرط د ازادي راډیو مشال برخې ته ویلي، د ماهرنګ بلوڅ او یو شمېر نورو بلوڅ فعالانو نومونه په هغې لېست کې شامل دي چې د سفر بندیز پرې لګېدلی دی.

ماهرنګ بلوڅ په دې وروستیو کې د امریکا په ټامیز مجله کې د نړۍ د سلو اغېزمنو کسانو په نوملړ کې شامله شوې وه.

اغلې بلوڅ په بلوچستان کې د جبري بې درکیو پر ضد د غږ پورته کولو یو سمبول ګرځېدلې او د بلوڅانو ډېر لاریونونه د هغې تر مشرۍ لاندې ترسره کېږي.

د اسرايیلو پوځ وايي، د لبنان د حزب‌الله ډلې یو جګپوړی مشر سهيل حسین حسیني یې په پلازمېنه بیروت کې په یوه برید کې وژلی دی.

د اسرايیلو پوځ د دوشنبې په ورځ په یوه بیان کې ویلي، حسیني وژل شوی، خو په‌دې اړه نور جزییات نه‌دي ورکړل شوي.

په ځینو راپورونو کې راغلي چې سهیل حسین حسیني له ایرانه حزب‌الله ته د وسلو او پوځي تجهیزاتو د انتقال مسوول و.

حزب‌الله یوه ملېشه ډله او یو سیاسي ګوند دی چې د لبنان د سویل لویه برخه کنټرولوي.

امریکا، حزب‌الله د یوې ترهګرې ډلې په توګه پېژني او اروپايي ټولنې د حزب‌الله پوځي څانګه په تور لېست کې اچولې ده.

د حزب‌الله سیاسي څانګه د لبنان په پارلمان کې څوکۍ هم لري.

ایران نن اسراییلو ته خبرداری ورکړی چې په دغه هېواد دې برید نه‌کوي.

تهران یوه اوونۍ وړاندې پر اسرايیلو لسګونه توغندي وتوغول.

متحده‌ایالاتو اسراییلو ته خبرداری ورکړی چې د لبنان د پلازمېنې بیروت هوایي ډګر یا هغه سړکونه په نښه نه‌کړي چې دغه میدان ته ورځي.

د فرانسې خبري اژانس وايي، دا ګواښ داسې وخت ورکړل شوی چې د اسراییلو پوځ د بیروت په جنوبي څنډه کې د حزب‌الله پر ضد پراخ عملیات پیل کړي دي.

حزب‌الله یوه ملېشه ډله او یو سیاسي ګوند دی چې د لبنان د جنوب لویه برخه کنټرولوي.

امریکا، حزب‌الله د یوې ترهګرې ډلې په توګه پېژني او اروپايي ټولنې د حزب‌الله پوځي څانګه په تور لېست کې اچولې ده.

د حزب‌الله سیاسي څانګه د لبنان په پارلمان کې څوکۍ هم لري.

د امریکا د بهرنیو چارو وزارت ویاند متیو مېلر د دوشنبې په ورځ خبریالانو ته وویل، دا مهمه ده چې نه یوازې د بیروت هوايي ډګر خلاص وي، بلکې هغه سړکونه هم خلاص وي چې له بیروته د راوتلو په وخت امریکایانو او د نورو هېوادونو اتباعو ته خنډ پېښ نه‌شي.

یوې امنیتي سرچینې د فرانسې خبري اژانس ته ویلي، د اسرايیلو هوایي ځواکونو د دوشنبې په ورځ د بیروت ښار په جنوبي څنډه کې د دغه ښار هوایي ډګر ته څېرمه برید وکړ.

د اسټرالیا اړوند کانتاس هوايي شرکت په یوه پرواز کې د هغه فلم له نندارې بخښنه وغوښته چې ګڼې بربنډې شېبې لري.
کانتاس شرکت پرون په یوه بیان کې ویلي چې د یوې تخنیکې ستونزې له کبله دا پېښه شوې.

له سیډني تر جاپانه د کانتاس شرکت په دغه پرواز کې شاوخوا ۴۰ دقیقې د مسافرو مخ ته په وړو تلوېزیونو کې د ډاډیو Daddio فلم نندارې ته وړاندې شوی و او هیچا نه شو بدلولی، ځکه دا واړه سکرینونه لاک یا قفل شوي وو.

دا فلم په امریکا کې د بربنډو صحنو او جنسي اړیکو په خاطر تر ۱۷ کلنو کشرانو او په استرالیا کې تر ۱۵ کلنو کشرانو ته له ښودلو منع دی.

د ښځو په نړیوال شل اوره جام سیالیو کې نن سې شنبې په اې ګروپ کې د استرالیا او نیوزیلنډ لوبډلې مخامخ کېږي.

نیوزیلنډ او استرالیا تراوسه پورې یوه- یوه سیالي کړې او دواړو خپل سیالان مات کړي دي.

پرون د انګلستان او جنوبي افریقا د ښځو ملي لوبدلې مخامخ شوې چې د انګلستان لوبډلې په ۷ ویکټونو او ۴ توبونو جنوبي افریقا ته ماتې ورکړه.

د ښځو د نړیوال شل اوره جام سیالۍ، چې په متحده عربي اماراتو کې روانې دي، د تېرې اوونۍ د پنجشنبې په ورځ پیل شوې او د اکټوبر په شلمه پای ته رسېږي.

نن سهار د اوکراین د بې پیلوټه الوتکې د حملې له کبله د اشغال شوې کریمیا په فیودوسیا سیمه کې د تېلو یوې ډیپو اور اخیستی دی.

روسي چارواکو په ټیلیګرام کانال کې دا خبر ورکړی دی.

ځایي اوسېدونکو په فیودوسیا کې پر ځايي وخت سهار څلورنیمې بجې د اور تر لګېدو وروسته د څو چاودنو خبر ورکړی دی.

د روسیې له خوا د دې سیمې لپاره ګمارل شویو چارواکو هم په دې ډیپو کې د اور لګېدو خبر تایید کړی، خو د بې پیلوټه الوتکې د حملې په باب یې څه نه دي ویلي.

د کریمیا د مشرۍ لپاره د روسیې له‌خوا ګمارل شوي سلاکار اولیګ کرېچکوف په ټیلیګرام کې لیکلي چې چا ته مرګ‌ژوبله نه ده اوښتې.

بلخوا د روسیې دفاع وزارت په ټیلیګرام کې لیکلي چې د دوی د هوايي مدافع دستګاوو نن سهار د اوکراین له‌خوا ۲۱ توغول شوې بې پیلوټه الوتکې نسکورې کړې دي.

له دې جملې ۱۲ الوتکې پر کریمیا او ۶ پر کورسک سیمې توغول شوې وې.

د ښځو د کرکټ د شلو اوورونو نړیوال جام سیالیو په لړ کې به نن انګلستان او جنوبي افریقا په متحده عرب اماراتو کې له یوبل سره مخامخ شي.

ټاکل شوې دغه لوبه د کابل پر وخت ماښام شپږنیمې بجې په شارجه کې پیل شي.

پرون هند پاکستان ته په شپږو ویکټو ماتې ورکړه او ویسټ اینډیز وتوانېد سکاټلنډ ته ماتې ورکړي.

د ښځو شلو اوورنو نړیوال جام سیالۍ د پنجشنبې په ورځ پیل شوې او پایلوبه به یې د اکټوبر پر شلمه وشي.

وروسته له هغه چې د پاکستان حکومت د پښتون ژغورنې غورځنګ ناقانونه اعلان کړ، څو ساعته وروسته د غورځنګ په ملاتړ سلګونو زده‌کوونکو لاریون کړی دی.

پرون د پېښور پوهنتون، ځینو نورو تعلیمي ادارو او ځینې مدرسو زده‌کوونکو سپین بېرغونه په لاسونو کې اخيستی وو او دا څنګه ازادي ده شعارونه یې ورکول.

دوی وروسته خيبر ميدان ته لاړل.

د کورنیو چارو وزارت پرون په يوه فرمان کې په پښتون ژغورنې غورځنګ بنديز ولګاوه او د ترهګرۍ مخنيوي د قانون له مخې يې ناقانونه سازمان وګرځاوه.

په فرمان کې ادعا شوې چې "وفاقي حکومت د دلایلو پر اساس باور لري چې پښتون ژغورنې غورځنګ په داسې فعالیتونو اخته دی چې د هېواد د سولې او امنیت په زیان دي."

تر دې اعلان وروسته د پي ټی اېم مشر منظور پشتين پرون د اکتوبر پر ۶مه پر خپله رسمي فېسبوک‌پاڼه د مرکزي حکومت اقدام "سخت ظالمانه" وباله.

نوموړي لیکلي دي چې "تش په نوم وفاقي حکومت" پر پي ټي ایم د بندیز په لګولو له "ټولو حدودو تېر" شوی دی.

بلخوا ناقونه ګرځول شوې تحریک طالبان پاکستان ډلې یا ټي ټي پي نن د اکتوبر اوومه رسنیو ته په استولي یو بیان کې ویلي په خیبر ضلع کې د پښتون قامي عدالت په موقع به د اکتوبر له نهمې تر ۱۳مې بریدونه نه کوي.

بلخوا د پاکستان د بشري حقونو کمېسیون پر پي ټي ایم د بندیز غندلی کړې او له حکومته یې غوښتنه کړې چې د بندیز پرېکړه دې بېرته واخلي.

یاد کمېسیون پرون د اکتوبر شپږمه په خپله رسمي ایکس‌پاڼه لیکلي چې پي ټي ایم هیڅکله له تشدده کار نه دی اخیستی او د خپلو غوښتنو لپاره په قانوني چوکاټ کې دننه مبارزه کوي.

د پاکستان مرکزي حکومت داسې مهال دا اقدام کړی دی چې دا غورځنګ د اکتوبر پر ۱۱مه د پښتون قامي عدالت په نوم يوه جرګه د خیبر ضلعې په رېګي للمه کې وربللې ده.

په عین حال کې پېښور های کورټ د درې ورځنۍ غونډې اجازه ورکړې ده.

په اسلام‌آباد کې د چین سفارت تایید کړې چې دوه چینایي وګړي د کراچۍ هوایي ډګر مخې ته د تېر شپې په برید کې وژل شوي دي.

دغه سفارت نن دوشنبه په یوه خبرپاڼه کې دغه برید ترهګریز بللی او زیاته کړې ده چې یو چینایی وګړی په کې ټپي شوی هم دی.

دغه سفارت د پاکستان له حکومته غوښتي چې دغه حمله وڅېړي او عاملانو ته یې سزا ورکړي.

د پاکستان ځایي پولیسو او چارواکو مخکې تر دې ویلي وو چې پیښه د یوه ټانکر د چاودنې له کبله رامنځته شوې، خو اسوشېټېډپرېس خبري اژانس جیو تلوېزیون سره د یوې سرچینې د خبرو پر بنسټ ویلي چې دا پر بهرنیو اتباعو یو هدفي برید و.

چارواکو د برید د څرنګوالي ډېر جزییات نه دي ورکړي، خو بلوڅ بیلتون غوښتونکو دا ځانمرګی برید بللی او مسوولیت یې اخیستی دی.

دغې ډلې ازادي راډيو ته په یوه رالېږل شوې خبرپاڼه کې ادعا یې کړې چې هدف یې په سیمه کې د چینایي پانګه‌والو، انجینرانو او پوځ کاروان و.

پاکستان کې مخکې هم پر چینایي کارکوونکو ورته خونړي بریدونه شوي دي.